FIFA
កីឡាអន្តរជាតិ
អន្តរជាតិ
World Cup៖ រុស្ស៊ីយកទ័ពពីស៊ីរី និងអ៊ុយក្រែនដើម្បីទប់ទល់ការប្រហារតាម Drone
× រុស្ស៊ីនឹងដាក់ពង្រាយកងទ័ពដែលមានបទពិសោធន៍នៅស៊ីរី និងក្នុងសង្គ្រាមនៅអ៊ុយក្រែន ដើម្បីការពារពីការវាយប្រហារដោយយន្តហោះគ្មានមនុស្សបើក (Drone) ទៅលើកីឡដ្ឋាននានា អំឡុងការប្រកួតពានរង្វាន់ FIFA World Cup នាខែក្រោយនេះ។ នេះបើយោងតាមការផ្សាយរបស់ទីភ្នាក់ងារព័ត៌មាន AFP។
ការគំរាមកំហែងពីក្រុមភេរវកម្មគឺជាការព្រួយបារម្ភធំបំផុតសម្រាប់អ្នករៀបចំការប្រកួតកីឡាបាល់ទាត់ពិភពលោកដែលនឹងប្រព្រឹត្តទៅចាប់ពីថ្ងៃទី ១៤ ខែមិថុនា ដល់ថ្ងៃទី ១៥ ខែកក្កដាឆ្នាំ២០១៨។
រុស្ស៊ីត្រូវបានគំរាមវាយប្រហារដោយការបំផ្ទុះគ្រាប់បែកអត្តឃាតជាច្រើនលើកច្រើនសារមកហើយចាប់តាំងពីការឈ្នះសិទ្ធិធ្វើជាម្ចាស់ផ្ទះ World Cup ក្នុងការបោះឆ្នោតឆ្នាំ២០១០មក។ ហើយការគំរាមកំហែងចុងក្រោយបង្អស់នៅលើប្រព័ន្ធអ៊ីនធើណេតគឺធ្វើឡើងដោយការប្រមានកាត់ក្បាលកំពូលតារាបាល់ទាត់ Lionel Messi និង Cristiano Ronaldo ពីក្រុមភេរវជន ISIS ក្នុងអំឡុងព្រឹត្តិការណ៍នេះដែរ។
ការគំរាមវាយប្រហារនោះ ក៏ត្រូវបានចោទប្រកាន់ទៅលើពួកសកម្មប្រយុទ្ធដែលមានទំនាក់ទំនងជាមួយក្រុមភេរវជនរដ្ឋអ៊ីស្លាមដែលមានមូលដ្ឋាននៅស៊ីរីផងដែរ។
យ៉ាងណាក៏ដោយ ដើម្បីដោះស្រាយបញ្ហានេះម្ចាស់ផ្ទះរុស្ស៊ី នឹងបញ្ចេញទ័ពរបស់ខ្លួនដែលមានមូលដ្ឋានក្នុងប្រទេសមានសង្គ្រាមនៅមជ្ឈឹមបូព៌ា ដើម្បីយកមកការពារសុវត្ថិភាពីការវាយប្រហារដោយយន្តហោះ Drone នៅ World Cup លើកទី២២នេះ។
ស្ថាប័នព័ត៌មាន RBK ក្នុងក្រុងមូស្គូក៏បាននិយាយដែរថា មេបញ្ជាការកងទ័ពរុស្ស៊ីលោក Valery Gerasimov នឹងបោះទីតាំងឈរជើងនៅក្រៅកីឡដ្ឋានទាំង១២ ដើម្បីចាំឃ្លាំមើលសកម្មភាពហោះហើររបស់ Drone នៅក្បែរនោះ៕
Tag:
បាល់ទាត់
FIFA World Cup
រុស្ស៊ី
ISIS
Drone
© រក្សាសិទ្ធិដោយ thmeythmey.com