ជាតិ
សេដ្ឋកិច្ច
×![]()
សៀមរាប៖ ក្រុមអាជីវករលក់នៅលើផ្លូវ៦០ម៉ែត្រ ឬតំបន់អង្គរឃ្យុងយូ បានរអ៊ូរទាំ ជុំវិញការលក់ដូររបស់ពួកគេ ខណៈរដូវវស្សានេះ ការលក់ដូរហាក់មិនសូវជាប់លាប់សោះ។ ពេលមានខ្យល់ និងភ្លៀងម្ដងៗ ធ្វើឱ្យក្រុមអាជីវករ ដែលកំពុងលក់នៅលើផ្លូវ៦០ម៉ែត្រមានការលំបាក ដោយត្រូវរួសរាន់រើអីវ៉ាន់ ដើម្បីកឲ្យភ្លៀងទទឹក។
ប្រជាពលរដ្ឋរស់នៅខេត្តសៀមរាប ឬអ្នកមកពីចម្ងាយខ្លះ អាចនឹងស្គាល់ច្បាស់ផ្សារ៦០ម៉ែត្រ ឬខ្លះនិយមហៅផ្សារឃ្យុងយូ។ ផ្សារនេះ ដើមឡើយគ្រាន់តែមានការលក់នៅតាមរទេះចល័តតូចៗ ហើយមានអ្នកលក់មិនសូវច្រើនទេ។
ដោយសារកំណើនសំណង់អគារ និងផ្ទះរបស់ប្រជាពលរដ្ឋ ធ្វើឲ្យផ្លូវ៦០ម៉ែត្រប្រែពីផ្លូវស្ងាត់ មកជាមានចរាចរណ៍មមាញឹក ទាំងយប់ទាំងថ្ងៃ។ កំណើននៃការលក់ដូរនៅទីនេះ ក៏មានការកើនឡើងយ៉ាងឆាប់រហ័សផងដែរ។ ក្រោយមក ទីនេះក៏បានក្លាយជាផ្សាររាត្រីមួយដ៏ពេញនិយម សម្រាប់ពលរដ្ឋខេត្តសៀមរាប និងភ្ញៀវទេសចរ។
បើកលក់ជារៀងរាល់ពេលរសៀល ដល់យប់ជ្រៅ ផ្សារ៦០ម៉ែត្រ បានទាក់ទាញភ្ញៀវចម្រុះ ទាំងខ្មែរ និងបរទេស។ ទំនិញដែលមានលក់នៅផ្សារនេះ រួមមានសម្លៀកបំពាក់ ខោអាវ កាបូប គ្រឿងសំអាង អាហារផ្សេងៗ ពិសេសគឺសង្វាក់ បាញ់ឆែវ នំគ្រក់ ដែលជាអាហារដ៏ពេញនិយមនៅទីនេះ។
យ៉ាងណាក៏ដោយ នៅរដូវវស្សានេះមិនបានបង្កភាពងាយស្រួល ដល់ការលក់ដូរនៅផ្សារ៦០ម៉ែត្រ ដែលគ្មានដំបូលនោះឡើយ។ ខែវស្សានេះ គឺខ្សត់ទាំងអ្នកលក់ និងអ្នកទិញ។ អាជីវករខ្លះ ប្រឹងដំឡើងតូបលក់ ទោះដឹងថាវាអាចរំខានដោយភ្លៀង និងខ្យល់យ៉ាងណាក្ដី។ ខ្លះទៀត ក៏មិនបានស៊ូទ្រាំ ចំពោះបាតុភូតធម្មជាតិនេះដែរ។
អាជីវករលក់ខោអាវកីឡា លោក ទើ បានចាប់លក់ដូរនៅផ្សារ៦០ម៉ែត្រ រយៈពេលឆ្នាំមកហើយ។ តូបរបស់លោក ទើ មានទំហំ៦ម៉ែត្រ ដូច្នេះលោកត្រូវប្រើពេលកន្លះម៉ោង សម្រាប់ដំឡើងតូប និងកន្លះម៉ោង នៅពេលរើតូបវិញ។ លោកលើកឡើងថា លោកចាប់ផ្តើមលក់ពីម៉ោង ២រសៀល ទៅម៉ោង១០យប់ ហើយសម្រាប់ខែវស្សានេះ ការលក់ដូររបស់លោក មិនសូវកាក់កបទេ គឺថ្ងៃខ្លះត្រូវទឹកភ្លៀងសើម ក៏មានប្រសិនណារើមិនទាន់នោះ។
ស្រដៀងគ្នានេះ លោក ភិរុណ អាជីវករលក់កាបូបនោះវិញ ក៏បង្ហាញអារម្មណ៍លំបាកផងដែរ ជាមួយនឹងការលក់ដូរក្នុងរដូវវស្សា នៅលើផ្សារដែលគ្មានដំបូលនេះ។ លោក ភិរុណថា ការលក់ដូររបស់លោក ត្រូវមើលមេឃ ថ្ងៃណាដែលមេឃមិនសូវល្អ នោះលោកមិនបើកលក់ទេ។
យ៉ាងណាក៏ដោយ ភ្លៀងមិនមែនជាឧបសគ្គនៃការលក់ដូរ របស់ក្រុមអាជីវករទាំងនេះឡើយ។ ហេតុផលព្រោះថា សកម្មភាពលក់ដូរនៅផ្លូវ៦០ម៉ែត្រ នៅតែមមាញឹកគួរសម ទើបបង្ខំឱ្យអ្នកលក់ មិនដាច់ចិត្តចោលអតិថិជនរបស់ខ្លួនបែបនេះ។ លោក ទើ បានឱ្យដឹងថា៖« ពិបាកមែន តែទីនេះលក់ដាច់ជាងទីផ្សារផ្សេងៗ ព្រោះសម្បូរមនុស្សដើរច្រើន។ ក្នុងថ្ងៃខ្លះ ខ្ញុំអាចលក់បាន ១៥០ ទៅ២០០ដុល្លារ នេះសម្រាប់ថ្ងៃបុណ្យទាន។ ឯថ្ងៃធម្មតាបាន ១០ម៉ឺន ១៥ម៉ឺន មិនទៀង»។
ចំណែកលោក ភិរុណ វិញ ក៏បានលើកឡើងស្រដៀងគ្នានេះថា៖« ពេលភ្លៀងមក យើងប្រញាប់គ្របភ្លាម ខ្លះសើមដែរ បើគ្របអត់ទាន់។ នៅទីនេះលក់ដាច់តាមពេល ដូចបុណ្យទាន លក់ដាច់កាបូបដាក់ខោអាវ។ ពេលជិតចូលរៀន លក់ដាច់កាបូបសាលាកូនក្មេងទៅ»។
ជាមួយនឹងវត្តមានសារមន្ទីរសព្វទស្សអង្គរ និងគ្រឹះស្ថានអង្គរ បានធ្វើឱ្យផ្សារផ្លូវ៦០ម៉ែត្រ កាន់តែមានសភាពអ៊ូអរ។ រៀងរាល់ពេលរសៀល ចាប់ពីម៉ោង ៤តទៅ គេសង្កេតឃើញមានភ្ញៀវទេសចរដែលភាគច្រើនជាជនជាតិចិន បានចំណាយពេលវេលាដើរទស្សនា និងទិញរបស់របរនៅផ្សារនេះ ពិសេសនោះ គឺពួកគេចូលចិត្តទិញផ្លែឈើ និងនំចំណីអាហារ៕
Tag:
ផ្សារ៦០ម៉ែត្រ
លក់ដូរ
អាជីវករ
សៀមរាប
© រក្សាសិទ្ធិដោយ thmeythmey.com
