អន្តរជាតិ
ចរចាពាណិជ្ជកម្ម៖ ចិនថយមួយជំហាន តែលោក ត្រាំ នៅតែមិនទាន់សប្បាយចិត្ត ប្រធានាធិបតីអាមេរិក ដូណាល់ ត្រាំ ចាប់ដៃឧបនាយករដ្ឋមន្រ្តីចិន លីវ ហឺ នៅសេតវិមាន (រូបភាព South China Morning Post)
× នៅថ្ងៃទី១៨ ខែឧសភា មន្ត្រីអាមេរិក និងចិន កំពុងចរចាគ្នាដើម្បីដោះស្រាយការខ្វែងគំនិតគ្នាក្នុងសំណុំរឿងពាណិជ្ជកម្ម ដែលសឹងផ្ទុះទៅជាសង្គ្រាមពាណិជ្ជកម្មពេញបន្ទុកទៅហើយនោះ។ ខណៈការចរចានៅប៉េកាំងមិនមានលទ្ធផលនោះ ការជជែកនៅវ៉ាស៊ីនតោនលើកនេះហាក់ទទួលបានពន្លឺខ្លះ ដោយមន្ត្រីអាមេរិកនិយាយថា ចិនបានយល់ព្រមធ្វើសម្បទានខ្លះតាមការទាមទាររបស់ខ្លួន។ ប៉ុន្តែលោក ដូណាល់ ត្រាំ នៅតែមិនទាន់សប្បាយចិត្តលើអ្វីដែលលោកចាត់ទុកជាការរកស៊ីចំណេញតែម្ខាងដដែល។
បន្ទាប់ពីចរចាពេញមួយថ្ងៃទី១៧ ខែឧសភារួចមក មន្ត្រីអាមេរិក និងចិននឹងបន្តចរចាគ្នាថែមទៀតនៅថ្ងៃទី១៨ ខែឧសភា ដើម្បីបញ្ចប់ការទាស់ទែងគ្នាក្នុងវិស័យពាណិជ្ជកម្ម។ កន្លងមក ការចរចាជាច្រើនលើកទាំងនៅទឹកដីចិន និងនៅអាមេរិកក្ដី មិនសូវបានផលអ្វីឡើយ ដ្បិតភាគីទាំងសងខាងប្រកាន់ជំហររឹងត្អឹងដាក់គ្នាទៅវិញទៅមកដើម្បីការពារប្រយោជន៍ផ្ទាល់ខ្លួន។ យ៉ាងណាមិញ ការចរចាលើកនេះហាក់ទទួលបានផ្លែផ្កាខ្លះ។
អ្វីគួរឲ្យកត់សម្គាល់នោះ ទីប្រឹក្សាពាណិជ្ជកម្មសេតវិមាន Peter Navarro មិនមានឈ្មោះក្នុងជំនួបចរចារវាងប្រតិភូចិនដឹកនាំឧបនាយករដ្ឋមន្ត្រី លីវ ហឺ និងប្រតិភូអាមេរិដឹកនាំដោយរដ្ឋមន្ត្រីរតនាគារ Steven Mnuchin ឡើយ។ បើតាមទីភ្នាក់ព័ត៌មាន AFP លោក Navarro មានជំហរដាច់ខាតក្នុងការចរចាជាមួយចិន ជាពិសេសកាលពីការជជែកនៅទីក្រុងប៉េកាំងកាលពីពីរសប្ដាហ៍មុន ហើយលោកក៏មិនត្រូវគ្នាជាមួយលោក Mnuchin ដែលមានជំហរទន់ភ្លន់ជាងទៅទៀត។
សម្រាប់ការចរចាថ្ងៃទីមួយ សេតវិមាននិយាយថា មន្ត្រីអាមេរិកបានប្រាប់សមភាគីចិនពីជំហររបស់លោក ដូណាល់ ត្រាំ ដែលចង់បានទំនាក់ទំនងពាណិជ្ជកម្មដែលយុត្តិធម៌។ ក្នុងទស្សនកិច្ចលើកនេះលោក លីវ ក៏បានជួបលោក ត្រាំ ដែរ ហើយក៏បានប្រាប់ប្រធានាធិបតីអាមេរិកថា ប្រទេសទាំងពីរត្រូវដោះស្រាយបញ្ហាពាណិជ្ជកម្មតាមមធ្យោបាយស្មើភាព និងផ្ដល់ប្រយោជន៍ឲ្យភាគីទាំងសងខាង។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។
១. ចិនថយមួយជំហាន
ក្នុងការចរចានៅថ្ងៃទី១៧ ខែឧសភា ចិនបានបង្ហាញជំហរអនុវត្តតាមការទាមទាររបស់អាមេរិកដែលចង់បានការកាត់បន្ថយទំហំឱនភាពពាណិជ្ជកម្មដែលផ្អៀងទៅខាងអាមរិក។ ចិនបានស្នើកាត់បន្ថយទំហំពាណិជ្ជកម្មលើស មានចំនួន ២០០ពាន់លានដុល្លារក្នុងមួយឆ្នាំតាមរយៈការផ្ដល់កញ្ចប់សម្បទានពាណិជ្ជកម្ម និងការបង្កើនការទិញទំនិញរបស់អាមេរិក។ កាលពីឆ្នាំ២០១៧ ឱនភាពពាណិជ្ជកម្មរបស់អាមេរិកក្នុងការរកស៊ីជាមួយចិនមានដល់ទៅ ៣៧៥ ពាន់លានដុល្លារឯណោះ។
យោងតាមទីភ្នាក់ងារព័ត៌មាន Reuters ដែលស្រង់សម្ដីមន្ត្រីពាក់ព័ន្ធជំនួបនេះ កញ្ចប់សម្បទានរបស់ចិននឹងបញ្ចូលការលុបចោលការយកពន្ធដែលត្រូវបានអនុវត្តក្នុងទំហំទឹកប្រាក់ប្រហែល៤ពាន់លានដុល្លារលើផលិតផលអាមេរិកដូចជាផ្លែឈើ សាច់ជ្រូក និងស្រាក្រហមជាដើម។ បើលោក ត្រាំ ទទួលយកសំណើរបស់ចិន ក្រុមហ៊ុនផលិតយន្តហោះ Boeing នឹងក្លាយជាអ្នកទទួលបានប្រយោជន៍ច្រើនជាងគេបំផុត ព្រោះនាំចូលយន្តហោះរាប់សិបគ្រឿងទីផ្សារចិន។
យ៉ាងណាមិញ ការកាត់បន្ថយឱនភាពពាណិជ្ជកម្មដល់ទៅ២០០ពាន់លានដុល្លាមិនមែនជារឿងធម្មតាឡើយ ព្រោះវានឹងនាំដល់ការផ្លាស់ប្ដូរដ៏ធំមួយក្នុងទំនាក់ទំនងពាណិជ្ជកម្មរបស់មហាអំណាចសេដ្ឋកិច្ចទាំងពីរ។ ជាមួយនឹងការធ្វើសម្បទានរបស់ចិន មន្ត្រីអាមេរិកមិនអាចផ្ដល់ព័ត៌មានពីការទាមទាររបស់ចិនឡើយ ប៉ុន្តែសារព័ត៌មានអាមេរិកផ្សាយថា ក្រុងប៉េកាំងទំនងចង់ឲ្យវ៉ាស៊ីនតោនបញ្ឈប់ការគំរាមដាក់ពន្ធលើទំនិញអាមេរិក និងអនុញ្ញាតឲ្យក្រុមហ៊ុនចិនរកស៊ីនៅអាមេរិកដោយគ្មានការរឹតត្បិតជាដើម។
២. ត្រាំ នៅតែមិនទាន់ពេញចិត្ត
នៅមុនជំនួបជាមួយលោក លីវ ហឺ មន្ត្រីជំនិតផ្នែកសេដ្ឋកិច្ចរបស់លោក ស៊ី ជិនភីង នៅសេតវិមាន លោក ត្រាំ ក៏បានរិះគន់ចិនចំពោះការកេងចំណេញលើអាមេរិកនាពេលកន្លងមក ហើយលោកមិនទាន់ជឿថា ការចរចានៅវ៉ាស៊ីនតោនពេលនេះអាចទទួលបានជោគជ័យឬយ៉ាងណាដែរ។ លោក ត្រាំ និយាយថា ចិនក្លាយជាទៅជាប្រទសទំយើទៅហើយ ព្រោះតែងតែទទួលបានរាល់អ្វីៗទាំងអស់ដែលខ្លួនបានទាមទារពីអាមេរិក។
ដោយរិះគន់រដ្ឋបាលអាមេរិកមុនៗ លោក ត្រាំ អះអាងថា អាមេរិកត្រូវបានចិនហែកជាចម្រៀក ហើយចិនបានស្ថាបនាខ្លួនឯងដោយប្រើប្រាស់លុយអាមេរិក។ លោកចាត់ទុកពាណិជ្ជកម្មទ្វេភាគីជាមួយចិន គឺជាផ្លូវឯកទិស ដែលចិនជាអ្នកចំណេញរហូត។ ជាមួយនឹងការមិនពេញ លោក ត្រាំ ក៏មិននៅស្ងៀមដែរ ដោយបានចាត់វិធានការឆ្លើយតបជាច្រើន និងទាមទារឲ្យចិនអនុវត្តគោលការណ៍ពាណិជ្ជកម្មឲ្យត្រឹមត្រូវ និងស្មើភាពផង។
កន្លងទៅ រដ្ឋបាលលោក ត្រាំ បានប្រកាសដាក់ពន្ធ ២៥ភាគរយលើទំនិញរបស់ចិនដែលមានតម្លៃដល់ទៅ១៥០ពាន់លានដុល្លារ។ ជាការឆ្លើយតប ចិនក៏បានដាក់ពន្ធទំហំ៥០ពាន់លានដុល្លារលើផលិតផលអាមេរិកវិញ។ នេះគ្រាន់តែចំណែកតូចនៃការខ្វែងគំនិតគ្នារវាងមហាអំណាចទាំងពីរ និងជាឥទ្ធិពលនៃវិធានការរួមរបស់អាមេរិកក្នុងការប្រមូលផលប្រយោជន៍អាមេរិកឡើងវិញប៉ុណ្ណោះ។ មិនត្រឹមតែចិនឡើយ សម្ព័ន្ធមិត្តអាមេរិកផ្សេងទៀតក៏ចៀសមិនរួចពីនយោបាយរបស់លោក ត្រាំ ដែរ៕
Tag:
ចិន
អាមេរិក
ដូណាល់ ត្រាំ
លីវ ហឺ
ពាណិជ្ជកម្ម
© រក្សាសិទ្ធិដោយ thmeythmey.com