អន្តរជាតិ
កូរ៉េខាងជើង ព្រមានលុបចោលជំនួបជាមួយ ត្រាំ ក្រោយលុបចោលជំនួបជាមួយកូរ៉េខាងត្បូង
× កូរ៉េខាងជើង នៅថ្ងៃទី១៦ ខែឧសភា បានបង្ហាញការខឹងសម្បារយ៉ាងខ្លាំងចំពោះសមយុទ្ធយោធាផ្លូវអាកាសរវាងអាមេរិក និងកូរ៉េខាងត្បូង។ ដោយចាត់ទុកសមយុទ្ធជាសកម្មភាពបង្ករឿង កូរ៉េខាងជើងបានសម្រេចចិត្តបានលុបចោលជំនួបចរចាជាមួយកូរ៉េខាងត្បូងដែលគ្រោងធ្វើនៅថ្ងៃទី១៦ នេះភ្លាមៗផង។ មិនត្រឹមលុបចោលការចរចាជាមួយកូរ៉េខាងត្បូងដោយឥតព្រៀងទុកឡើយ កូរ៉េខាងជើងក៏ព្រមានលុបចោលជំនួបជាមួយប្រធានាធបិតីអាមេរិក ដូណាល់ ត្រាំ ទៅទៀត។
ស្ថានភាពជុំវិញឧបទ្វីបកូរ៉េដែលកំពុងល្អូកល្អឺនកក់ក្ដៅ បែរទៅជាចុះត្រជាក់ទៅវិញ ហើយជំនួបលោក ដូណាល់ ត្រាំ និងលោក គីម ជុងអ៊ុន នៅថ្ងៃទី១២ ខែមិថុនា នៅឯសិង្ហបុរីក៏ស្ថិតក្នុងភាពមិនច្បាស់លាស់ទៅទៀត។ នៅថ្ងៃទី១៦ ខែឧសភា ទីភ្នាក់ងារព័ត៌មានកូរ៉េខាងជើង KCNA ផ្សាយថា កូរ៉េខាងជើងបានសម្រេចចិត្តផ្អាកជំនួបជាមួយកូរ៉េខាងត្បូងនៅតំបន់គ្មានកងទ័ព ដែលកូរ៉េខាងជើងខ្លួនឯងជាអ្នកស្នើទៅកាន់កូរ៉េខាងត្បូងកាលពីថ្ងៃទី១៥ ខែឧសភា។
មូលហេតុដែលធ្វើឲ្យកូរ៉េខាងជើងមិនសប្បាយចិត្តនោះ គឺគ្មានអ្វីក្រៅពីសមយុទ្ធដែនអាកាស Max Thunder រវាងយោធាកូរ៉េខាងត្បូង និងអាមេរិកឡើយ។ ប្រព័ន្ធផ្សព្វផ្សាយរដ្ឋកូរ៉េខាងជើងអះអាងថា សមយុទ្ធនេះជាការបង្កហេតុដ៏ឈ្លើយ ឃោរឃៅ ជាការធ្វើត្រាប់ដើម្បីឈ្លានពាន និងធ្វើឡើងចំពេលដែលទំនាក់ទំនងអន្តរកូរ៉េល្អប្រសើរ។ កូរ៉េខាងជើងក៏រំឭកដែរថា ការបង្ហាញឆន្ទៈ និងការផ្ដល់ឱកាស គឺមានកំណត់។
ក្រៅពីមិនពេញចិត្តសមយុទ្ធ ទីភ្នាក់ងារព័ត៌មានកូរ៉េខាងជើង KCNA ស្រង់សម្តីអនុរដ្ឋមន្ត្រីការបរទេសកូរ៉េខាងជើង Kim Kye-gwan មិនពេញចិត្តចំពោះការទាមទារឲ្យខ្លួនបោះបង់ចោលអាវុធនុយក្លេអ៊ែរជាឯកតោភាគីដែរ។
កូរ៉េខាងជើងទំនងជាចង់ប្រាប់អាមេរិក និងកូរ៉េខាងត្បូងថា ខ្លួនបានបង្ហាញឆន្ទៈល្អជាច្រើនលើក និងជួបចរចាជាបន្តបន្ទាប់ តែភាគីផ្សេងបែរជាមិនចាប់យកឱកាសល្អនេះទៅវិញ។ ក្រុងព្យុងយ៉ាងបានសម្រេចចិត្តផ្អាកសាកល្បងនុយក្លេអ៊ែរ និងមីស៊ីល ព្រមទាំងបានប្រកាសកម្ទេចទីតាំងសាកល្បងនុយក្លេអ៊ែរជាសាធារណៈផង។ នេះជាសម្បទានធំៗរបស់កូរ៉េខាងជើង ប៉ុន្តែអាមេរិកនៅមិនទាន់ឃើញមានការធ្វើសម្បទានណាមួយឡើយ។
តាមពិតទៅ សមយុទ្ធ Max Thunder ចាប់ផ្ដើមតាំងពីសប្ដាហ៍មុនមកម្ល៉េះ ដោយមានវត្តមានយន្តហោះចូលរួមប្រមាណ១០០គ្រឿងរួមមានបំបាំងកាយ F-22 និងយន្តហោះទម្លាក់គ្រាប់បែកB-52 ផង ។ ជាមួយនឹងការមិនពេញចិត្តចំពោះសមយុទ្ធយោធានេះ សារព័ត៌មានរដ្ឋកូរ៉េខាងជើង KCNA បានព្រមានទៅអាមេរិកថា៖ «អាមេរិកត្រូវតែគិតឲ្យបានពីរដងលើអនាគតនៃជំនួបមេដឹកនាំកូរ៉េខាងជើង និងអាមេរិក»។ នេះបើតាមការផ្សាយរបស់ទីភ្នាក់ងារព័ត៌មាន AFP ។
កូរ៉េខាងត្បូងបានបង្ហាញការសោកស្ដាយយ៉ាងខ្លាំងចំពោះការប្រកាសរបស់កូរ៉េខាងជើង។ ក្រសួងការបង្រួបបង្រួមកូរ៉េរបស់កូរ៉េខាងត្បូងនិយាយថា ការយកសមយុទ្ធអាមេរិក និងកូរ៉េខាងត្បូងធ្វើជាលេសមិនសមស្របស្មារតីជំនួបមេដឹកនាំអន្តរកូរ៉េឡើយ តែកូរ៉េខាងត្បូងនឹងនៅតែប្ដេជ្ញាចិត្តអនុវត្តតាមការឯកភាពរបស់មេដឹកនាំ។ ឯអាមេរិកប្រាប់កូរ៉េខាងជើងវិញថា លោក គីម ជុងអ៊ុនធ្លាប់បង្ហាញជំហរទទួយកសមយុទ្ធយោធាអាមេរិក និងកូរ៉េខាងត្បូងដែរ៕
Tag:
កូរ៉េខាងជើង
អាមេរិក
កូរ៉េខាងត្បូង
© រក្សាសិទ្ធិដោយ thmeythmey.com