ជាតិ
សេដ្ឋកិច្ច
GMAC នាំរោងចក្រកាត់ដេរនៅកម្ពុជាប្រើថាមពលពន្លឺព្រះអាទិត្យ តាមរបត់ពិភពលោក
× ភ្នំពេញ៖ សមាគមរោងចក្រកាត់ដេរនៅកម្ពុជា (GMAC) នឹងជំរុញបណ្ដារោងចក្រកាត់ដេរដែលជាសមាជិករបស់ខ្លួន ឲ្យងាកមកប្រើប្រាស់ប្រព័ន្ធសូឡា ដើម្បីជួយដល់បរិស្ថាន និងកាត់បន្ថយការចំណាយ ខណៈដែលប្រទេសអភិវឌ្ឍបានងាកមកប្រើប្រាស់ថាមពលនេះ។
GMAC មានការប្ដេជ្ញាចិត្តបែបនេះ បន្ទាប់ពីសមាគមមួយនេះ បានចុះកិច្ចព្រមព្រៀងជាមួយក្រុមហ៊ុនផ្គត់ផ្គង់ឧបករណ៍សូឡា Cleantech Solar ដែលមានមូលដ្ឋាននៅប្រទេសសិង្ហបុរី នៅថ្ងៃទី២៤ខែឧសភា។ កិច្ចសហការរវាង GMAC និងក្រុមហ៊ុន Cleantech តាមរយៈកិច្ចព្រមព្រៀងនេះមានរយៈពេលរហូតដល់ ១០ឆ្នាំ។
មុននឹងណែនាំសម្រាប់រោងចក្រសមាជិករបស់ខ្លួន GMAC នឹងសាកល្បងប្រើប្រាស់ប្រព័ន្ធសូឡា នៅលើដំបូលការិយាល័យរបស់ខ្លួនជាមុនសិន ដែលបន្ទះសូឡាត្រូវបានផ្គត់ផ្គង់ដោយក្រុមហ៊ុន Cleantech ។
ប្រធាន GMAC លោក វ៉ាន់ ស៊ូអៀង មានប្រសាសន៍ដូច្នេះថា៖«យើងត្រូវការសាកល្បងប្រព័ន្ធសូឡារបស់ក្រុមហ៊ុនជាមុនសិន ដើម្បីដឹងពីប្រសិទ្ធភាពរបស់វាចំពោះការសន្សំសំចៃ និងការបញ្ចេញថាមពលស្អាត ហើយបន្ទាប់មកយើងនឹងណែនាំដល់សមាជិកឲ្យប្រើប្រាស់វា»។
ការបើប្រាស់ថាមពលពន្លឺព្រះអាទិត្យនឹងជួយកាត់បន្ថយការចំណាយរបស់ម្ចាស់រោងចក្រយ៉ាងតិច ៣០ភាគរយ។ លោក វ៉ាន់ ស៊ូអៀង ពន្យល់ដូច្នេះថា៖«រោងចក្រមួយចំណាយលើថាមពលប្រមាណ ៥ម៉ឺន ទៅ១០ម៉ឺនដុល្លារក្នុងមួយខែ ហើយបើគេប្រើសូឡា គេសន្សំបានយ៉ាងតិច ៣០ភាគរយ។ លោកបន្តថា៖«នេះគ្រាន់តែរោងចក្រមួយ ហើយចុះរោងចក្រ ១០០០ នឹងសន្សំបានប៉ុន្មាន មិនតិចទេ»។
លោក ស៊ូអៀង ឲ្យដឹងថា ការផ្គត់ផ្គង់អគ្គិសនីសម្រាប់រោងចក្រកាត់ដេរនៅកម្ពុជាសព្វថ្ងៃ គឺអត់គ្រប់គ្រាន់ហើយថ្លៃទៀត តែលោកអះអាងថាប្រទេសផ្សេងទៀតក៏ជួបស្ថានភាពនេះដែរ។ រោងចក្រកាត់ដេរនៅកម្ពុជា ប្រើប្រាស់ថាមពលពីអគ្គិសនីរដ្ឋ និងម៉ាស៊ីនភ្លើង ហើយមានប្រើប្រព័ន្ធសូឡាតិចតួចប៉ុណ្ណោះ។
លោក វ៉ាន់ ស៊ូអៀង បញ្ជាក់ថា ការចាប់ផ្ដើមជំរុញការប្រើប្រាស់ថាមពលព្រះពន្លឺអាទិត្យសម្រាប់រោងចក្រកាត់ដេរនៅកម្ពុជានៅពេលនេះ ធ្វើឡើងក្នុងគោលដៅចម្បងគឺជួយដល់បរិស្ថាន។ លោកបន្ថែមថា ប្រទេសឧស្សាហកម្មធំៗនៅលើសកលលោក កំពុងព្រួយបារម្ភពីការបញ្ចេញឧស្ម័នកាបូនក្នុងបរិយាកាស ហើយបានងាកមកប្រើប្រាស់ប្រព័ន្ធសូឡាវិញ។
«កម្ពុជាជាប្រទេសមិនទាន់មានការអភិវឌ្ឍឧស្សាហកម្មខ្លាំងនៅឡើយ ដែលខ្យល់ឱកាសនៅទីនេះនៅមានភាពស្អាតល្អ ដូចនេះជាការល្អដែលយើងគួរចាប់ផ្ដើមពីពេលនេះ ដើម្បីរក្សានិរន្តរភាពបរិស្ថានឲ្យនៅល្អ»។ លោក វ៉ាន់ ស៊ូអៀង ថ្លែងបែបនេះ។
ការប្រើប្រាស់ថាមពលស្អាតនៅកម្ពុជានៅមានបរិមាណតិចតួចនៅឡើយ។ តែយ៉ាងណាគម្រោងប្រើប្រាស់ប្រព័ន្ធពន្លឺព្រះអាទិត្យនៅកម្ពុជាបានកំពុងលិចរូបរាងជាបណ្ដើរៗ។ មួយក្នុងចំណោមនោះ គឺគម្រោងដំឡើងប្រព័ន្ធសូឡាទំហំ ១០មេហ្គាវ៉ាត់ នៅក្រុងបាវិតខេត្តស្វាយរៀង។ ក្រៅពីគម្រោងធំបែបនេះ គម្រោងផ្សេងទៀតត្រូវបានធ្វើនៅតំបន់សេដ្ឋកិច្ចពិសេសភ្នំពេញ និងតាមបណ្ដារោងចក្រឧស្សាហកម្មមួយចំនួន៕
Tag:
សូឡា
ថាមពលពន្លឺព្រះអាទិត្យ
GMAC
© រក្សាសិទ្ធិដោយ thmeythmey.com