ជាតិ
អគ្គកុងស៊ុលចិន បារម្ភពីបញ្ហាខ្វះបន្ទប់ស្នាក់នៅ និងភោជនីយដ្ឋានសម្រាប់បម្រើឲ្យអ្នកទេសចរចិន
× សៀមរាប៖ អគ្គកុងស៊ុលចិនប្រចាំខេត្តសៀមរាប មានការព្រួយបារម្ភពីបញ្ហាខ្វះបន្ទប់ស្នាក់នៅ និងភោជនីយដ្ឋាន សម្រាប់បម្រើឲ្យអ្នកទេសចរចិន មកកម្សាន្តនៅកម្ពុជា។ នេះបើតាមទីភ្នាក់ងារសារព័ត៌មានជាតិ AKP។
អគ្គស្ថានកុងស៊ុលនៃសាធារណរដ្ឋប្រជាមានិតចិន ប្រចាំខេត្តសៀមរាបលោក លី ជីជា បាននិយាយថា ស្របពេលដែលចំនួនភ្ញៀវទេសចរចិនមកទស្សនាកម្ពុជាកើនឡើង តែបែជាមានបញ្ហាខ្វះបន្ទប់ស្នាក់នៅ កង្វៈបរិក្ខារ និងភោជនីយដ្ឋាន សម្រាប់ទទួលភ្ញៀវទេសចរចិនទៅវិញ។ បើតាមលោក លី ជីជា ភ្ញៀវទេសចិនមួយចំនួន ដែលមកទស្សនាខេត្តសៀមរាប គឺខ្វះបន្ទប់ស្នាក់នៅ កាលពីអំឡុងបុណ្យចូលឆ្នាំចិនកន្លងមកនេះ។
អគ្គកុងស៊ុលចិនរូបនេះ បានបញ្ជាក់ថា «ចំនួនអ្នកទេសចរជនជាតិចិនមកកម្ពុជានឹងកើនឡើងច្រើនជាងនេះ ហើយអាចប៉ាន់ស្មានថា អ្នកទេសចរម្នាក់បានចំណាយថវិកាប្រមាណ៥០០ដុល្លារអាមេរិក ដូច្នេះកម្ពុជា នឹងទទួលបានចំណូលថវិការាប់លានដុល្លារអាមេរិក»។
កម្ពុជាកំពុងទាកទាញ់ភ្ញៀវទេសចរចិនឲ្យមកទស្សនាកម្ពុជាឲ្យបានច្រើន ហើយកម្ពុជាកំពុងតែពង្រីកសេវាកម្មទេសចរណ៍ ដើម្បីឆ្លើយតបទៅនឹងកំណើនភ្ញៀវទេសចរ។ នេះបើតាមរដ្ឋមន្ត្រីក្រសួងទេសចរណ៍លោក ថោង ខុន ។
ក្នុងឆ្នាំ២០១៦ កម្ពុជាទទួលភ្ញៀវទេសចរចិនចំនួនជាង៦៧ម៉ឺននាក់ ។ ចំណែកឆ្នាំ២០១៧ មានចំនួន៩១ម៉ឺននាក់ និងគិតត្រឹមត្រីមាសទី១ ឆ្នាំ២០១៨នេះ ភ្ញៀវទេសចរចិន បានកើនឡើងដល់ជាង៥០ម៉ឺននាក់ហើយ។ នេះជាការលើកឡើងរបស់អគ្គកុងស៊ុលចិន ដែលបានបន្ថែមថា ជើងហោះហើរត្រង់កម្ពុជា-ចិនត្រូវបានបង្កើនច្រើន ក៏ដូចជាការសាងសង់ព្រលានយន្តហោះអន្តរជាតិថ្មីផងដែរ ដើម្បីទទួលភ្ញៀវទេសចរចិន។
យោងតាមរបាយការណ៍របស់មន្ទីរទេសចរណ៍ខេត្តសៀមរាប នៅក្នុងខេត្តសៀមរាបមានសណ្ឋាគារចំនួន២២០កន្លែង ស្មើ១៣.៤៦០បន្ទប់ ផ្ទះសំណាក់មានចំនួន២៩៦កន្លែងស្មើ៤.៨១១បន្ទប់ ភោជនីយដ្ឋានចំនួន១៧១កន្លែង៕
© រក្សាសិទ្ធិដោយ thmeythmey.com