ជាតិ
អាជ្ញាធរជាតិអប្សរា និងសារមន្ទីររដ្ឋធានីរបស់ចិន ចុះអនុស្សរណៈយោគយល់គ្នាលើវិស័យសារមន្ទីរ
× សៀមរាប៖ នៅស្នាក់ការអាជ្ញាធរជាតិអប្សរា នៅរសៀលថ្ងៃទី១៨ ឧសភា បានរៀបចំពិធីចុះអនុស្សរណៈយោគយល់គ្នារវាងអាជ្ញាធរជាតិអប្សរា និងសារមន្ទីររដ្ឋធានីរបស់ចិន ដើម្បីធ្វើការរួមគ្នាលើវិស័យសារមន្ទីរ។ គោលបំណងនៃអនុស្សរណៈនេះក៏មានបំណងដើម្បីផ្លាស់ប្ដូរការតាំងពិព័រណ៌ ការស្រាវជ្រាវ និងបណ្ដុះបណ្តាលបុគ្កលិកសារមន្ទីរផងដែរ។
ពិធីចុះអនុស្សរណៈយោគយល់ត្រូវបានធ្វើឡើងដោយអគ្គនាយកអាជ្ញាធរជាតិអប្សរា ឯកឧត្តមបណ្ឌិត ស៊ុំ ម៉ាប់ និងប្រធានសារមន្ទីររដ្ឋធានី លោក HAN Zhanming។ ខ្លឹមសារពិស្ដារពីបំណងនៃពិធីចុះអនុស្សរណៈយោគយល់រវាងស្ថាប័នទាំងពីរ រួមមាន បង្កើតការផ្លាស់ប្ដូរការសិក្សាស្រាវជ្រាវផ្តោតលើសមុច្ច័យរបស់សារមន្ទីរទាំងពីរ បង្កើតការផ្លាស់ប្ដូរស្ដពីការតាំងពិព័រណ៍ និងសហការអភិរក្សរួមគ្នារវាងភាគីទាំងពីរ បង្កើតការផ្លាស់ប្ដូរបុគ្គលិកសារមន្ទីរ និងអ្នកជំនាញ និងអញ្ជើញបុគ្គលិកសារមន្ទីរចូលរួមក្នុងសន្និសីទ និងសកម្មភាពផ្សេងៗទៀត។
អនុស្សរណៈនេះដែរ ធ្វើឡើងស្របពេលដែលពិភពលោកកំពុងអបអរទិវាសារមន្ទីរអន្ដរជាតិ ១៨ ឧសភា ដែលក្នុងនោះកម្ពុជាក៏ប្រារព្ធទិវានេះ។ ទិវាសារមន្ទីរអន្តរជាតិនៅឆ្នាំនេះ ធ្វើឡើងក្រោមប្រធានបទ «សារមន្ទីរដែលមានទំនាក់ទំនងយ៉ាងជិតស្និទ្ធ វិធីសាស្ត្រថ្មី សាធារណជនថ្មី (Hyperconnected Museums New approaches, new publics)»។
នេះជាលើកទី២ហើយ ដែលអាជ្ញាធរជាតិអប្សរា បានចុះអនុស្សរណៈយោគយល់ជាមួយភាគីចិន ទាក់ទងនឹងវិស័យសារមន្ទីរ។
គួរបញ្ជាក់ថា សារមន្ទីរដែលគ្រប់គ្រងដោយអាជ្ញាធរជាតិអប្សរាមានចំនួន៤ រួមមាន សារមន្ទីរព្រះនរោត្តម សីហនុ-អង្គរ សារមន្ទីរវាយនភណ្ឌអាស៊ី សារមន្ទីរសព្វទស្សអង្គរ និងសារមន្ទីរកុលាលភាជន៍ភូមិតានី៕
© រក្សាសិទ្ធិដោយ thmeythmey.com