លោក ត្រាំ ថា ជំនួបជាមួយលោក គីម នៅសិង្ហបុរីខែក្រោយអាចនឹងមិនកើតឡើងតាមគ្រោងទុកទេ

អន្តរជាតិ

លោក ត្រាំ ថា ជំនួបជាមួយលោក គីម នៅសិង្ហបុរីខែក្រោយអាចនឹងមិនកើតឡើងតាមគ្រោងទុកទេ

23, May 2018 , 7:19 pm

រូបភាព

អាមេរិក, កូរ៉េខាងជើង, ដូណាល់ ត្រាំ, គីម ជុងអ៊ុន

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី២២ ខែឧសភា បានលើកឡើងថា ជំនួបរវាងលោក និងមេដឹកនាំកូរ៉េខាងជើង គីម ជុងអ៊ុន អាចនឹងមិនរៀបចំតាមផែនការឡើយ។ ការលើកឡើងបែបនេះ ធ្វើឡើងបន្ទាប់ពីកូរ៉េខាងជើងគំរាមពិចារណាជំនួបនៅថ្ងៃទី១២ ខែមិថុនា ឡើងវិញ ព្រោះមិនពេញចិត្តការទាមទារឯកតោភាគីរបស់អាមេរិកដែលចង់ឲ្យកូរ៉េខាងជើងបោះបង់នុយក្លេអ៊ែរ។ យ៉ាងណាមិញ លោក ត្រាំ ក៏អះអាងថា លោក គីម នៅតែមានឆន្ទៈរំសាយនុយក្លេអ៊ែរដដែល។

បើគិតពីថ្ងៃទី២៣ ខែឧសភា នៅសល់២១ថ្ងៃគត់ដល់ជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន នៅថ្ងៃទី១២ ខែមិថុនា នៅសិង្ហបុរី។ ខណៈកាលបរិច្ឆេទកំណត់កាន់តែខិតជិតដល់នោះ ទាំងអាមេរិក ទាំងកូរ៉េខាងជើងបែរជាលើកឡើងពីលទ្ធភាពដែលជំនួបប្រវត្តិសាស្ត្រនេះអាចលុបចោលទៅវិញ។ កូរ៉េខាងជើងគំរាមមិនចូលរួមការចរចា ព្រោះមិនរីករាយនឹងសមយុទ្ធអាមេរិកនៅឧបទ្វីបកូរ៉េផង និងលក្ខខណ្ឌរបស់អាមេរិកផង។

នៅឯទីក្រុងវ៉ាស៊ីនតោន ប្រធានាធិបតីអាមេរិក ដូណាល់ ត្រាំ និយាយថា ជំនួបរវាងលោក និងលោក គីម អាចមិនកើតឡើងនៅខែក្រោយដូចគម្រោងឡើយ។ លោក ត្រាំ និយាយបែបនេះក្នុងជំនួបជាមួយប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី២២ ខែឧសភា នៅសេតវិមាន។ លោក មូន ទៅជួបលោក ត្រាំ ដើម្បីបញ្ចុះបញ្ចូលឲ្យលោកក្ដាប់ឱកាសកម្រនេះឲ្យបានជាប់ដើម្បីឈានដល់គោលដៅចុងក្រោយនៃការលុបបំបាត់នុយក្លេអ៊ែរនៅឧបទ្វីបកូរ៉េ។

យោងតាមទីភ្នាក់ងារព័ត៌មាន AFP លោក ត្រាំ និយាយថា មានឱកាសច្រើនគួរសមដែលជំនួបនៅសិង្ហបុរីមិនអាចកើតឡើងនៅថ្ងៃទី១២ ខែមិថុនា ហើយបើសិនមិនអាចកើតឡើងនៅពេលនោះទេ វាអាចកើតឡើងនៅពេលក្រោយវិញ។ ប្រធានាធិបតីអាមេរិកក៏បានលើកឡើងពីលក្ខខណ្ឌជាក់លាក់ដែលអាមេរិកចង់បាន ហើយបើអាមេរិកមិនអាចទទួលបានអ្វីលក្ខខណ្ឌនោះទេ ការចរចានៅសិង្ហបុរីនឹងមិនអាចកើតឡើងបានទេ។

ខណៈដែលកូរ៉េខាងជើងរិះគន់លក្ខខណ្ឌរបស់អាមេរិក លោក ត្រាំ នៅតែជឿជាក់ថា មេដឹកនាំកូរ៉េខាងជើងនៅតែចង់រំសាយនុយក្លេអ៊ែរដដែល។ ក្នុងជំនួបជាមួយលោក មូន នៅបន្ទប់ពងក្រពើ ប្រធានាធិបតីអាមេរិកបញ្ជាក់ថា លោក គីម មានជំហរម៉ឺងម៉ាត់ចំពោះការលុបបំបាត់នុយក្លេអ៊ែរនេះ។ មុនពន្លះអាមេរិកខ្លាំងកាលពីសប្ដាហ៍មុន កូរ៉េខាងជើងធ្លាប់បានប្រកាសជារឿយៗថា ខ្លួនពិតជាចង់លុបបំបាត់នុយក្លេអ៊ែររបស់ខ្លួនមែន។

ជាថ្មីម្ដងទៀត លោក ត្រាំ ក៏ធានាពីសុវត្ថិភាពរបស់របបដឹកនាំកូរ៉េខាងជើង និងសម្បទានផ្នែកសេដ្ឋកិច្ច បើយល់ព្រមបោះបង់នុយក្លេអ៊ែរ។ ពោល គឺអាមេរិកគ្មានផែនការផ្លាស់ប្ដូររបបត្រកូល គីម ឡើយ។ លោកពន្យល់ថា កូរ៉េខាងជើងនឹងក្លាយជាប្រទេសអ្នកមាន ហើយរីកចម្រើន ឯជប៉ុន កូរ៉េខាងត្បូង និងចិន ក៏នឹងទៅរកស៊ីនៅកូរ៉េខាងជើងកាន់តែច្រើនផង៕