ជាតិ
ក្រុមហ៊ុនចិនដែលខួងថ្មនៅកសិន្ធុអង្គរវត្តប្រាប់អប្សរាថាខ្លួនចុះសិក្សានីវ៉ូទឹកលើគម្រោងស្ដារផ្លូវទឹក រូបភាពពីហ្វេសប៊ុក
× សៀមរាប៖ មានការភ្ញាក់ផ្អើលមួយបានកើតឡើងនៅព្រឹកថ្ងៃទី៦ ឧសភា ឆ្នាំ២០១៨ ដោយជនជាតិចិនចំនួន៤រូប បានធ្វើសកម្មភាពខួងថ្មកសិន្ធុអង្គរវត្ត។ ភ្លាមៗ មន្ត្រីប៉ូលិសការពារបេតិកភណ្ឌបានចុះឃាត់សកម្មភាពរបស់ជនជាតិចិនទាំងនោះ និងបានសួរនាំអំពីដើមហេតុធ្វើឱ្យមានការខួងថ្មបុរាណដែលជាសម្បត្តិបេតិកភណ្ឌជាតិបែបនេះ។
តំណាងក្រុមហ៊ុនចិន បានចូលខ្លួនមកបំភ្លឺពីដើមហេតុដែលធ្វើឱ្យពួកគេខួងថ្មកសិន្ធុខាងត្បូងអង្គរវត្ត ដែលមានទីតាំងនៅចំណុចរង្វង់មូលចំបក់កំណប់។ លោក XIE HONGDING តំណាងក្រុមហ៊ុន ស្ពាន-ថ្នល់ចិន (CRBC) បានប្រាប់អាជ្ញាធរជាតិអប្សរានៅព្រឹកថ្ងៃទី៧ ឧសភា ថា ខ្លួនមានបំណងចុះសិក្សាស្រាវជ្រាវពីនីវ៉ូទឹកនៅប្រាសាទអង្គរវត្ត លើគម្រោងស្ដារផ្លូវទឹកពីទន្លេមេគង្គ ទៅទន្លេសាប។ នេះបើតាមអ្នកនាំពាក្យអាជ្ញាធរជាតិអប្សរា
លោក ឡុង កុសល បន្ថែមថា តំណាងក្រុមហ៊ុនចិនខាងលើបានបំភ្លឺទៀតថា លោកនិងក្រុមការងារមិនដឹងថា តំបន់ខាងលើស្ថិតក្រោមសមត្ថកិច្ចរបស់អាជ្ញាធរជាតិអប្សរានោះឡើយ ដោយនឹកស្មានថា សកម្មភាពការងារខ្លួនបានដឹងឮអស់ហើយ ទើបក្រុមការងារលោកធ្វើការខួងថ្មនៅចំណុចខាងលើរបៀបនេះ។ លោក XIE ព្រមទទួលស្គាល់កំហុស និងថានេះជាកំហុសអចេតនា ហើយក្រុមហ៊ុនរបស់លោកក៏គ្មានបំណងជីកកកាយនៅកន្លែងផ្សេងក្នុងរមណីយដ្ឋានអង្គរទៀតដែរ។
បើតាមការលើកឡើងរបស់លោក ឡុង កុសល បច្ចុប្បន្នអាជ្ញាធរជាតិអប្សរា និងប៉ូលិសការពារបេតិកភណ្ឌ កំពុងបន្ដស៊ើបអង្កេតករណីខាងលើ ដោយក្នុងនោះអាជ្ញាធរជាតិអប្សរា មិនទាន់អាចទទួលយកបាននូវហេតុផលភាគីចិន ដោយថាចុះវាស់កម្រិតនីវ៉ូទឹកនៅចំណុចកសិន្ធុអង្គរវត្ត។ អ្នកនាំពាក្យអាជ្ញាធរជាតិអប្សរា បន្ថែមថា៖« ហេតុផលរឿងវាស់នីវ៉ូទឹកយើងមិនទាន់អាចទទួលយកបាន ព្រោះថាកម្រិតនីវ៉ូទឹកនៅបឹងទន្លេសាបទាបជាងនៅអង្គរវត្តឆ្ងាយណាស់ ហេតុអ្វីពួកគេយកចំណុចទាំង២នេះមកធៀបគ្នាបែបនេះ»។
លោក រុំ រ័ត្នយ៉ារិទ្ធ មន្ត្រីប៉ូលិសការពារបេតិកភណ្ឌ បានលើកឡើងថា ក្រុមការងាររបស់លោកបានធ្វើការឃាត់សកម្មភាពជនជាតិចិនដែលមានគ្នា៤នាក់ នៅចំណុចកសិន្ធុខាងត្បូងអង្គរវត្តនៅវេលាម៉ោង ៩និង៥០នាទី ព្រឹកថ្ងៃទី៦ ខែឧសភា។ ថ្មដែលជនជាតិចិនបានខួងមានទំហំមុខកាត់ ១.៦ស.ម និងជម្រៅ ១១ស.ម។ លោកបន្ថែមថា ក្រុមការងារលោកបានធ្វើការថតចំលងលិខិតឆ្លងដែនជនជាតិចិនទាំង៤នាក់នោះរួចហើយដែរ និងបានបន្ដដោះស្រាយជាមួយភាគីពាក់ព័ន្ធជាបន្ដបន្ទាប់។
គួរបញ្ជាក់ថា យោងតាមលិខិតរបស់ក្រសួងសាធារណការ និងដឹកជញ្ជូន លេខ ១២៧៣ បានជូនដំណឹងដល់អភិបាលរាជធានីភ្នំពេញ អភិបាលខេត្ត កណ្ដាល កំពង់ឆ្នាំង កំពង់ធំ ពោធិ៍សាត់ បាត់ដំបង និងសៀមរាប លើកម្មវត្ថុសុំជួយសហការគាំទ្រដល់ដំណើរការសិក្សារបស់ក្រុមហ៊ុនសាជីវកម្ម ស្ពាន-ថ្នល់ចិន លើការស្ដារផ្លូវទឹកពីទន្លេមេគង្គ ទៅទន្លេសាប។ ក្នុងលិខិតដែលមានចុះហត្ថនៅថ្ងៃទី៦ មេសា ឆ្នាំ២០១៨ ដោយរដ្ឋលេខាធិការ លោក លឹម ស៊ីដេនីន ស្នើឱ្យអភិបាលរាជធានី និងខេត្តខាងលើ ជួយអន្ដរាគមន៍ និងឧបត្ថម្ភគាំទ្រដល់ក្រុមហ៊ុនចិនខាងលើ ដើម្បីអនុវត្តន៍ដំណើរការសិក្សា ប្រកបដោយភាពរលូន និងទទួលបានជោគជ័យ៕
Tag:
កសិន្ធុអង្គរវត្ត
ចិន
© រក្សាសិទ្ធិដោយ thmeythmey.com