តំណាងរាស្ត្រអាមេរិកដើមកំណើតខ្មែរ រងការចោទប្រកាន់ថា បានច្របាច់ក គូប្រជែងខ្លួន

ជាតិ

តំណាងរាស្ត្រអាមេរិកដើមកំណើតខ្មែរ រងការចោទប្រកាន់ថា បានច្របាច់ក គូប្រជែងខ្លួន

18, May 2018 , 9:59 am

រូបភាព

លោក មុំ រ៉ាឌី (ឆ្វេង) និងលោក មាស សំ

ដោយ: ថ្មីៗ

លោក មុំ រ៉ាឌី តំណាងរាស្ត្រអាមេរិកដើមកំណើតខ្មែរ ប្រចាំក្រុង Lowell រដ្ឋ Massachusetts សហរដ្ឋអាមេរិក រងការចោទប្រកាន់ថា បានច្របាច់ក លោក មាស សំ អតីតទីប្រឹក្សាម្នាក់របស់ខ្លួន ដែលក្រោយមក ក្លាយជាគូប្រជែងនយោបាយ។ នេះបើតាមការផ្សាយរបស់ WCVB-TV។

ភាគីទាំងពីរដែលសុទ្ធតែមានដើមកំណើតខ្មែរ ត្រូវបានហៅតទល់គ្នាក្នុងសវនាការមួយ កាលពីថ្ងៃព្រហស្បតិ័ ទី១៦ ខែឧសភា។ លោក មាស សំ ដែលជាដើមបណ្តឹងបានអះអាងថា រឿងរ៉ាវបានកើតឡើងកាលពីថ្ងៃទី៥ ខែឧសភា នៅភោជនីយដ្ឋានមួយនៅក្រុង Lowell ហើយលោកបានរាយការណ៍ទៅប៉ូលិសនា៣ថ្ងៃបន្ទាប់។

«គាត់ចាប់ដៃខ្ញុំ ច្របាច់កខ្ញុំ ទាញអាវខ្ញុំចុះ និងដាល់ទ្រូងខ្ញុំ»។ នេះបើតាមការអះអាងរបស់លោក មាស សំ ទៅកាន់លោកចៅក្រម David Frank។ ប៉ុន្តែលោក មុំ រ៉ាឌី បានបដិសេធចំពោះការចោទប្រកាន់។

លោក មាស សំ បានព្រួយបារម្ភពីសុវត្ថិភាពរបស់ខ្លួន ពីព្រោះលោក មុំ រ៉ាឌី ចេះក្បាច់គុន ហើយថែមមានកាំភ្លើងដែលទទួលបានលិខិតអនុញ្ញាតត្រឹមត្រូវ។

លោកចៅក្រមបដិសេធចេញបញ្ជាការពារ (Protective Order) ប៉ុន្តែសំណុំរឿងព្រហ្មទណ្ឌនឹងមិនបញ្ចប់ឡើយ៕