ជាតិ
របាយការណ៍៖ កុមារពិការជិត៣០ភាគរយ នៅតែជួបបញ្ហាប្រឈមក្នុងការសិក្សា
× ភ្នំពេញ៖ កុមារពិការកម្ពុជាជិត៣០ភាគរយ នៅតែជួបបញ្ហាប្រឈមក្នុងការសិក្សា។ នេះបើតាមរបាយការណ៍របស់អង្គការ ភាពជាដៃគូអប់រំនៃអង្គការក្រៅរដ្ឋាភិបាល (NEP) កាលពីថ្ងៃទី១០ ខែឧសភា។
អ្នកស្រាវជ្រាវ នៃវិទ្យាស្ថានបើកទំលាយ លោក ផុន គឹមឆូយ បាននិយាយថា កុមារពិការមិនធ្លាប់បានចូលរៀននៅថ្នាក់បឋមសិក្សា មានចំនួន ១៤,៧ ភាគរយ ដែលពួកគេភាគច្រើន ពិការផ្នែកសតិបញ្ញា ក្នុងការលំបាកទទួលព័ត៌មាន ហើយអាណាព្យាបាលគ្មានថវិកា ដើម្បីផ្គត់ផ្គង់លើការសិក្សារបស់ពួកគេ។ ចំណែកកុមារពិការជើង ពិការភ្នែក និងថ្លង់ ចំនួន១៤,៦ភាគរយ ត្រូវបានបោះបង់ការសិក្សា ដោយសារតែកង្វះសាលារៀន (នៅតាមតំបន់ជនបទ) និងកង្វះការគាំទ្រឧបត្ថម្ភសម្ភារសិក្សា ។
រូបភាព លោក ផុង គឹមឆូយ អ្នកស្រាវជ្រាវ នៃវិទ្យាស្ថានបើកទូលាយ
លោក ផុន គឹមឆូយ បានបន្ថែមថា បញ្ហាប្រឈមដែលធ្វើឲ្យកុមារពិការមិនទទួលបានការអប់រំត្រឹមត្រូវ ដូចកុមារធម្មតាដទៃទៀត គឺទាក់ទងនឹងចំណេះដឹងរបស់គ្រូបង្រៀន នៅមានកម្រិតនៅឡើយ។ ក្នុងរបាយការណ៍វាយតម្លៃអំពីការអប់រំរបស់កុមារពិការ នៅកម្រិតបឋមសិក្សានៅកម្ពុជា អ្នកស្រាវជ្រាវរូបនេះ បានសង្កត់ដូច្នេះថា៖ «គ្រូបង្រៀនមិនអាចគ្រប់គ្រងការបង្រៀនសិស្សពិការបានគ្រប់ប្រភេទនោះទេ។ ភាគច្រើននៃសិស្សពិការត្រូវការបង្រៀនយ៉ាងដិតដល់ ប៉ុន្តែគ្រូបង្រៀនទាំងនោះមិនមានពេលវេលាគ្រប់គ្រាន់ដើម្បីបង្រៀនឡើយ»។
បន្ថែមពីនេះនាយកប្រតិបត្តិនៃអង្គការ ភាពជាដៃគូអប់រំអង្គការក្រៅរដ្ឋាភិបាល (NEP)លោក ជិន ច័ន្ទវាសនា បានកត់សម្គាល់ថា ទោះបីកុមារពិការមួយចំនួនទទួលបានការអប់រំទូទៅនៅថ្នាក់បឋមសិក្សា និងមួយចំនួនទៀតទទួលបានការអប់រំវិជ្ជាជីវៈផ្សេងៗ ក៏នៅតែមានកុមារពិការប្រមាណ២៩,៣ភាគរយ មិនទាន់ទទួលបានការអប់រំឲ្យពេញលេញនៅឡើយទេ។
រូបភាព លោកជិន ច័ន្ទវាសនា នាយកអង្គការ (NEP)
« បញ្ហានេះបណ្តាលមកពីកង្វះការផ្តល់សេវាកម្មគ្រប់គ្រាន់ និងកង្វះការយកចិត្តទុកដាក់ដល់ពួកគេផងដែរ។ នេះជាការបញ្ជាក់របស់លោក ជិន ច័ន្ទវាសនា ដែលប្ដេជ្ញាលើកទឹកចិត្ត និងរកដៃគូពាក់ព័ន្ធនានា ដើម្បីជួយដល់កុមារពិការទាំងនោះឲ្យមានលទ្ធភាពក្នុងការសិក្សា និងទទួលបានអនាគតល្អនៅក្នុងសង្គម៕
© រក្សាសិទ្ធិដោយ thmeythmey.com