ប្រមុខរដ្ឋាភិបាល៖ គ្រួសារល្អ គឺជាចំណែកដ៏សំខាន់ក្នុងការកសាងសីលធម៌សង្គម

ជាតិ

ប្រមុខរដ្ឋាភិបាល៖ គ្រួសារល្អ គឺជាចំណែកដ៏សំខាន់ក្នុងការកសាងសីលធម៌សង្គម

16, May 2018 , 10:39 pm

រូបភាព

ដោយ:

«គ្រួសារល្អមានតួនាទីសំខាន់ក្នុងការលើកកម្ពស់សីលធម៌សង្គម និងការអភិវឌ្ឍប្រទេសជាតិ»។ នេះជាប្រធានបទ នៃការប្រារព្ធទិវាអន្តរជាតិស្ដីពីគ្រួសារ ថ្ងៃទី១៥ ខែឧសភា ឆ្នាំ២០១៨។ សម្តេច ហ៊ុន សែន ប្រមុខរាជរដ្ឋាកម្ពុជា បានចេញសារលិខិតមួយ សម្រាប់ទិវានេះ។ សម្តេច លើកឡើងក្នុងសារលិខិតថា គ្រួសារ គឺជាកោសិកាមួយដ៏សំខាន់ ដែលដើរតួនាទីជាកម្លាំងចលករ ជំរុញការអភិវឌ្ឍសេដ្ឋកិច្ច សង្គម និងវប្បធម៌ ពិសេសការរក្សានូវសន្តិភាព និងជំរុញក្នុងការថែរក្សាតុល្យភាពសង្គម រួមទាំងស្ថិរភាពប្រទេសជាតិ។

ប្រមុខរដ្ឋាភិបាលកម្ពុជា មើលឃើញថា ក្រុមគ្រួសារទាំងឡាយ តែងតែពលិកម្ម និងលះបង់គ្រប់បែបយ៉ាងក្នុងការចិញ្ចឹមបីបាច់ថែរក្សាកូនចៅឲ្យក្លាយជាកូនល្អ សិស្សល្អ ពលរដ្ឋល្អ សម្រាប់គ្រួសារ សហគមន៍ និងសង្គមជាតិ ព្រមទាំងការចូលរួមចំណែកយ៉ាងសកម្មក្នុងការថែរក្សា និងលើកស្ទួយ សាសនា ប្រពៃណី ទំនៀមទម្លាប់ដ៏ល្អរបស់ប្រទេសជាតិ។ នាយករដ្ឋមន្ដ្រី បានបន្តថា ក្រុមគ្រួសារទាំងអស់ នឹងបន្តអនុវត្តប្រពៃណីដ៏ល្អផូរផង់ ដើម្បីចូលរួមចំណែកថែរក្សានិងកសាងសមិទ្ធផលនានាបន្ថែមទៀត សម្រាប់ឧត្តមភាពជាតិ សាសសនា ព្រះមហាក្សត្រ។

តាមរយៈសារលិខិត សម្តេច ហ៊ុន សែន លើកឡើងថា នៅក្នុងពិភពលោក ក៏ដូចជានៅក្នុងប្រទេសកម្ពុជា គ្រួសារជាតួអង្គមួយដ៏សំខាន់ និងចាំបាច់ ពីព្រោះវាជាកន្លែងដែលមនុស្សគ្រប់រូបបានចាប់កំណើតរីកធំធាត់ និងទទួលនូវការអប់រំ ភាពកក់ក្ដៅ និងសេចក្ដីស្រឡាញ់ជាប់ជាចាំបាច់។

«គ្រួសារ និងសហគមន៍នីមួយៗ ត្រូវបន្តពង្រឹងនូវស្មារតីសាមគ្គីភាពល្អ យកចិត្តទុកដាក់អប់រំសីលធម៌ និងប្រពៃណីទំនៀមទំម្លាប់ល្អ ហើយនិងការទទួលខុសត្រូវខ្ពស់ក្នុងសមាជិកគ្រួសាររបស់ខ្លួន តាមរយៈការផ្ដល់ការអប់រំ រៀនសូត្រ សីលធម៌ សុជីវធម៌ ចរិយាធម៌ ជំណេះដឹងទូទៅ និងជំនាញវិជ្ជាជីវៈផ្សេងៗ»។ នេះការអំពាវនាវរបស់ប្រមុខរដ្ឋាភិបាល ដោយជំរុញយ៉ាងដូច្នេះថា៖«ការពង្រឹង និងការអភិវឌ្ឍសមត្ថភាពធនធានមនុស្ស ក្នុងគ្រួសារប្រកបដោយភាពរឹងមាំសេចក្ដីថ្លៃថ្នូរ និងភាពសក្កិសិទ្ធ គឺអាចនាំឲ្យសង្គមជាតិមានភាពរុងរឿង ថ្កុំថ្កើន និងសុភមង្គល ហើយបន្តរួមចំណែកក្នុងការអភិវឌ្ឍប្រទេសជាតិឲ្យកាន់តែមានភាពត្រសុះត្រសាយឡើងនៅក្នុងឆាកជាតិ-អន្តរជាតិ»៕