អន្តរជាតិ
ជំនួបត្រាំ-គីម៖ កូរ៉េខាងជើងថា មានឬអត់អាស្រ័យលើអាមេរិក ឯត្រាំ ថានឹងដឹងនៅសប្ដាហ៍ក្រោយ រូបភាព AFP
× ជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំកំពូលកូរ៉េខាងជើង គីម ជុងអ៊ុន បែរជាស្ថិតក្នុងស្ថានភាពស្រពេចស្រពិល ទោះជាបានកំណត់ទីតាំង និងកាលបរិច្ឆេទរួចហើយនោះ។ លោក ត្រាំ និយាយថា ជំនួបជាមួយលោក គីម អាចរៀបចំទៅមុខឬអត់ នឹងដឹងនៅសប្ដាហ៍ក្រោយ ខណៈមន្ត្រីការទូតកូរ៉េខាងជើងនិយាយថា ធ្វើឬអត់ អាស្រ័យលើអាមេរិកទាំងស្រុង។ ប៉ុន្តែ មន្ត្រីអាមេរិក និងកូរ៉េខាងជើងនឹងជួបគ្នានៅសិង្ហបុរីដើម្បីជជែកពីរៀបចំជំនួបប្រវត្តិសាស្ត្រនេះ។
ការប្រែប្រួលអាកប្បកិរិយារបស់កូរ៉េខាងជើងភ្លាមៗ បានធ្វើឲ្យជំនួបប្រវត្តិសាស្ត្ររវាងមេដឹកនាំអាមេរិក និងកូរ៉េខាងជើង ប្រែទៅជាមិនច្បាស់លាស់។ កូរ៉េខាងជើង ដែលមិនពេញចិត្តសមយុទ្ធរួមគ្នារវាងអាមេរិក និងកូរ៉េខាងត្បូង បានគំរាមលុបចោលជំនួបរវាងលោក គីម ជុងអ៊ុន និងលោក ដូណាល់ ត្រាំ នៅថ្ងៃទី១២ ខែមិថុនា នៅសិង្ហបុរី។ ចំណែកឯអាមេរិកវិញ សូម្បីលោក ត្រាំ ក៏បញ្ជាក់ពីភាពស្រពេចស្រពិលនៃជំនួបនេះដែរ។
នៅថ្ងៃទី២៤ ខែឧសភា មន្ត្រីការទូតកូរ៉េខាងជើងជាថ្មីម្ដងទៀតបានគំរាមលុបចោលជំនួបមេដឹកនាំនៅសិង្ហបុរី ក្នុងករណីអាមេរិកបន្តអាកប្បកិរិយាមិនសមស្រប និងហួសហេតុទៀតនោះ។ លោកស្រី Choe Son-hui អនុរដ្ឋមន្ត្រីការបរទេសកូរ៉េខាងជើងគំរាមថា ការចរចានុយក្លេអ៊ែរអាចដំណើរការបានឬអត់ គឺអាស្រ័ទាំងស្រុងលើការសម្រេចចិត្ត និងឥរិយាបថរបស់អាមេរិក។ បើអាមេរិកមើលងាយឆន្ទៈកូរ៉េខាងជើងទៀត លោកស្រីនឹងផ្ដល់យោបល់ឲ្យលោក គីម ពិចារណាជំនួបនៅខែក្រោយឡើងវិញមិនខាន។
ទីភ្នាក់ងារព័ត៌មានរដ្ឋកូរ៉េខាងជើង KCNA ផ្សាយថា អនុរដ្ឋមន្ត្រីការបរទេសកូរ៉េខាងត្បូងដដែលក៏បានរំឭកអាមេរិកថា ខ្លួនមិនមែនជាអ្នកសុំចរចាមុនឡើយ តែអាមេរិកទៅវិញទេដែលជាអ្នកស្នើការចរចានេះ។ លោកស្រី Choe សង្កត់ធ្ងន់ថា អាមេរិកកំពុងបំភាន់មតិទូទៅប្រៀបដូចកូរ៉េខាងជើងជាអ្នកអញ្ជើញអាមេរិកឲ្យចូលតុចរចាអ៊ីចឹង ប៉ុន្តែជាការពិត កូរ៉េខាងជើងនឹងមិនអង្វរអាមេរិកឲ្យចរចា ឬបញ្ចុះបញ្ចូលឲ្យអាមេរិកចរចាដែរ។
១. ជំនួបនៅសិង្ហបុរីធ្វើតាមគម្រោង? ត្រាំ ថា នឹងដឹងនៅសប្ដាហ៍ក្រោយ
ខណៈជំនួបមេដឹកនាំអាមេរិក និងកូរ៉េខាងជើងបានកំណត់កាលបរិច្ឆេទ និងទីកន្លែងស្រេចហើយនោះ គេនៅតែមិនទាន់ច្បាស់១០០ភាគរយថា វាអាចនឹងកើតឡើងតាមផែនការដែរ។ លោកប្រធានាធិបតី ត្រាំ នៅថ្ងៃទី២៣ ខែឧសភា និយាយថា លោកនឹងដឹងនៅសប្ដាហ៍នេះពីភាពច្បាស់លាស់នៃជំនួបជាមួយលោក គីម នៅសិង្ហបុរី។ មន្ត្រីអាមេរិក នឹងធ្វើដំណើរទៅកាន់សិង្ហបុរីនៅក្នុងសប្ដាហ៍នេះដើម្បីជជែកជាមួយភាគីកូរ៉េខាងជើងលើការរៀបចំការចរចាប្រវត្តិសាស្ត្រនេះ។
នៅថ្ងៃដដែលនេះ រដ្ឋមន្ត្រីការបរទេសអាមេរិក Mike Pompeo បានព្រមានដែរថា អាមេរិកនឹងដើរចេញពីកិច្ចចរចានេះដូចគ្នា បើជំនួបចរចាខែក្រោយដើរខុសគោលដៅ។ ផ្ទុយពីការលើកឡើងរបស់មន្ត្រីការទូតកូរ៉េខាងជើង លោក Pompeo ដែលសង្ឃឹមថា ជំនួបនៅសិង្ហបុរីអាចកើតឡើងតាមគម្រោងបានបោះបាល់ទៅឲ្យកូរ៉េខាងជើងវិញ ដោយអះអាងថា ដំណើរការជំនួបអាចទៅមុខឬយ៉ាងណាអាស្រ័យលើលោក គីម ទាំងស្រុង។
២. UN អនុញ្ញាតឲ្យមន្ត្រីកូរ៉េខាងជើងទៅសិង្ហបុរី ដើម្បីជជែកពីជំនួបខែក្រោយ
យោងតាមទីភ្នាក់ងារព័ត៌មាន Reuters មន្ត្រីអាមេរិក និងមន្ត្រីកូរ៉េខាងជើង នឹងជួបគ្នានៅសិង្ហបុរីដែលជាម្ចាស់ផ្ទះនៃជំនួបលោក ត្រាំ និងលោក គីម ។ មន្ត្រីប្រទេសទាំងពីរនឹងជជែកពីរបៀបវារៈ និងបញ្ហាភស្តុភារដូចជាសន្តិសុខ និងការដឹកជញ្ជូនជាដើម។ អនុប្រធានបុគ្គលិកសេតវិមាន Joseph Hagin និងទីប្រឹក្សារងសន្តិសុខជាតិអាមេរិកមួយរូប នឹងដឹកនាំប្រតិភូអាមេរិកមួយក្រុមធ្វើដំណើរទៅកាន់សិង្ហបុរីនៅសប្ដាហ៍នេះ។
កាលពីថ្ងៃទី២៣ ខែឧសភា គណៈកម្មាធិការមួយនៃក្រុមប្រឹក្សាសន្តិសុខបានសម្រេចលើកលែងការរឹតត្បិតការធ្វើដំណើររបស់មន្ត្រីកូរ៉េខាងជើងដើម្បីអនុញ្ញាតឲ្យពួកគេធ្វើដំណើរទៅកាន់សិង្ហបុរីជួបមន្ត្រីអាមេរិក។ ការលើកលែងនេះធ្វើតាមសំណើរបស់សិង្ហបុរីដែលជាអ្នករៀបចំកិច្ចប្រជុំ។ យ៉ាងណាមិញ គេមិនទាន់ដឹងច្បាស់ពីសមាសភាពមន្ត្រីកូរ៉េខាងជើងដែលត្រូវធ្វើទស្សនកិច្ចនៅសិង្ហបុរីឡើយ៕
Tag:
អាមេរិក
កូរ៉េខាងជើង
សិង្ហបុរី
ដូណាល់ ត្រាំ
គីម ជុងអ៊ុន
© រក្សាសិទ្ធិដោយ thmeythmey.com