អង្គការជំនាញមួយចំនួន ប្រកាសមិនចូលរួមសង្កេតការណ៍ ក្នុងការិយាល័យបោះឆ្នោត

ជាតិ

បោះឆ្នោត

អង្គការជំនាញមួយចំនួន ប្រកាសមិនចូលរួមសង្កេតការណ៍ ក្នុងការិយាល័យបោះឆ្នោត

17, May 2018 , 10:59 am

រូបភាព

ដោយ: ថ្មីៗ

គណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និចហ្វិច) សម្រេចមិនដាក់បញ្ជីឈ្មោះអ្នកសង្កេតការទៅកាន់គណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីចូលរួមសង្កេតការបោះឆ្នោតសម្រាប់នីតិកាលទី៦នេះឡើយ។ នេះជាការអះអាងរបស់លោក សំ គន្ធាមី នាយប្រតិបត្តិរបស់និចហ្វិច។

លោក សំ គន្ធាមី សន្និដ្ឋានថា នៅថ្ងៃបោះឆ្នោត និងថ្ងៃរាប់សន្លឹកឆ្នោតសម្រាប់នីតិកាលថ្មីនេះ នឹងប្រព្រឹត្តទៅដោយរលូត។ នេះជាមូលហេតុដែលលោក យល់ថា អង្គការរបស់លោក មិនចាំបាច់ចូលរួមសង្កេតការណ៍ នៅក្នុងការិយាល័យបោះឆ្នោត។

យ៉ាងណាក៏ដោយ លោក សំ គន្ធាមី អះអាងថា ទោះមិនចូលរួមសង្កេតការណ៍ក្នុងការិយាល័យពិតមែន ប៉ុន្តែអង្គការរបស់លោក នឹងចូលរួមសង្កេតការណ៍នៅក្រៅការិយាល័យបោះឆ្នោត។ អ្នកជំនាញខាងការបោះឆ្នោតរូបនេះ បញ្ជាក់យ៉ាងដូច្នេះថា៖«យើងចូលរួមសង្កេតការណ៍ក្រៅផ្លូវការ គឺយើង ដាក់អ្នកសង្កេតការណ៍នៅក្រៅការិយាល័យបោះឆ្នោត។ តែយើង អត់ចូលក្នុងការិយាល័យបោះឆ្នោតទេ»។

គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រេល) ក៏ចូលរួមសង្កេតការបោះឆ្នោត នៅក្រៅការិយាល័យដូចនិចហ្វិចដែរ។ នេះជាការបន្ថែមរបស់លោក សំ គន្ធាមី។ យ៉ាងក៏ដោយ លោក មិនបរិយាយច្រើននោះទេទាក់ទងនឹងខុមហ្វ្រេល ដោយលោកគ្រាន់តែបញ្ជាក់យ៉ាងខ្លីថា«ខុមហ្វ្រេល ក៏មានគំនិតស្រដៀងគ្នាអ៊ីចឹងដែរ»។
សារព័ត៌មានថ្មីៗ មិនអាចសុំការបញ្ជាក់ពីលោក គល់ បញ្ញា នាយកប្រតិបត្តិរបស់ខុមហ្វ្រេលបានទេ ដោយសារតែហៅទូរសព្ទមិនចូល។

សូមបញ្ជាក់ថា ក្រៅពីគណបក្សសង្គ្រោះជាតិ មានគណបក្សដល់ទៅ២០ឯណោះ ដែលបានដាក់ពាក្យទៅកាន់គ.ជ.ប. ដើម្បីចូលរួមប្រកួតប្រជែងក្នុងការបោះឆ្នោត នៅថ្ងៃទី២៩ ខែកក្កដា ឆ្នាំ២០១៨៕