ពេទ្យកុមារជាតិកំពុងយកចិត្តទុកដាក់ព្យាបាលទារកដែលម្តាយបោះបង់ចោលក្នុងបន្ទប់ទឹក

ជាតិ

សុខភាព

ពេទ្យកុមារជាតិកំពុងយកចិត្តទុកដាក់ព្យាបាលទារកដែលម្តាយបោះបង់ចោលក្នុងបន្ទប់ទឹក

20, May 2018 , 2:04 pm

រូបភាព

ដោយ: ប៉ូ សាគុន

នាយកមន្ទីរពេទ្យកុមារជាតិ លោក ញឹប អង្គាបុស្ស បានឱ្យសារព័ត៌មាន ThmeyThmey ដឹងថា បច្ចុប្បន្នទារកដែលត្រូវម្ដាយបោះបង់ចោលនៅក្នុងបន្ទប់ទឹកនោះ កំពុងស្ថិតក្នុងស្ថានភាព៥០-៥០ ដែលតម្រូវឲ្យគ្រូពេទ្យយកចិត្តទុកដាក់ជាប្រចាំ។

លោក ញឹប អង្គាបុស្ស បានអះអាងថា បុគ្គលិកមន្ទីរពេទ្យកុមារជាតិនឹងព្យាយាមព្យាបាលទារកនោះឱ្យអស់លទ្ធភាព រហូតដល់គេមានស្ថានភាពប្រក្រតី។ មន្ទីរពេទ្យនឹងរកអ្នកថែរក្សាក្មេងដើម្បីមើលថែទារកនោះ ក្នុងអំឡុងពេលព្យាបាល និងស្នាក់នៅក្នុងពេទ្យ ។

នាយកមន្ទីរពេទ្យកុមារជាតិ បញ្ជាក់យ៉ាងដូច្នេះ៖ «ខ្ញុំបានដឹងតែតាមទូរស័ព្ទទេ ពីស្ថានភាពជំងឺរបស់ក្មេង ព្រោះថ្ងៃនេះខ្ញុំមិនទៅធ្វើការ។ យើងនឹងព្យាយាមព្យាបាលជំងឺក្មេងនេះរហូតដល់ជា ហើយក្រោយពីជា យើងទុកគាត់នៅទីនេះមួយរយៈ យើងអាចរកអ្នកមកមើលថែក្មេងនេះ ក្នុងកំឡុងពេលគេស្នាក់នៅក្នុងពេទ្យ មុនយើងបញ្ជូនគេទៅស្ថាប័នពាក់ព័ន្ធ ឬ មានអ្នកចង់យកទៅចិញ្ចឹម»។

បើតាមការបញ្ជាក់ពី លោក ញឹម អង្គាបុស្ស ទារកត្រូវម្ដាយបោះបង់ចោលនោះ ត្រូវបានគ្រួសារមួយដែលមិនមានកូន នាំទៅជួយសង្គ្រោះនៅមន្ទីរពេទ្យសម្ភពមួយនាខេត្តកំពង់ស្ពឺ រួចក៏បញ្ជូនបន្តមកមន្ទីរពេទ្យកុមារជាតិកាលពីល្ងាចថ្ងៃទី១៩ឧសភា ដោយអាការធ្ងន់ធ្ងរពេក។ គ្រួសារដែលបានជួយសង្គ្រោះនេះ បច្ចុប្បន្នកំពុងនៅមើលថែទារកនោះក្នុងមន្ទីរពេទ្យ ហើយពួកគេក៏មានបំណងយកកូននេះទៅចិញ្ចឹមធ្វើជាកូនរបស់ខ្លួនដែរ។

សូមបញ្ជាក់ រូបភាពដ៏គួរឲ្យអាណិតរបស់ទារករូបនេះ ត្រូវបានគេបង្ហោះតាមបណ្តាញសង្គមហ្វេសប៊ុក ដោយមានការអះអាងថា គេត្រូវបានប្រសូត្រក្នុងបន្ទប់ទឹក នាអំឡុងនៃពិធីជប់លៀងក្នុងរោងចក្រមួយនៅកំពង់ស្ពឺ។ ម្តាយទារកដែលត្រូវបានអះអាងថា ជាកម្មារិនីរោងចក្រ បានទុកកូនចោលនៅក្បែរលូបង្គន់ ហើយក៏បានចាកចេញបាត់ទៅ៕