កីឡាជាតិ
ជាតិ
រដ្ឋត្រូវចំណាយថវិកាជាង១ពាន់លានរៀល លើម្ចាស់ជ័យលាភីមេដាយកីឡាជាតិ
× រដ្ឋត្រូវត្រៀមថវិកាប្រមាណជិត១,២០០លានរៀល(ជិត៣០ម៉ឺនដុល្លារ) ដើម្បីចំណាយលើម្ចាស់មេដាយមាស ប្រាក់ និងសំរឹទ្ធពីការប្រកួតកីឡាជាតិលើកទី២ ដែលប្រព្រឹត្តទៅចាប់ថ្ងៃទី២៥ ឧសភា ដល់ថ្ងៃទី៦ មិថុនា ឆ្នាំ២០១៨។ ការប្រកួតកីឡាជាតិឆ្នាំនេះថ្នាក់ដឹកនាំបានសម្រេចដាក់ប្រភេទកីឡាឲ្យចូលរួមប្រកួតប្រជែងចំនួន២៧ប្រភេទ ដោយមាន២៦៦វិញ្ញាសា។
ក្រោយការបង្កើនប្រាក់រង្វាន់លើកទឹកចិត្ត និងបន្ថែមចំនួនប្រភេទកីឡា នាំឲ្យការចំណាយលើកីឡាករកីឡាការិនីម្ចាស់ជ័យលាភីមេដាយមាស ប្រាក់ និងសំរឺទ្ធពីការប្រកួតកីឡាជាតិលើកទី២រីកប៉ោងកាន់តែធំ។ ជាក់ស្តែងនៅឆ្នាំនេះ ក្រសួងអប់រំ យុវជន និងកីឡាដែលទទួលបន្ទុករៀបចំការប្រកួតនេះ ត្រូវត្រៀមថវិកាប្រមាណជា ១,១៨៣លានរៀល(ជិត៣០ម៉ឺនដុល្លារ) ដើម្បីចំណាយលើម្ចាស់ជ័យលាភីមេដាយ។
ក្រោយមានការកែប្រែប្រកាសអន្តរក្រសួងស្តីពីប្រាក់រង្វាន់លើកទឹកចិត្តការប្រកួតកីឡាជាតិកាលពីពេលកន្លងទៅ កីឡាករដែលដណ្តើមបានមេដាយមាសឆ្នាំនេះទទួលបានថវិកា៨០ម៉ឺនរៀល ប្រាក់៦០ម៉ឺនរៀល និងសំរឹទ្ធ៤០ម៉ឺនរៀល។ សម្រាប់វិញ្ញាសាជាក្រុមត្រូវគុណនឹងចំនួនកីឡាករតាមកម្រិតមេដាយនីមួយៗ។ ខណៈកាលលើកទ១ មេដាយមាសទទួលបាន៣០ម៉ឺនរៀល ប្រាក់១០ម៉ឺនរៀល និងសំរឹទ្ធ៨ម៉ឺនរៀល។
លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា, រូបភាពពីហ្វេសប៊ុកអគ្គនាយកដ្ឋានកីឡា
បើយោងតាមលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា ការប្រកួតកីឡាជាតិឆ្នាំនេះគណៈកម្មការរៀបចំការប្រកួតបានសម្រេចដំឡើងប្រភេទកីឡារហូត២៧ប្រភេទ និងមានវិញ្ញាសាសរុបចំនួន២៦៦ ខណៈលើកមុនមានតែ១៥ប្រភេទកីឡាតែប៉ុណ្ណោះ។ ឆ្នាំនេះមានមេដាយមាស២៦៦ ប្រាក់២៦៦ និងសំរឹទ្ធ៤០៧ (បូកនឹងសំរឹទ្ធស្ទួន)។
ការប្រកួតកីឡាជាតិលើកទី២ឆ្នាំនេះប្រព្រឹត្តទៅចាប់ពីថ្ងៃទី២៥ ឧសភា ដល់ថ្ងៃទី៦ មិថុនា ឆ្នាំ២០១៨។ ការប្រកួតធ្វើនៅ៤ទីតាំង គឺនៅរាជធានីភ្នំពេញ, កំពត, កែប និងកំពង់ធំ៕
Tag:
កីឡាជាតិលើកទី២
National Games
អ៊ុក សិទ្ធិជាតិ
© រក្សាសិទ្ធិដោយ thmeythmey.com