កីឡាអន្តរជាតិ
អន្តរជាតិ
Buffon ចាកចេញពី Juventus ដែលបានប្រកបអាជីព១៧ឆ្នាំ ទាំងខ្សឹកខ្សួល Buffon ថើបពាន Serie A ដែលខ្លួនទទួលបានជាលើកទី៩ជាមួយ Juventus។ រូបថត AFP
× Gianluigi Buffon បានបញ្ចប់អាជីពរយៈពេល១៧ឆ្នាំជាមួយក្លិប Juventus បន្ទាប់ពីក្លិបសេះបង្កង់លើកពាន Serie A ៧ឆ្នាំជាប់ៗគ្នា។ អ្នកចាំទីវ័យ៤០ឆ្នាំរូបនេះ បានបង្ហាញខ្លួនចុងក្រោយនាជ័យជម្នះ ២-១ លើក្រុម Verona។
Buffon ប្តូរចេញបន្ទាប់ពីបានលេងអស់រយៈពេល១ម៉ោង។ គេបានដើរលាមិត្តរួមក្រុមទាំងអស់របស់ខ្លួនជាមួយនឹងទឹកភ្នែករលីងរលោង។ ក្រុមអ្នកគាំទ្រ ក៏បាននាំគ្នាសម្តែងការអបអរសាទរ លាយឡំជាមួយនឹងភាពខ្សឹកខ្សួលផងដែរ។
Buffon បានចូលរួមជាមួយ Juventus ក្រោយផ្ទេរពី Parma ក្នុងឆ្នាំ២០០១ ក្នុងតម្លៃ ២២.៣លានផោន។ ជាមួយសេះបង្កង់ គាត់បានឈ្នះជើងឯកអ៊ីតាលី៩លើក និងឈ្នះជើងឯកក្របខណ្ឌលំដាប់ទីពីរ Serie B មួយលើក។
កាលពីរដូវកាលឆ្នាំ២០០៤-០៥ និង២០០៥-០៦ Juventus ត្រូវបានពិន័យ ហើយទម្លាក់ឲ្យទៅលេខក្របខណ្ឌទីពីរ ដោយសារជាប់ចោទពីបទកំណត់លទ្ធផលទុកមុន។ ប៉ុន្តែមួយឆ្នាំក្រោយ ក្លិបមួយបានឈ្នះជើងឯក ហើយឡើងទៅលេខនៅក្របខណ្ឌកំពូលវិញ។
១៧ឆ្នាំជាមួយ Juventus អ្នកចាំទី Buffon រកបានកំណត់ត្រា និងទទួលពានរង្វាន់ជាច្រើន។ ក្នុងអាជីពរបស់ខ្លួន Buffon ឈ្នះពានសរុប២៣ ក្នុងនោះ Serie A ៩, Serie B ១, Coppa Italia ៥, Supercoppa Italiana ៦, UEFA Cup ១ និង FIFA World Cup ១ ។
Buffon ក៏ទទួលបានកំណត់ត្រាជាអ្នកចាំទីដែលសម្រេចបានបាន Clean Sheets (រារាំងមិនឲ្យមានការស៊ុតបាល់បញ្ចូលទី) ច្រើនជាងគេនៅ Serie A និងក្រុមជម្រើសជាតិអ៊ីតាលី។ កីឡាកររូបនេះ ស្ថិតក្នុងចំណោមកីឡាករតែ៥នាក់ប៉ុណ្ណោះ ដែលអាចបង្ហាញខ្លួនរហូតដល់ទៅប្រមាណ១០០០ប្រកួតក្នុងក្របខណ្ឌអាជីព៕
© រក្សាសិទ្ធិដោយ thmeythmey.com