សម្តេច ហ៊ុន សែន ហៅការអូសទាញពលរដ្ឋមិនឲ្យទៅបោះឆ្នោត ថាជាការបំផ្លាញប្រជាធិបតេយ្យ

ជាតិ

នយោបាយជាតិ

សម្តេច ហ៊ុន សែន ហៅការអូសទាញពលរដ្ឋមិនឲ្យទៅបោះឆ្នោត ថាជាការបំផ្លាញប្រជាធិបតេយ្យ

16, May 2018 , 10:15 am

រូបភាព

ដោយ: ថ្មីៗ

សម្តេចនាយករដ្ឋមន្ត្រី ហ៊ុន សែន បានចាត់ទុកក្រុមដែលព្យាយាយអំពាវនាវប្រជាពលរដ្ឋ កុំឲ្យទៅបោះឆ្នោត ថាជាក្រុមអគតិ ដែលមានបំណងបំផ្លាញឆន្ទៈប្រជាពលរដ្ឋ និងប្រជាធិបតេយ្យនៅកម្ពុជា។

តាមរយៈសារលើទំព័រហ្វេសប៊ុក នៅព្រឹកថ្ងៃទី១៦ ខែឧសភា ឆ្នាំ២០១៨នេះ ប្រមុខរដ្ឋាភិបាល និងជាប្រធានគណបក្សកាន់អំណាច បានសរសេរថា៖«គ្មានមេដឹកនាំណាមួយ ណែនាំពលរដ្ឋខ្លួនមិនឲ្យទៅបោះឆ្នោតទេ មានតែជនអគតិដែលមានបំណងបំផ្លិចបំផ្លាញលទ្ឋិប្រជាធិបតេយ្យ និងឆន្ទៈប្រជាពលរដ្ឋ ទើបពួកគេអាចធ្វើដូច្នេះ»។

សម្តេច ហ៊ុន សែន ឆ្លៀតលើកឡើងពីចំនួនប្រជាពលរដ្ឋនៅតាមបណ្តាខ្លះ ដែលទៅបោះឆ្នោត មកប្រៀបធៀបនឹងកម្ពុជា។ ប្រធានគណបក្សកាន់អំណាច អះអាងថា នៅសហគមន៍អឺរ៉ុប ចំនួនប្រជាពលរដ្ឋ ដែលទៅបោះឆ្នោត គឺក្នុងរង្វង់៣០ភាគរយ ក៏អាចទទួលយកបាន រីឯសហរដ្ឋអាមេរិក តែក្នុងរង្វង់៤០ភាគរយប៉ុណ្ណោះ។

ប្រមុខរដ្ឋាភិបាល បែរមកនិយាយពីកម្ពុជាថា នៅកម្ពុជា គឺមានពលរដ្ឋដល់ទៅជាង៦៩ភាគរយ ដែលទៅបោះឆ្នោត។ បន្ទាប់មក នាយករដ្ឋមន្ត្រីរូបនេះ បានអំពាវនាវឲ្យប្រជាពលរដ្ឋ ទៅចូលរួមបោះឆ្នោតសម្រាប់អាណត្តិថ្មី ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។

សម្តេច ហ៊ុន សែន ធ្លាប់ប្រកាសថាកន្លងមកថា ការអំពាវនាវមិនឲ្យប្រជាពលរដ្ឋទៅបោះឆ្នោត គឺខុសនឹងច្បាប់នៅកម្ពុជា។

លោក សម រង្ស៊ី និងក្រុមអ្នកប្រឆាំងនៅក្រៅប្រទេស បានអំពាវនាវកុំឲ្យប្រជាពលរដ្ឋទៅបោះឆ្នោត។ លោក សម រង្ស៊ី ហៅការបោះឆ្នោត ដែលគ្មានគណបក្សសង្គ្រោះជាតិ ថាជាការបោះឆ្នោតក្លែងក្លាយ ហើយមិនអាចយកជាការបាននោះទេ៕