ម៉ូតូកង់បីរាងតូចច្រឡឹង អាចការពារកម្តៅ,ភ្លៀង និងមានសុវត្ថិភាព

ជាតិ

រថយន្ត

07, May 2018 , 7:19 pm

រូបភាព

ម៉ូតូកង់បី ដែលមានរូបរាងតូចច្រឡឹង មានកញ្ចក់បិតជិត ជាប្រភេទម៉ូតូកង់បីដែលមិនទាន់មានការនិយមច្រើននៅឡើយនៅកម្ពុជា។ វារាងតូចប្លែកមែន ប៉ុន្តែតម្លៃប្រហាក់ប្រហែលនឹងកូនឡានមួយដែរ។

អ្នកស្រី សុង សុផាវត្តី បានទិញម៉ូតូកង់បី រាងតូចច្រឡឹងដូចរថយន្តនេះ កាលពីចុងឆ្នាំ២០១៧ ក្នុងតម្លៃ៣២០០ដុល្លារ។ អ្នកស្រីបានប្រាប់សារព័ត៌មានថ្មីៗថា មូលហេតុដែលគាត់មិនទិញកូនឡាន ពីព្រោះអ្នកស្រីបារម្ភនឹងការចំណាយច្រើនលើការចាក់សាំង។ អ្នកស្រី សុង សុផាវត្តី បញ្ជាក់ដូច្នេះ៖ «ទិញកូនឡាន វាតម្លៃដូចគ្នា តែម៉ូតូនេះ វាស៊ីសាំងតិច។ បើទិញឡាន វាម៉ាស៊ីនធំ វាអស់សាំងច្រើន។ ខ្ញុំអត់មានសមត្ថភាពប្រើ។ ខ្ញុំជិះម៉ូតូនេះ ខ្ញុំចំណាយយ៉ាងច្រើនអស់១០ដុល្លារមួយខែ»។

មានវ័យ៣០ឆ្នាំ អ្នកស្រី សុផាវត្តី ដែលមានកូនតូចនៅអង្គុយពីមុខផង បានឆ្លៀតប្រាប់សារព័ត៌មានថ្មីៗទៀតថា ម៉ូតូកង់បីនេះ ផ្តល់ភាពងាយស្រួលដល់គាត់ច្រើន។ អ្នកស្រី មិនត្រឹមតែប្រើប្រាស់យានជំនិះជំនាន់ថ្មីមួយនេះ ទៅធ្វើការនោះទេ អ្នកស្រីក៏តែងតែឌុបម្តាយ ទៅផ្សាររាល់ព្រឹក និងជូនម្តាយទៅវត្តជាញឹកញាប់ផងដែរ។ អ្វីដែលពិសេសនោះគឺមិនបាច់បារម្ភពីសុវត្ថិភាពនៅពេលធ្វើដំណើរលើដងផ្លូវនោះទេ ហើយអាចការពារកម្តៅថ្ងៃ និងភ្លៀងបានទៀតផង។ នេះជាការបន្ថែមរបស់អ្នកស្រី វត្តី៕