អន្តរជាតិ
អាល្លឺម៉ង់ និងចិនប្តេជ្ញាការពារកិច្ចព្រមព្រៀងនុយក្លេអ៊ែរអ៊ីរ៉ង់ ដែលគ្មានវត្តមានអាមេរិក អធិការបតីអាល្លឺម៉ង់ និងនាយករដ្ឋមន្ត្រីចិន (រូបភាព AFP)
× អធិការបតីអាល្លឺម៉ង់លោកស្រី អែនជេឡា មឺហ្កែល និងសមភាគីចិនលោក លី ខឹឈាំង បានបង្ហាញជំហរឥតងាករេក្នុងការបន្តគាំទ្រ និងការពារកិច្ចព្រមព្រៀងនុយក្លេអ៊ែរអ៊ីរ៉ង់នៅក្នុងជំនួបទ្វេភាគីនៅថ្ងៃព្រហស្បតិ៍ទី ២៤ ខែឧសភានេះ។ ការបង្ហាញជំហររួមគ្នានេះកើតឡើងក្រោយពេលដែលលោក ដូណាល់ ត្រាំ ប្រកាសដកអាមេរិកចេញពីកិច្ចព្រមព្រៀងនុយក្លេអ៊ែរនេះ។
ស្ថិតក្នុងដំណើរទស្សនកិច្ចទៅកាន់ប្រទេសចិនសប្តាហ៍នេះ លោកស្រីអធិការបតីអាល្លឺម៉ង់ មឺហ្កែល ព្យាយាមជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម ជាមួយចិន ហើយមិនត្រឹមតែលោកស្រីក៏ប្រឹងពង្រឹងកិច្ចសហប្រតិបត្តិការជាមួយចិនដើម្បីដោះស្រាយបញ្ហាប្រឈមផ្សេងទៀតលើពិភពលោកផងដែរ។
បើតាមការចុះផ្សាយរបស់ទីភ្នាក់ងារព័ត៌មាន AFP លោកស្រី មឺហ្កែល បានជួបជាមួយនាយករដ្ឋមន្ត្រីចិន លី ខឹឈាំង នៅថ្ងៃព្រហស្បតិ៍ទី ២៤ ខែឧសភា នៅវិមានប្រជាជនចិន ហើយអ្នកទាំងពីរបានបង្ហាញជំហរដូចគ្នាក្នុងការបន្តការពារកិច្ចព្រមព្រៀងនុយក្លេអ៊ែអ៊ីរ៉ង់ឆ្នាំ ២០១៥ (JCPOA)។ ក្រៅពីមានជំហររួមលើការការពារកិច្ចព្រមព្រៀងនេះ មេដឹកនាំទាំងពីរក៏ឯកភាពគ្នាលើការគាំទ្រពាណិជ្ជកម្មសេរីផងដែរ។
លោក លី បានព្រមានថា ការបញ្ចប់កិច្ចព្រមព្រៀងនុយក្លេអ៊ែរនេះមិនមែនត្រឹមតែប៉ះពាល់ដល់អ៊ីរ៉ង់ឡើយ តែវាក៏មានផលអវិជ្ជមានចំពោះការឈានទៅដោះស្រាយបញ្ហាផ្សេងទៀតតាមរយៈការចរចាដែរ។ ថ្វីបើលោកមិនសំដៅលើបញ្ហាកូរ៉េខាងជើងចំៗក៏ដោយ គេអាចយល់បានថា មេដឹកនាំចិននេះជឿជាក់ថា ការដកខ្លួនរបស់អាមេរិកធ្វើឲ្យអាមេរិកបាត់បង់តម្លៃ ហើយការចរចាជាមួយកូរ៉េខាងជើងកាន់តែស្មុគស្មាញ។
លោកស្រី មឺហ្កែល ឯណោះវិញក៏ព្រមានដូចគ្នាពីផលប៉ះពាល់លើសេដ្ឋកិច្ចនៅអឺរ៉ុបក្រោយពេលដែលលោក ត្រាំដើរចេញពីកិច្ចព្រមព្រៀងអ៊ីរ៉ង់។ នេះក៏ដោយសារអាមេរិកក៏សម្រេចអនុវត្តទណ្ឌកម្មប្រឆាំងអ៊ីរ៉ង់ឡើងវិញដែរ ថ្វីបើសម្ព័ន្ធមិត្តនៅះអឺរ៉ុបនៅបង្ហាញការប្តេជ្ញាចិត្តបន្តអនុវត្តកិច្ចព្រមព្រៀងដែលសម្រេចបានឆ្នាំ ២០១៥ នេះក៏ដោយ។ ក្រុមហ៊ុនអឺរ៉ុបអាចនឹងរងផលប៉ះពាល់ដោយសារទណ្ឌកម្មអាមេរិកព្រោះពួកគេបានរកស៊ីជាមួយអ៊ីរ៉ង់ចាប់ពីឆ្នាំ ២០១៥មកនោះ។
លោកស្រី មឺហ្កែលបានបញ្ជក់ដូច្នេះ៖ «ប្រសិនក្រុមហ៊ុនអឺរ៉ុបដកខ្លួន ឬបន្ថយទំនាក់ទំនងជាមួយអ៊ីរ៉ង់ព្រោះភ័យខ្លាចទណ្ឌកម្មអាមេរិក វានឹងក្លាយជាឱកាសពិសេសសម្រាប់អ្នកជំនួញប្រទេសផ្សេងទៀតចូលទៅទាញប្រយោជន៍ដោយដាក់ទុនវិនិយោគនៅអ៊ីរ៉ង់វិញម្តង»។
ការលើកឡើងពីជំហររួមគ្នារវាងចិន និងអាល្លឺម៉ង់នេះកើតឡើងប៉ុន្មានសប្តាហ៍ប៉ុណ្ណោះក្រោយពេលដែលលោក ដូណាល់ ត្រាំ ប្រកាសដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដោយអះអាងថា កិច្ចព្រមព្រៀងនេះអាក្រក់ ហើយលោកចង់បានការចរចាកិច្ចព្រមព្រៀងថ្មី។ ដល់សប្តាហ៍នេះ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានដាក់លក្ខខណ្ឌ ១២ ចំណុចឲ្យអ៊ីរ៉ង់ធ្វើតាមថែមទៀតផង បើមានបង្កើតកិច្ចព្រមព្រៀងថ្មីមែននោះ។ ប៉ុន្តែអ៊ីរ៉ង់មិនដែលចាប់អារម្មណ៍ឡើយ។
ដោយឡែក ក្រៅពីបញ្ហានុយក្លេអ៊ែរអ៊ីរ៉ង់ មេដឹកនាំទាំងពីរក៏ផ្តោតសំខាន់លើបញ្ហាពាណិជ្ជកម្មដែរ។ លោកស្រី មឺហ្កែលបានស្វាគមន៍ការសម្រេចចិត្តរបស់ចិនក្នុងការបន្ថយពន្ធនាំចូលរថយន្ត និងអនុញ្ញាតឲ្យក្រុមហ៊ុនផលិតរថយន្តបរទេសអាចចូលដាក់ទុនបង្កើតកិច្ចសហប្រតិបត្តិការជាមួយក្រុមហ៊ុនចិនបានផងដែរ៕
Tag:
អាមេរិក
កិច្ចព្រមព្រៀងនុយក្លេអ៊ែរអ៊ីរ៉ង់
អាល្លឺម៉ង់
© រក្សាសិទ្ធិដោយ thmeythmey.com