ជាតិ
សង្គមជាតិ
នាយកសាលា ដែលប្រមាថព្រះមហាក្សត្រ ត្រូវបានបញ្ជូនទៅតុលាការខេត្តកំពង់ធំហើយ ព្រះករុណា ព្រះបរមនាថ នរោត្តម សីហនុ ព្រះមហាក្សត្រនៃព្រះរាជាណាចក្រកម្ពុជា
× នាយកសាលាបឋមសិក្សាព្រៃតាហ៊ូ លោក ឃាង ណាវី ដែលបានសរសេរសារប្រមាថព្រះមហាក្សត្រ ត្រូវបានបញ្ជូនទៅសាលាដំបូងខេត្តកំពង់ធំហើយ។ នេះបើតាមការបញ្ជាក់របស់ស្នងការរងខេត្តកំពង់ធំ លោក វេង សារ៉េន។
«នៅម៉ោង២រសៀលថ្ងៃនេះ (១៣ឧសភា) បុរសដែលជេរប្រមាថព្រះមហាក្សត្រត្រូវបានបញ្ជូនទៅតុលាការខេត្តកំពង់ធំហើយ។ គាត់ត្រូវបានចោទពីបទប្រមាថព្រះមហាក្សត្រ»។ នេះជាការអះអាងរបស់លោកស្នងការរងខេត្តកំពង់ធំប្រាប់សារព័ត៌មានថ្មីៗតាមទូរសព្ទនារសៀលថ្ងៃអាទិត្យទី១៣ឧសភានេះ។
បុរសម្នាក់ដែលត្រូវបានអះអាងថាជានាយកសាលាបឋមសិក្សាព្រៃតាហ៊ូ បានសរសេរសារមួយនៅលើបណ្តាញសង្គមហ្វេសប៊ុក ដោយប្រមាថរាជ្យវង្សានុវង្ស។ បុរសអាយុ៥០ឆ្នាំត្រូវបានសមត្ថកិច្ចឃាត់ខ្លួននារសៀលថ្ងៃ១២ខែឧសភា។
«យើងបានសួរគាត់ថា ហេតុអ្វីបានជាគាត់សរសេរយ៉ាងដូច្នេះ? គាត់ឆ្លើយថា គាត់ចង់សរសេរអ៊ីចឹង»។ លោកស្នងការរងបានបន្ថែមយ៉ាងដូច្នេះ។
នេះជាករណីបង្ក្រាបលើជនប្រមាថព្រះមហាក្សត្រលើកដំបូង បន្ទាប់ពីក្រមព្រហ្មទណ្ឌត្រូវបានធ្វើវិសោធនកម្ម ដើម្បីដាក់ទោសជនប្រមាថព្រះមហាក្សត្រ។ ប្រសិនបើនាយកសាលារូបនេះ ត្រូវបានរកឃើញថា បានប្រមាថព្រះមហាក្សត្រមែន លោកនឹងអាចប្រឈមការជាប់ពន្ធនាគារពី១ឆ្នាំទៅ៥ឆ្នាំ និងត្រូវពិន័យជាប្រាក់ពី២លានរៀលទៅ១០លានរៀល។
ការចាប់ខ្លួនអ្នកប្រមាថព្រះមហាក្សត្រត្រូវបានធ្វើឡើង ក្នុងអំឡុងពេលដែលកម្ពុជាកំពុងអបអរព្រះរាជពិធីចម្រើនព្រះជន្មព្រះមហាក្សត្រ៕
© រក្សាសិទ្ធិដោយ thmeythmey.com