លោកស្រី ជូ ប៊ុនអេង៖ ស្ត្រីខ្មែររងគ្រោះច្រើនជាងគេនៅចិន តាមរយៈការជួញដូរ និងរៀបការ

ជាតិ

លោកស្រី ជូ ប៊ុនអេង៖ ស្ត្រីខ្មែររងគ្រោះច្រើនជាងគេនៅចិន តាមរយៈការជួញដូរ និងរៀបការ

10, May 2018 , 10:19 pm

រូបភាព

ដោយ:

ភ្នំពេញ៖ អាជ្ញាធរ បង្ហាញរបាយការណ៍ថា ស្ត្រីខ្មែររងគ្រោះ ដោយសារការជួញដូរ និងចាញ់បោកមេខ្យល់លួងលោមច្រើនជាងគេ គឺនៅប្រទេសចិន។ សមត្ថកិច្ចកម្ពុជា-ចិន បានជួយស្ត្រីរងគ្រោះខ្មែរទាំងនោះ ត្រលប់មកស្រុកកំណើតវិញ យ៉ាងហោចណាស់ ៦០នាក់ក្នុង១ឆ្នាំ។

រដ្ឋលេខាធិការក្រសួងមហាផ្ទៃ លោកជំទាវ ជូ ប៊ុនអេង បាននិយាយថា ស្ត្រីខ្មែរច្រើនណាស់ដែលរងគ្រោះ និងជួញដូរដោយខុសច្បាប់នៅប្រទេសចិន ។ ពួកគេភាគច្រើនរងគ្រោះ ដោយសារការរៀបអាពាហ៍ពិពាហ៍ប្រថុយប្រថាន និងចាញ់បោកមេខ្យល់លួងលោម។ លោកស្រី បន្ថែមថា ដោយសារបញ្ហានេះទើបកម្ពុជា-ចិន រៀបចំប្រជុំបង្កើតផែនការសម្រាប់ជួយសង្គ្រោះស្រី្តខ្មែរ ហើយទប់ស្កាត់ការជួញដូរ និងតាមក្រោមរូបភាពផ្សេងៗ មិនឲ្យកើតមានបន្តទៀតនោះទេ។

ក្នុងកិច្ចប្រជុំប្រចាំឆ្នាំលើកទី២ រវាងរដ្ឋាភិបាលកម្ពុជា-ចិន ស្ដីពី «ភាពរីកចម្រើននៃការអនុវត្តកិច្ចព្រមព្រៀងសហប្រតិបត្តិការក្នុងការបង្ការទប់ស្កាត់ និងប្រយុទ្ធប្រឆាំងអំពើជួញដូរមនុស្ស និងផែនការសកម្មភាព» រដ្ឋលេខាធិការក្រសួងមហាផ្ទៃរូបនេះ បានបញ្ជាក់ថា៖ «កិច្ចប្រជុំលើកទី២ ជាមួយភាគីចិននាពេលនេះ គឺជាការត្រួតពិនិត្យរួមគ្នាលើកិច្ចសហប្រតិបត្តិការ ដែលក្រុមអ្នកទទួលបន្ទុកអនុវត្តកិច្ចព្រមព្រៀងរបស់ប្រទេសទាំងពីរ បាននិងកំពុងធ្វើការងារយ៉ាងសកម្មក្នុងការប្រយុទ្ធប្រឆាំងអំពើជួញដូរមនុស្ស»។

សូមរម្លឹកថា កិច្ចប្រជុំលើកទី១ បានធ្វើឡើងកាលពីឆ្នាំ២០១៧ នៅខេត្តអានហួយ ប្រទេសចិន ភាគីទាំងពីរបានផ្លាស់ប្តូរព័ត៌មានគ្នា ស្តីអំពីភាពរីកចម្រើននៃកិច្ចសហប្រតិបត្តិការក្នុងការបង្ក្រាប និងជួញដូរជនរងគ្រោះដែលបានរៀបការទាំងប្រថុយប្រថាន និងផ្ទុយពីឆន្ទៈសាមីខ្លួន៕