កីឡាជាតិ
ជាតិ
តេក្វាន់ដូ ITF ឈ្នះមេដាយមាស៨ ប្រាក់៥ និងសំរឹទ្ធ៨ ពីជើងឯកអាស៊ីនៅម៉ុងហ្គោលី ថ្នាក់ដឹកនាំ គ្រូបង្វឹក និងអត្តពលិកថតរួមគ្នាជាមួយមេដាយ និងពាន ដែលដណ្តើមបានពីជើងឯកអាស៊ីនៅម៉ុងហ្គោលី
× កីឡាតេក្វាន់ដូ ITF បានសាងភាពល្បីល្បាញនៅលើឆាកអន្តរជាតិសម្រាប់កម្ពុជា ក្រោយអត្តពលិកបានឈ្នះមេដាយ២១គ្រឿង ពីការប្រកួតជើងឯកអាស៊ីនៅទីក្រុងអ៊ូឡង់បាទ័រ ប្រទេសម៉ុងហ្គោលី។ ប្រតិភូកីឡាកម្ពុជានឹងនាំយកមេដាយ និងពានមកដល់មាតុប្រទេស នៅថ្ងៃទី១៥ ឧសភា។
ក្រុមអត្តពលិកកីឡាតេក្វាន់ដូ ITF កម្ពុជា បានបញ្ចប់បេសកកម្មក្នុងការស្វែងរកមេដាយពីព្រឹត្តិការណ៍ជើងឯកអាស៊ីនៅទីក្រុងអ៊ូឡង់បាទ័រ ប្រទេសម៉ុងហ្គោលី កាលពីថ្ងៃទី១៣ ឧសភា។ កម្ពុជាដណ្តើមបានមេដាយសរុបចំនួន២១គ្រឿង រួមមានមាស៨ ប្រាក់៥ និងសំរឹទ្ធ៨។ សម្រាប់ព្រឹត្តិការណ៍នេះ កម្ពុជាបានបញ្ជូនអត្តពលិកចំនួន២៤រូប(ស្រី២)ចូលរួម។
តាមរយៈជ័យជម្នះដ៏ធំធេងនេះ កម្ពុជាទទួលបានពានមាសចំនួនពីរផងដែរ។ ចំណែកកីឡាករយុវជន សុភ័ក្ត្រ ច័ន្ទឧត្តម ទទួលបានពានកីឡាករឆ្នើមប្រចាំការប្រកួត បន្ទាប់ពីរូបគេម្នាក់ឯងដណ្តើមបានមេដាយមាស២ និងប្រាក់១ ។ ប្រតិភូអត្តពលិកកម្ពុជានឹងនាំមេដាយ និងពានទាំងនេះមកដល់មាតុភូមិ នៅថ្ងៃទី១៥ ខែឧសភា ឆ្នាំ២០១៨។
«ក្រុម ITF កម្ពុជា មិនត្រឹមតែនាំមេដាយមាសជូនជាតិមាតុភូមិប៉ុណ្ណោះទេ ថែមទាំងនាំជើងពាន២ សម្រាប់ប្រទេសថែមទៀតផង។ ចំណែកកូនតូចរបស់ខ្ញុំ (សុភ័ក្ត្រ ច័ន្ទឧត្តម) វិញ គាត់ទទួលបានពានជើងឯកវ័យក្មេង ក្រៅពីមេដាយមាសរបស់គាត់ (បើបាល់ទាត់វិញគឺស្បែកជើងមាស) » ។ នេះជាការបញ្ជាក់របស់លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា។
ប្រធានសហព័ន្ធកីឡាតេក្វាន់ដូ ITF អាស៊ីអាគ្នេយ៍រូបនេះបានចាត់ទុកជ័យជម្នះនេះថា វាមិនត្រឹមតែជួយឲ្យកម្ពុជាមានភាពល្បីល្បាញនៅលើឆាកអន្តរជាតិនោះទេ ថែមទាំងជួយបំបែកកំណត់ត្រាសម្រាប់តេក្វាន់ដូ ITF នាពេលកន្លងមកទៀតផង។ លោកបន្ថែមថា៖«ជ័យជម្នះនេះ សបញ្ចាក់ឲ្យឃើញថា កីឡាតេក្វាន់ដូ ITF កម្ពុជាមានសមត្ថភាពពិតប្រាកដក្នុងការធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេម នាឆ្នាំ២០២៣»៕
Tag:
តេក្វាន់ដូ ITF
ម៉ុងហ្គោលី
កែវ រ៉េមី
© រក្សាសិទ្ធិដោយ thmeythmey.com