កីឡាជាតិ
ជាតិ
លោក កែវ រ៉េមី ជឿថា តេក្វាន់ដូ ITF នឹងឈ្នះមេដាយច្រើន ប្រសិនមានមុខនៅស៊ីហ្គេម
×![]()
លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា បានបង្ហាញជំនឿយ៉ាងមុតមាំថា បើមានវត្តមានកីឡាតេក្វាន់ដូ ITF ក្នុងព្រឹត្តិការណ៍កីឡាស៊ីហ្គេមលើកទី៣២ ពេលកម្ពុជាធ្វើជាម្ចាស់ផ្ទះ ទង់ជាតិកម្ពុជាអាចត្រូវបានបង្ហូតឡើងញឹកញាប់។ ការអះអាងបែបនេះ ក្រោយក្រុមអត្តពលិកតេក្វាន់ដូ ITF ទទួលបានជោគជ័យយ៉ាងធំធេង សម្រាប់ការចូលរួមប្រកួតជើងឯកអាស៊ីលើកទី៩នៅប្រទេសម៉ុងហ្គោលី ដែលបានបញ្ចប់កាលពីថ្ងៃទី១៣ ឧសភា ឆ្នាំ២០១៨។
«បើមានតេក្វាន់ដូ ITF ក្នុងស៊ីហ្គេមឆ្នាំ២០២៣ ខ្ញុំជឿថា នឹងមានការបង្ហូតទង់ជាតិញឹកញាប់ »។ នេះជាការអះអាងរបស់លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា ក្នុងពិធីដែលលោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡាជួបសំណេះសំណាលជាមួយប្រតិភូ និងម្ចាស់ជ័យលាភីជើងឯកអាស៊ីពីម៉ុងហ្គោលី។
កត្តាដែលធ្វើឲ្យថ្នាក់ដឹកនាំសហព័ន្ធមានជំនឿយ៉ាងមុតមាំបែបនេះ ព្រោះតេក្វាន់ដូ ITF ធ្លាប់រៀបចំការប្រកួតជើងឯកអាស៊ីអាគ្នេយ៍លក្ខណៈមិត្តភាពម្តងរួចមកហើយកាលពីខែធ្នូ ឆ្នាំ២០១៦ កន្លងទៅ ដោយកាលនោះ អត្តពលិកកម្ពុជាគ្រងមេដាយមាសស្ទើរគ្រប់វិញ្ញាសា។ អ្វីដែលធ្វើឲ្យប្រធានសហព័ន្ធរូបនេះ កាន់តែមានជំនឿចិត្តនោះ គឺកាលពីថ្មីៗ ក្រុមអត្តពលិកតេក្វាន់ដូ ITF កម្ពុជាបានសាងភាពល្បីរន្ទឺនៅលើឆាកអន្តរជាតិ តាមរយៈការឈ្នះមេដាយមាស៨ ប្រាក់៥ និងសំរឹទ្ធ៨ ពីជើងឯកអាស៊ីនៅម៉ុងហ្គោលី។
តែយ៉ាងណា ថ្នាក់ដឹកនាំកីឡាទាំងពីរកម្ពុជារួមមានក្រសួងអប់រំយុវជននិងកីឡា និងគណៈកម្មាធិការជាតិអូឡាំពិកកម្ពុជាមិនទាន់សម្រេចដាក់ប្រភេទកីឡាមិនអូឡាំពិកមួយនេះក្នុងប្រកួតដ៏ធំប្រចាំតំបន់អាស៊ាននៅឡើយទេ។ យ៉ាងណាមិញ លោក កែវ រ៉េមី ប្រធានសហព័ន្ធកីឡាតេក្វាន់ដូ ITF អាស៊ានបានអះអាថា មានប្រទេសជាច្រើនក្នុងតំបន់អាស៊ានរួមមានឥណ្ឌូណេស៊ី ហ្វីលីពីន ថៃ សិង្ហបុរី ម៉ាឡេស៊ី និងវៀតណាមរួមទាំងកម្ពុជា នឹងស្នើដាក់កីឡានេះក្នុងព្រឹត្តិការណ៍កីឡាស៊ីហ្គេមនាពេលដ៏ខ្លីខាងមុខ។
ក្រៅពីកាន់តួនាទីជាប្រធានសហព័ន្ធនៅកម្ពុជា និងអាស៊ាន កាលពីពេលថ្មីៗ លោក កែវ រ៉េមី ត្រូវបានសហព័ន្ធកីឡាតេក្វាន់ដូ ITF អាស៊ីជ្រើសតាំងជាសមាជិតប្រតិបត្តិថែមទៀតផង៕
Tag:
កែវ រ៉េមី
តេក្វាន់ដូ ITF
© រក្សាសិទ្ធិដោយ thmeythmey.com
