កីឡាជាតិ
ជាតិ
សរ សី ធ្វើឲ្យអ្នកគាំទ្រឥណ្ឌូណេស៊ីរាប់ពាន់នាក់ខកចិត្ត ក្រោយរូបគេយកឈ្នះកីឡាករម្ចាស់ផ្ទះ Senduk កីឡាករ សរ សី លើកដៃវាយកីឡាករ Victorio Senduk ដែលដួលនៅលើសង្វៀន
× អ្នកលេងគុនខ្មែរចម្រុះ សរ សី បានបង្ហាញភាពខ្លាំងលើឆាកអន្តរជាតិតាមរយៈយកឈ្នះកីឡាករម្ចាស់ផ្ទះឥណ្ឌូណេស៊ី Victorio Senduk ដោយពិន្ទុ នាការប្រកួតដាក់ទ្រុងនៅទីក្រុងហ្សាកាតាប្រទេសឥណ្ឌូណេស៊ីកាលពីយប់ថ្ងៃទី១២ ឧសភា។ នេះជាជ័យជម្នះលើឆាកអន្តរជាតិលើកដំបូងសម្រាប់ ស សី ហើយវាក៏ជាការបរាជ័យលើកដំបូងសម្រាប់កីឡាករម្ចាស់ផ្ទះផងដែរ។
កីឡាករគុនចម្រុះកម្ពុជា សរ សី បានធ្វើឲ្យអ្នកគាំទ្រឥណ្ឌូណេស៊ីរាប់ពាន់នាក់រងការខកចិត្តជាខ្លាំង បន្ទាប់ពីរូបគេបានយកឈ្នះម្ចាស់ផ្ទះ Victorio Senduk ដែលជាវីរបុរសក្នុងចិត្តរបស់ពួកគេដោយពិន្ទុ។ ជ័យជម្នះរបស់ សរ សី នៅលើឆាកអន្តរជាតិលើកដំបូងនេះ បានធ្វើឲ្យកីឡាករម្ចាស់ផ្ទះវ័យ៣៦ឆ្នាំរូបនេះស្គាល់បរាជ័យជាលើកដំបូង សម្រាប់៤ប្រកួតរបស់ខ្លួន។
នេះជាការបង្ហាញខ្លួនលើសង្វៀនដាក់ទ្រុងលើកទី៣របស់ សរ សី តែវាជាលើកទី២សម្រាប់ឆាកអន្តរជាតិ។ សម្រាប់ការបង្ហាញខ្លួនលើកដំបូងលើឆាកអន្តរជាតិកាលពីចុងខែកុម្ភៈ កន្លងទៅ សិស្សគុនក្លិប Cambodia Top Team រូបនេះ បានចាញ់កីឡាករម្ចាស់ផ្ទះមីយ៉ាន់ម៉ា Phoe Thaw។
នាការប្រកួតនៅសង្វៀនដាក់ទ្រុងនៅមជ្ឈមណ្ឌលសន្និបាតក្នុងទីក្រុងហ្សាកាតា កាលពីយប់ថ្ងៃទី១២ ឧសភា នៅទឹកទី១កីឡាករ Senduk បានប្រើកណ្តាប់ដៃវាយសង្គ្រប់យ៉ាងខ្លាំងមក សរ សី ដែលបានត្រឹមដកថយ និងវាយពីចម្ងាយ។ នៅដើមទឹកទី២ម្ចាស់ផ្ទះមិនធ្វើឲ្យអ្នកគាំទ្ររបស់គេខកចិត្តនោះទេ ពោលគឺ Senduk បានបន្តគ្របដណ្តប់លើ សរ សី ដូចទឹកទី១។
តែចុងទឹកទី២ សរ សី បានប្រើកណ្តាប់ដៃវាយទៅផ្ទៃមុខ និងទាត់រហូតធ្វើឲ្យគូប្រកួតដួល។ សរ សី បានឡើងជិះពីលើ Senduk ហើយបានប្រើកែង និងកណ្តាប់ដៃជាច្រើនមកលើផ្ទៃមុខ Senduk ដែលព្យាយាមលើកដៃរង។ នៅក្នុងទឹកទី៣ Senduk បានព្យាយាមដើរចូលដូចដើម ហើយបានប្រើកណ្តាប់វាយផ្ទៃមុខ សរ សី ដែលព្យាយាមដកថយ។ ទោះបីយ៉ាងនេះក្តី សរ សី បានប្រើកណ្តាប់ដៃ និងទាត់ឲ្យកីឡាករម្ចាស់ផ្ទះដួលនៅពាក់កណ្តាលទឹកទី៣ តែធ្វើអ្វីមិនបាន។
នៅចុងទឹកទី៣ឱកាសមាសនេះបានកើតឡើងម្តងទៀតសម្រាប់ សរ សី តែម្តងនេះ សរ សី បានឡើងទៅជិះពីលើ Senduk ហើយបានប្រើដណ្តាប់ និងកែងពុះលើមុខ Senduk ដែលកំពុងព្យាយាមបិទជាមួយការថមថយកម្លាំង។ សរ សី បានគ្រប់គ្រងស្ថានការណ៍បែបនេះរហូតចប់ទឹកទី៣។ ជាលទ្ធផលអាជ្ញាកណ្តាលបានកាត់ក្តីឲ្យ សរ សី ឈ្នះកីឡាករម្ចាស់ផ្ទះដោយពិន្ទុ៕
Tag:
MMA
ONE Championship
Victorio Senduk
ស សី
© រក្សាសិទ្ធិដោយ thmeythmey.com