ភាពយន្តមួយរបស់អាមេរិកស្តីពីសហគ្រិនវ័យក្មេង នឹងជួយភ្ជាប់ទំនាក់ទំនងរវាងផលិតករកម្ពុជា និងអាមេរិក

ជាតិ

សិល្បះ

សិល្បៈអន្តរជាតិ

ភាពយន្តមួយរបស់អាមេរិកស្តីពីសហគ្រិនវ័យក្មេង នឹងជួយភ្ជាប់ទំនាក់ទំនងរវាងផលិតករកម្ពុជា និងអាមេរិក

16, May 2018 , 8:20 am

រូបភាព

លោកស្រី Cheryl Miller Houser

ដោយ: ថ្មីៗ

ភ្នំពេញ៖ ស្ថានទូតអាមេរិកនៅកម្ពុជា នឹងរៀបចំកម្មវិធីបញ្ចាំងភាពយន្តឯកសារមួយ ស្តីពីសហគ្រិនវ័យក្មេង ដែលមានចំណងជើងថា «ក្រុមហ៊ុនកកើតថ្មីតាមជំនាន់» ឬ Generation Startup នៅថ្ងៃទី១៧ និងទី១៩ ខែឧសភានេះ ។ បើតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជាកម្មវិធីបញ្ចាំងភាពយន្តនេះ គឺដើម្បីបង្កើនការយល់គ្នារវាងសហរដ្ឋអាមេរិក និងកម្ពុជា ក្នុងការភ្ជាប់ទំនាក់ទំនងរវាងអ្នកឯកទេសភាពយន្តអាមេរិក និងយុវជន ក៏ដូចជាផលិតករភាពយន្តកម្ពុជា។

លោកស្រី Cheryl Miller Houser ផលិតករភាពយន្តអាមេរិក នឹងទស្សនកិច្ចកម្ពុជា នៅថ្ងៃទី ១៦ ដល់ថ្ងៃទី១៩ ខែឧសភា ដើម្បីបញ្ចាំងភាពយន្តឯកសារមួយស្តីពីសហគ្រិនវ័យក្មេង។ តាមប្រកាសព័ត៌មានរបស់ស្ថានទូតអាមេរិកប្រចាំកម្ពុជា ភាពយន្តនេះ មានចំណងជើងថា «ក្រុមហ៊ុនកកើតថ្មីតាមជំនាន់» ឬ Generation Startup ដែលនិយាយអំពីខ្សែភាពយន្តជួរមុខ នៃភាពជាសហគ្រិន នៅអាមេរិក ដោយបង្ហាញពីការតស៊ូ និងជោគជ័យរបស់និស្សិត ៦រូប ដែលទើបចប់មហាវិទ្យាល័យ ហើយហ៊ានប្រថុយបង្កើតក្រុមហ៊ុនមួយ នៅ Detroit។

ខ្សែភាពយន្តនេះ បានចំណាយពេលថតរយៈពេល១ឆ្នាំកន្លះ ដឹកនាំដោយលោកស្រី Cynthia Wede ដែលធ្លាប់ទទួលរង្វាន់ Academy Award និងផលិតករលោកស្រី Cheryl Miller Houser ហើយអបអរភាពចម្រុះគ្នា ធ្វើឲ្យតំបន់ទីក្រុងមានភាពរស់រវើកឡើង និងការហ៊ានប្រថុយ។

ប្រកាសព័ត៌មានដដែល បញ្ជាក់ថា កម្មវិធីបញ្ចាំងភាពយន្តអាមេរិកនេះ គឺដើម្បីបង្កើនការយល់គ្នារវាងសហរដ្ឋអាមេរិក និងកម្ពុជា ក្នុងការភ្ជាប់ទំនាក់ទំនងរវាងអ្នកឯកទេសភាពយន្តអាមេរិក និងយុវជន ក៏ដូចជាផលិតករភាពយន្តកម្ពុជា តាមរយៈការបញ្ចាំងភាពយន្ត, សិក្ខាសាលា និងការពិភាក្សាជាមួយក្រុមវាគ្មិន ស្តីពីប្រធានបទទាក់ទងនឹងភាពយន្ត សហគ្រិនភាព និងផ្តល់អំណាចដល់ស្រី្ត។

សូមជម្រាបថា ភាពយន្តនេះ នឹងត្រូវបញ្ចាំង២ថ្ងៃ នៅRaintree Cambodia នៅថ្ងៃទី១៧ ខែឧសភា ពីម៉ោង៦-៨យប់ និងថ្ងៃទី១៩ ខែឧសភា នៅ Major Cineplex ផ្សារសូរិយា ម៉ោង៥:៣០-៨យប់៕