ជាតិ
សម្ដេចហ៊ុន សែន ឲ្យនគរបាល ត្រៀមទប់ស្កាត់ក្រុមឧទ្ទាម ដែលចង់បំផ្លាញដំណើរការបោះឆ្នោត
× ភ្នំពេញ៖ សម្ដេចនាយករដ្ឋមន្ត្រីហ៊ុន សែន បានអំពាវនាវឲ្យនគរបាលគ្រប់លំដាប់ថ្នាក់ ធ្វើយ៉ាងណារក្សាឲ្យការបោះឆ្នោតជ្រើសតាំងតំណាងរាស្ត្រអាណត្តិទី៦ ប្រព្រឹត្តិទៅដោយសន្តិសុខ និងសុវត្ថិភាព។ សម្ដេចបានបញ្ជាក់ថា «ចលនាឧទ្ទាមរបស់ពួកក្បត់ជាតិ នៅតែមិនបោះបង់មហិច្ឆតាប៉ុនប៉ងបង្កអស្ថិរភាពដល់ប្រទេសជាតិ ជាពិសេសប៉ុនប៉ងបំផ្លាញនូវកិច្ចដំណើរការ និងលទ្ធផលបោះឆ្នោតសកលនាពេលខាងមុខ»។ ការថ្លែងបែបនេះ ធ្វើឡើងនៅក្នុងសារជូនពរ ខួបទី៧៣ នៃការកកើតនៃកងកម្លាំងនគរបាលជាតិកម្ពុជា ចេញផ្សាយនៅថ្ងៃទី១២ ខែឧសភា ឆ្នាំ២០១៨។
នៅក្នុងឱកាសខួបទី៧៣ នៃការកកើតកងកម្លាំងនគរបាលជាតិកម្ពុជា សម្ដេចហ៊ុន សែន បានផ្ញើសារជូនពរទៅកងកម្លាំងនគរបាលទាំងអស់ ដោយភ្ជាប់ជាមួយការអំពាវនាវ ឲ្យមានការរក្សាសន្តិសុខខ្ពស់ក្នុងការបោះឆ្នោត ជ្រើសតាំងតំណាងរាស្ត្រអាណត្តិទី៦ នាពេលខាងមុខ។ សម្ដេចមើលឃើញថា «ចលនាឧទ្ទាមរបស់ពួកក្បត់ជាតិ នៅតែមិនបោះបង់មហិច្ឆតាប៉ុនប៉ងបង្កអស្ថិរភាពដល់ប្រទេសជាតិ ជាពិសេសប៉ុនប៉ងបំផ្លាញនូវកិច្ចដំណើរការ និងលទ្ធផលបោះឆ្នោតសកលនាពេលខាងមុខ។ ទាំងអស់នេះគឺជាវិញ្ញាសារមួយនៅក្នុងចំណោមវិញ្ញាសារជាច្រើនទៀតដែលកងកម្លាំងនគរបាលជាតិត្រូវដោះស្រាយ»។
ទន្ទឹមនឹងឲ្យមានការប្រុងប្រយ័ត្ន និងរក្សាសន្តិសុខ សវត្ថិភាព កម្រិតខ្ពស់ ក្នុងការបោះឆ្នោតខាងមុខក្ដី តែតាមរយៈសាជូនពរ សម្ដេចក៏មិនភ្លេចជំរុញឲ្យថ្នាក់ដឹកនាំ និងមន្ត្រីនគរបាលទាំងអស់ ត្រូវទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ឲ្យបានគ្រប់ៗគ្នាឡើយ។
ក្រៅពីអំពាវនាវឲ្យរក្សាសន្តិសុខលើការបោះឆ្នោតខាងមុខ សម្ដេចនាយករដ្ឋមន្ត្រី ក៏បានជំរុញឲ្យនគរបាលទាំងអស់ មានការប្រុងប្រយ័ត្ននឹងអំពើភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ការជួយដូរមនុស្ស អាជីវកម្មផ្លូវភេទ ការជួញដូរគ្រឿងញៀន ប្រើប្រាស់គ្រឿងញៀន ជារឿងគ្រោះថ្នាក់ ដែលទាមទារឲ្យកងកម្លាំងនគរបាល មានការប្រុងប្រយ័ត្ន និងត្រូវដោះស្រាយ៕
Tag:
បោះឆ្នោត
ក្បត់ជាតិ
នគរបាល
ហ៊ុនសែន
© រក្សាសិទ្ធិដោយ thmeythmey.com