ជាតិ
សង្គមជាតិ
សាលារាជធានីប្រារព្ធ «ទិវាជាតិនៃការចងចាំ» នៅជើងឯក
× សាលារាជធានីភ្នំពេញ នៅព្រឹកថ្ងៃអាទិត្យ ទី២០ ខែឧសភា នេះ ប្រារព្ធ «ទិវាជាតិនៃការចងចាំ» នៅមន្ទីរប្រល័យពូជសាសន៍ជើងឯក ដោយមានការចូលរួមពីមនុស្សប្រមាណ៧ពាន់នាក់។ ក្រៅពីពិធីសូត្រមន្តបង្សុកូល និងរាប់បាត្រព្រះសង្ឃជាង២០០អង្គ ក៏មានការរៀបចំសម្តែងឈុតឆាកទាក់ទងនឹងរបបខ្មែរក្រហមផងដែរ។
កាលពីខែកុម្ភៈកន្លងមក រដ្ឋាភិបាល បានចេញអនុក្រឹត្យដោយកំណត់យកថ្ងៃទី២០ ឧសភា ជា«ទិវាជាតិនៃការចងចាំ» ដាក់បញ្ចូលក្នុងថ្ងៃបុណ្យជាតិជាផ្លូវការ ហើយអនុញ្ញាតឲ្យប្រជាពលរដ្ឋឈប់សម្រាកជាសាធារណៈ។ កន្លងមកនេះ គេហៅទិវានេះថា ជា «ទិវាចងកំហឹង»។
រដ្ឋាភិបាល បានបញ្ជាក់ថា ការកំណត់យកថ្ងៃ«ទិវាជាតិនៃការចងចាំ» ជាថ្ងៃបុណ្យជាតិនេះ សម្រាប់ជាការរំលឹកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ចាប់ពីថ្ងៃទី១៧ មេសា ១៩៧៥ ដល់ថ្ងៃទី៦ មករា ១៩៧៩ ដើម្បីលើកតម្កើងការគោរពវិញ្ញាណក្ខន្ធ និងការធ្វើបុណ្យឧទ្ទិសដល់ជនរងគ្រោះ ដែលបានស្លាប់នៅក្នុងរបបនេះ។
រដ្ឋាភិបាល បានបញ្ជាក់ពីគោលបំណងយ៉ាងដូច្នេះថា៖«លើកតម្កើងការរំលឹកដល់ជនរងគ្រោះ ការស្ដារកិត្តិយសនិងសេចក្តីថ្លៃថ្នូរ របស់ជនគ្រោះ ទោះជានៅរស់ ឬក៏បានបាត់បង់ជីវិតក៏ដោយ។ ប៉ះប៉ូវដល់ការឈឺចាប់ផ្លូវចិត្ត និងផ្នែកសង្គមដល់ជនរងគ្រោះ និងក្រុមគ្រួសារ ។ចូលរួមក្នុងការផ្សះផ្សាជាតិ និងជំរុញឲ្យមានសុខដុមរមនីយកម្ម ក្នុងសង្គមកម្ពុជា និងលើកកម្ពស់ការផ្សព្វផ្សាយនិងការយល់ដឹងអំពីអំពើឃោឃៅ ដែលកើតមាននៅក្នុងរបបកម្ពុជាប្រជាធិបតេយ្យ កុំឲ្យកើតមានឡើងសារជាថ្មី»។
Tag:
ខ្មែរក្រហម
ជើងឯក
ភ្នំពេញ
© រក្សាសិទ្ធិដោយ thmeythmey.com