ក្រោមប្រធានបទ «មិនទុកនរណាម្នាក់ចោល» កាកបាទក្រហមកម្ពុជាបានថវិកាសប្បុរសជាង១៨លានដុល្លារ

ជាតិ

សង្គមជាតិ

ក្រោមប្រធានបទ «មិនទុកនរណាម្នាក់ចោល» កាកបាទក្រហមកម្ពុជាបានថវិកាសប្បុរសជាង១៨លានដុល្លារ

08, May 2018 , 11:04 am

រូបភាព

ដោយ: ថ្មីៗ

កាកបាទក្រហមកម្ពុជា នៅទីស្នាក់ការរបស់ខ្លួន បានប្រារព្ធទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា លើកទី១៥៥ ក្រោមប្រធានបទ «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល»។ សម្តេចនាយករដ្ឋមន្ត្រី ហ៊ុន សែន ដែលបានចូលរួមធ្វើជាអធិបតីក្នុងពិធីនោះ បានបញ្ជាក់តាមទំព័រហ្វេសប៊ុកថា គិតត្រឹមម៉ោង១០ និង៤០នាទីព្រឹក ថ្ងៃអង្គារនេះ មូលនិធិបឋមដែលកាកបាទក្រហមកម្ពុជាទទួលបានពី សប្បុរសជនជាតិ និងអន្តរជាតិមានចំនួនសរុប ១៨,០២៨៦,៦៨ (១៨លាន ពីរម៉ឺន ប្រាំបីពាន់ ប្រាំមួយរយ ហុកសិបប្រាំបី) ដុល្លារអាមេរិក។

សម្តេច ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានលើកឡើងពីសារសំខាន់នៃការរួមចំណែករបស់សប្បុរសជនជាតិ និងអន្តរជាតិ ដែលបានធ្វើឲ្យកាកបាទក្រហមកម្ពុជាមានធនធានហិរញ្ញវត្ថុគ្រប់គ្រាន់ក្នុងការដោះស្រាយសេចក្តីត្រូវការជាក់ស្តែងរបស់អ្នករងគ្រោះ និងអ្នកងាយរងគ្រោះបំផុតនៅតាមសហគមន៍។

ស្ត្រីទីមួយរបស់កម្ពុជា បានអះអាងថា កាកបាទក្រហមកម្ពុជា បន្តអនុវត្តយុទ្ធសាស្ត្រ ២០១១-២០២០ របស់ខ្លួនផ្តោតលើវិស័យស្នូលទាំង៤ គឺគ្រប់គ្រងគ្រោះមហន្តរាយ អប់រំ ថែទាំសុខភាពតាមសហគមន៍ លើកកម្ពស់តម្លៃមនុស្សធម៌ និងអភិវឌ្ឍស្ថាប័ន។

យោងតាមរបាយការណ៍ក្នុងឆ្នាំ២០១៧ រហូតដល់ខែមេសា ឆ្នាំ២០១៨នេះ កាកបាទក្រហមកម្ពុជា ជួយពលរដ្ឋនៅតំបន់ដាច់ស្រយាលជាង១ម៉ឺនគ្រួសារឲ្យទទួលបានអណ្តូងទឹកស្អាត និងស្រះទឹកសហគមន៍ ថែមទាំងផ្តល់ការឧបត្ថម្ភប្រជាពលរដ្ឋងាយរងគ្រោះបំផុត គឺចាស់ឥតទីពឹង កុមារកំព្រា កុមារខ្សោយសតិបញ្ញា ស្ត្រីមេម៉ាយ អ្នកពិការ អ្នករស់នៅជាមួយមេរោគអេដស៍ អ្នកមានជម្ងឺរាំរ៉ៃ ជាង១០ម៉ឺនគ្រួសារ។

កាកបាទក្រហមកម្ពុជា ក៏បានលើកឡើងពីការរួមចំណែករបស់បុគ្គលិក និងអ្នកស្ម័គ្រចិត្តរបស់ខ្លួនក្នុងការជួយអប់រំណែនាំពីច្បាប់ចរាចរណ៍ផ្លូវគោក ការចូលរួមក្នុងសកម្មភាព មិត្តអប់រំមិត្ត សំអាតបរិស្ថាន ដាំដើមឈើ និងបរិច្ចាកឈាម ជាដើម។
ជាមួយគ្នានេះផងដែរ កាកបាទក្រហមកម្ពុជា បានលើកពីការចុះអប់រំពលរដ្ឋនៅតំបន់ព្រំដែន លើសារគន្លឹះស្តីពីគ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះ ការផ្តល់ប្រាក់កម្ចី ឥតការប្រាក់ដើម្បីធ្វើជាដើមទុនប្រកបមុខ របរមានជីវភាពប្រសើរឡើង រួមទាំងសេវាកម្មថែទាំសុខភាពផ្សេងៗ។

«ក្រៅពីសមិទ្ធផលសំខាន់ៗខាងលើនេះកាកបាទក្រហមកម្ពុជាបានឧបត្ថម្ភដល់មន្ទីរពេទ្យគន្ធបុប្ផាចាប់ពីឆ្នាំ ២០១២ មក ដោយក្នុងមួយឆ្នាំៗ ចំនួន មួយលានដុល្លារអាមេរិក និងបានជួយសាងសង់ និងជួសជុល លំនៅឋាន បានរាប់រយខ្នង ធ្វើបង្គន់អនាម័យ រាប់ពាន់បន្ទប់ ផ្តល់ស៊ីទែនទឹក និងធុងចម្រោះទឹក ជូនដល់ប្រជាពលរដ្ឋនៅតាម ខេត្តនានា និងបានជួយស្វែងរក គ្រួសារដែលបែកគ្នា ជាង៤០ឆ្នាំ ឱ្យបានជួបគ្នាឡើងវិញ បានជួយសាងសង់អគារ សិក្សា អគារស្នាក់នៅ នៅតាមអង្គការ សមាគម និងមណ្ឌលកុមារកំព្រាមួយចំនួន»។ នេះបើយោងតាមរបាយការណ៍ដែលបង្ហោះក្នុងទំព័រហ្វេសប៊ុកសម្តេចនាយករដ្ឋមន្ត្រី ហ៊ុន សែន។

ក្នុងឱកាសនោះដែរ សម្តេច ហ៊ុន សែន មានប្រសាសន៍រំលឹកពីគុណូបការៈរបស់សម្តេចព្រះបាទនរោត្តម សីហនុ និងសម្តេចម៉ែ ដែលកន្លងមកព្រះអង្គបានចូលរួមចំណែកយ៉ាងធំធេងក្នុងសកម្មភាព កាកបាទក្រហមកម្ពុជា។ តាមរយៈប្រធានបទឆ្នាំនេះ «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណា ម្នាក់ចោល» សម្តេចវាយតម្លៃថា ពិតជាមានន័យគ្រប់គ្រាន់សម្រាប់សកម្មភាពរួមរបស់កាកបាទក្រហមកម្ពុជា៕