អន្តរជាតិ
អ៊ីស្រាអែលក្លាយជារដ្ឋដំបូងគេដែលប្រើយន្តហោះបំបាំងកាយ F-35 ក្នុងសមរភូមិ
× អ៊ីស្រាអែលក្លាយជាប្រទេសដំបូងគេដែលប្រើប្រាស់យន្តហោះចម្បាំងបំបាំងកាយ F-35 ក្នុងប្រតិបត្តិការយោធាពីរដងកន្លងមក។ យ៉ាងណាក៏ដោយ យន្តហោះចម្បាំង F-35 របស់អាមេរិកនេះថ្លៃកប់ពពកពោលគឺមួយគ្រឿងមានតម្លៃជិត ១០០លានដុល្លារឯណោះ។
មេបញ្ជាការកងទ័ពអាកាសអ៊ីស្រាអែលឧត្តមសេនីយ៍ Amikam Norkin បានបង្ហើបថា អ៊ីស្រាអែលបានប្រើប្រាស់យន្តហោះចម្បាំងស៊េរីថ្មីចុងក្រោយប្រភេទ F-35 ក្នុងប្រតិបត្តិការសឹកពីរដងរួចមកហើយកន្លងមក។ លោកមិនបានបញ្ជាក់ឲ្យច្បាស់ទេថា ប្រតិបត្តិការនោះនៅឯណោះពិតប្រាកដ។
យោងតាមទីភ្នាក់ងារព័ត៌មាន AFP មន្ត្រីយោធាជាន់ខ្ពស់រូបនេះបានថ្លែងក្នុងកិច្ចប្រជុំនៅអ៊ីស្រាអែលនៅដើមសប្តាហ៍នេះជាមួយមេបញ្ជាការកងទ័ពអាកាសប្រទេស២០ផ្សេងទៀតដូច្នេះ៖«យើងបានប្រើប្រាស់យន្តហោះចម្បាំង F-35 នៅមជ្ឈិមបូព៌ា ហើយយើងបានវាយប្រហារលើសមរភូមិពីរផ្សេងគ្នាដែរ»។
ថ្វីបើមន្ត្រីជាន់ខ្ពស់រូបនេះមិនបានបញ្ជាក់ច្បាស់ពីសមរភូមិក៏ដោយ កាលពីថ្មីៗនេះអ៊ីស្រាអែលបានបើកការវាយប្រហារលើទីតាំងជាច្រើនកន្លែងនៅស៊ីរី ក្នុងនោះគឺមានទីតាំងយោធា និងរចនាសម្ព័ន្ធរបស់អ៊ីរ៉ង់ផងដែរ។ អ៊ីស្រាអែលបានអះអាងថា ការវាយប្រហារនេះគឺឆ្លើយតបនឹងការបាញ់ផ្លោងមីស៊ីលលើកងទ័ពរបស់ខ្លួននៅតំបន់ Golan Heights។
តាមពិតអ៊ីស្រាអែលក្លាយជាប្រទេសដំបូងគេដែលប្រើប្រាស់យន្តហោះចម្បាំងស៊េរីថ្មីនេះនៅក្នុងប្រតិបត្តិការយោធា។ អ៊ីស្រាអែលបានបញ្ជាទិញយន្តហោះចម្បាំង F-35 ចំនួន ៥០គ្រឿងពីសហរដ្ឋអាមេរិកកន្លងមក ហើយប្រទេសនេះទទួលបានយន្តហោះប្រាំបួនគ្រឿងហើយកន្លងមក។
អ៊ីស្រាអែលទទួលបានជំនួយយោធាច្រើនជាងគេពីសហរដ្ឋអាមេរិកក្នុងទំហំរហូតដល់ ៤ ពាន់លានដុល្លារឯណោះរៀងរាល់ឆ្នាំ ហើយសហរដ្ឋអាមេរិកធានាថា អ៊ីស្រាអែលមានលទ្ធភាពរក្សាសមត្ថភាពយោធារបស់ខ្លួនឲ្យបានខ្លាំងក្លាដើម្បីទប់ទល់នឹងការគំរាមកំហែងពីខាងក្រៅ។
ដោយឡែកយន្តហោះចម្បាំងបំបាំងកាយ F-35 ក្លាយជាយន្តហោះដែលមានតម្លៃថ្លៃជាងគេនៅក្នុងប្រវត្តិសាស្ត្រ។ បច្ចុប្បន្ននេះ យន្តហោះមួយគ្រឿមានតម្លៃរហូតដល់ជិត ១០០ លានដុល្លារឯណោះ។ កន្លងមកលោក ដូណាល់ ត្រាំ ក៏បានរិះគន់ក្រុមហ៊ុន Lockheed Martin ជុំវិញការស្រាវជ្រាវ និងផលិតយន្តហោះដែលមានតម្លៃថ្លៃបែបនេះដែរ៕
Tag:
អ៊ីស្រាអែល
F-35
Lockheed Martin
© រក្សាសិទ្ធិដោយ thmeythmey.com