ជាតិ
សង្គមជាតិ
រដ្ឋមន្ត្រីក្រសួងទេសចរណ៍ ថោង ខុន
×![]()
រយៈពេល៣ខែ ដើមឆ្នាំ២០១៨ កម្ពុជាទទួលបានភ្ញៀវទេសចរអន្តរជាតិសរុប ជាង ១.៧ លាននាក់ ដែលចំនួននេះ កើនជាង៨៥ភាគរយ បើធៀបនឹងរយៈពេលដូចគ្នា ក្នុងឆ្នាំ២០១៧។ ក្នុងចំណោមទេសចរអន្តរជាតិសរុប មានទេសចរជនជាតិ ចំនួន ៥០៥,៩៤០នាក់ ។
លោក ថោង ខុន រដ្ឋមន្ត្រីក្រសួងទេសចរណ៍ ថ្លែងក្នុងពិធីបើកវេទិកាកំពូលទេសចរណ៍កម្ពុជា-ចិនលើកទី១ នៅសណ្ឋាគារសុខាភ្នំពេញ នៅថ្ងៃទី១៧ ខែឧសភា ឆ្នាំ២០១៨ ថាភ្ញៀវទេសចរចិនមកកម្ពុជា កាន់តែច្រើនឡើងៗជារៀងរាល់ឆ្នាំ។ ជាក់ស្តែង ក្នុងចំណោមភ្ញៀវទេសចរអន្តរជាតិចំនួន៥,៦លាននាក់ ដែលមកទស្សនាកម្ពុជានៅឆ្នាំ២០១៧ មានភ្ញៀវទេសចរចិន ប្រមាណជាង ១.២ លាននាក់ កើនឡើង ៤៥.៩ភាគរយ ដោយឈរក្នុងលំដាប់ទី១ ។ នេះជាការបញ្ជាក់របស់លោក រដ្ឋមន្ត្រី ថោង ខុន។
លោករដ្ឋមន្ត្រីទេសចរណ៍ បានបន្តថា កម្ពុជានឹងទទួលភ្ញៀវទេសចរចិន បានយ៉ាងតិច២លាននាក់ នៅក្នុង ឬ មុនឆ្នាំ២០២០ ដោយការអនុវត្តផែនការសកម្មភាពរបស់សៀវភៅសស្តីពី«China Ready»សម្រាប់វិស័យទេសចរណ៍កម្ពុជា និងផែនការយុទ្ធសាស្ត្រ ទាក់ទាញទេសចរចិន ឆ្នាំ២០១៦-២០២០ ដែលសំដៅដល់ការអភិវឌ្ឍវិស័យទេសចរណ៍កម្ពុជា ប្រកបដោយនិរន្តរភាព។
តាមការព្យាកររបស់ក្រសួង កម្ពុជានឹងទទួលបានភ្ញៀវអន្តរជាតិ ប្រមាណ ៦,២ លាននាក់ នៅឆ្នាំ២០១៨ និងប្រមាណ ៧លាននាក់ នៅឆ្នាំ២០២០ដែលនឹងនាំមកនូវចំណូលសរុប ប្រមាណ ៥ពាន់លានដុល្លារ និងបង្កើតឱកាសការងារប្រមាណ ១លាននាក់។ នៅឆ្នាំ ២០៣០ កម្ពុជារំពឹងទទួលបានភ្ញៀវទេសចរអន្តរជាតិប្រមាណ ១៥ លាននាក់ ដែលនឹងនាំមកនូវចំណូលសរុបប្រមាណ ១០ ពាន់លានដុល្លារអាមេរិក ព្រមទាំងការបង្កើតឱកាសការងារប្រមាណ ២លាននាក់៕
Tag:
ភ្នំពេញ
ទេសចរចិន
ថោង ខុន
© រក្សាសិទ្ធិដោយ thmeythmey.com
