អាមេរិកបន្ទោសក្រុមហាម៉ាស់លើការប៉ះទង្គិចរវាងប្រជាជនប៉ាឡេស្ទីននិងទាហានអ៊ីស្រាអែល

អន្តរជាតិ

អាមេរិកបន្ទោសក្រុមហាម៉ាស់លើការប៉ះទង្គិចរវាងប្រជាជនប៉ាឡេស្ទីននិងទាហានអ៊ីស្រាអែល

15, May 2018 , 10:18 am

រូបភាព

រូបភាព AFP

ដោយ: តន ចាន់រិទ្ធារ៉ា

សេតវិមាន នៅថ្ងៃទី១៤ ខែឧសភា បានទម្លាក់កំហុសលើក្រុមហាម៉ាស់ជុំវិញការប៉ះទង្គិចដ៏បង្ហូរឈាមរវាងកម្លាំងសន្តិសុខអ៊ីស្រាអែល និងបាតុករប៉ាឡេស្ទីន។ ជនជាតិប៉ាឡេស្ទីនយ៉ាងតិចណាស់៥៥នាក់បានបាត់បង់ជីវិត និងជាងពីរពាន់នាក់បានរបួសក្នុងការបង្ក្រាបរបស់ទាហានអ៊ីស្រាអែលនៅព្រំដែនតំបន់ហ្កាស្សាដែលនាយករដ្ឋមន្ត្រីអ៊ីស្រាអែល បេនចាមីន ណាតាន់យ៉ាហ៊ូ ចាត់ទុកជាការការពារខ្លួន។ ប្រទេសជាច្រើនបានថ្កោលទោសទង្វើនេះ និងស្នើឲ្យអ៊ីស្រាអែលរក្សាមានអត់ធ្មត់ខ្ពស់។

ថ្ងៃទី១៤ ខែឧសភា ជាថ្ងៃរីករាយរបស់រដ្ឋអ៊ីស្រាអែលដែលមានអាយុគម្រប់៧០ឆ្នាំ តែវាក៏ជាថ្ងៃឈឺចាប់របស់ជនជាតិប៉ាឡេស្ទីនដែលត្រូវបានបណ្ដេញចេញពីទឹកដីរបស់ខ្លួនកាលពីឆ្នាំ១៩៤៨ ។ ជនជាតិប៉ាឡេស្ទីនរាប់ពាន់បានចេញមុខតវ៉ានៅថ្ងៃបាត់បង់ទឹកដី ក៏ដូចជាប្រឆាំងការផ្លាស់ប្ដូរស្ថានទូតអាមេរិកទៅកាន់ទីក្រុងហ្ស៊េរុយសាលឡិមផង ប៉ុន្តែបែរជាត្រូវរងការបាញ់រះគ្រាប់ពិតពីសំណាក់ទាហានអ៊ីស្រាអែលទៅវិញ។

បើតាមទីភ្នាក់ងារព័ត៌មាន AFP ដែលស្រង់របាយការណ៍ក្រសួងសុខាភិបាលប៉ាឡេស្ទីន ការប៉ះទង្គិចនៅតំបន់ហ្កាស្សាស្លាប់ជនជាតិប៉ាឡេស្ទីនចំនួនយ៉ាងហោចណាស់៥៥នាក់ និងជាងពីរពាន់នាក់រងរបួសដោយសារគ្រាប់កាំភ្លើងទាហានប៉ាឡេស្ទីនដែលការពារព្រំដែនរបស់ខ្លួនន។ ទាហានអ៊ីស្រាអែលនិយាយថា ខ្លួនតម្រង់គោលដៅតែលើបាតុករដែលធ្វើសកម្មភាពភេរវកម្មប៉ុណ្ណោះ មិនមែនក្រុមបាតុករទូទៅឡើយ។

ប្រទេសជាច្រើនបានរិះគន់វិធានការរបស់រដ្ឋាភិបាលអ៊ីស្រាអែល តែមិនមែនអាមេរិកឡើយ។ ក្នុងសន្និសីទសារព័ត៌មាននៅថ្ងៃទី១៤ ខែឧសភា អ្នកនាំពាក្យរងសេតវិមាន Raj Shah បានបន្ទោសក្រុមហាម៉ាស់ចំពោះការប៉ះទង្គិចដ៏បង្ហូរឈាមក្នុងរយៈពេលប៉ុន្មានមកនេះ។ លោក Raj Shah បានប្រាប់អ្នកសារព័ត៌មានថា ក្រុមហាម៉ាស់ដែលអ្នកត្រួតត្រាតំបន់ហ្កាស្សា ត្រូវទទួលខុសត្រូវដោយផ្ទាល់លើការស្លាប់មនុស្សដ៏ច្រើននេះ និងចាត់ទុកទង្វើរបស់ទាហានអ៊ីស្រាអែល ជាការការពារខ្លួន។

មិនត្រឹមតែមិនអើពើការបង្ក្រាបនៅតំបន់ព្រំដែនហ្កាស្សាឡើយ អាមេរិកក៏រារាំងដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិថែមទៀត។ ក្នុងកិច្ចប្រជុំបន្ទាន់នៅឯញូវយ៉ក កូវ៉ែតដាក់ស្នើសេចក្ដីព្រាងដំណោះស្រាយមួយដែលចង់ឲ្យមានការស៊ើបអង្កេតដោយឯករាជ្យលើការប៉ះទង្គិចរវាងប្រជាជនប៉ាឡេស្ទីន និងទាហានអ៊ីស្រាអែល។ ក្រុមប្រឹក្សាសន្តិសុខក៏បង្ហាញក្ដីសោកសង្រេងចំពោះការបាត់បង់ជីវិតជនជាតិប៉ាឡេស្ទីនដែលបានអនុវត្តសិទ្ធិរបស់ខ្លួន។

ប្រទេសជាច្រើនបាននាំគ្នាប្រតិកម្មយ៉ាងខ្លាំងទៅនឹងសកម្មភាពរបស់កម្លាំងសន្តិសុខអ៊ីស្រាអែលលើបាតុករប៉ាឡេស្ទីន។ សម្ព័ន្ធអារ៉ាប់បានស្នើឲ្យពិភពលោកប្រឆាំងទង្វើអ៊ីស្រាអែល ខណៈអង្គការសហប្រជាជាតិទទូចឲ្យបញ្ឈប់ការបាញ់គ្រាប់ពិតដាក់បាតុករ។ អ៊ីរ៉ង់ និងលីបង់ ដែលមិនត្រូវគ្នាជាមួយអ៊ីស្រាអែលក៏បានរិះគន់អ៊ីស្រាអែលធ្ងន់ៗ និងនិយាយវាយប្រហារអាមេរិកផង។ សហភាពអឺរ៉ុប និងអាល្លឺម៉ង់បានស្នើឲ្យអ៊ីស្រាអែលគោរពគោលការណ៍ឆ្លើយតបឲ្យបានសមស្របទង្វើរបស់បាតុករ៕