ជាតិ
លោក ប្រាក់ សុខុន ស្នើសម្ដេច ហ៊ុន សែន ផ្លាស់ប្តូរ និងតែងតាំងទូតថ្មី និងមន្ត្រីក្រសួង១៦រូប
× ភ្នំពេញ៖ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិលោក ប្រាក់ សុខុន បានស្នើសម្ដេចនាយករដ្ឋមន្ត្រី ហ៊ុន សែន ផ្លាស់ប្តូរ និងតែងតាំងឯកអគ្គរាជទូតថ្មី និងមន្ត្រីក្រសួងចំនួន១៦រូប។
លិខិតរបស់រដ្ឋមន្ត្រីក្រសួងការបរទេស បានស្នើសុំផ្លាស់ប្តូរឯកអគ្គរាជទូត៧រូប និងតែងតាំងថ្មី១៥រូប។ លិខិតនោះ បានដាក់ជាសំណើដូច្នេះថា៖ តែងតាំងលោក អ៊ឹង រចនា បច្ចុប្បន្នជាអគ្គនាយក នៃអគ្គនាយកដ្ឋានអាស៊ីប៉ាស៊ីហ្វិក ក្រសួងការបរទេស និងសហប្រតិបត្តិការអន្តរជាតិ ជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសជប៉ុន ជំនួសលោកស្រី ជា គឹមថា ។ ចំណែកលោកស្រី ជា គឹមថា ចូលកាន់តំណែងលោក អ៊ឹង រចនា វិញ។
តែងតាំងលោក ឡេង ចាន់វីរៈ បច្ចុប្បន្នជាអគ្គាធិការនៃក្រសួងការបរទេសនិងសហប្រតិបត្តិការអន្តរជាតិជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសហ្វីលីពីន ជំនួសលោកស្រី ទួត បញ្ញា។ រីឯលោកស្រី ទួត បញ្ញា មកកាន់តួនាទីអនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ។
ជាមួយគ្នានេះលោក កែ សុវណ្ណ បច្ចុប្បន្នជាតំណាងអចិន្ត្រៃយ៍រងនៃស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិ និងប្រទេសកាណាដា ត្រូវបានតែងតាំងជាឯកអគ្គរាជទូតតំណាងអចិន្ត្រៃយ៍ប្រចាំអង្គការសហប្រជាជាតិនិងប្រទេសកាណាដាជំនួសលោក ទុយ រី ។ ចំណែកលោក ទុយ រី ចូលកាន់តំណែងអនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិវិញ។
លោក ជុំ សុន្ទរី បច្ចុប្បន្នជាអនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ តែងតាំងជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំសហរដ្ឋអាមេរិក និងជាឯកអគ្គរាជទូតតែងតាំងប្រចាំរដ្ឋម៉ិកស៊ិកូ ជំនួសលោក ជុំ ប៊ុនរ៉ុង ដែលចូលប្រទេសដោយត្រូវចប់អាណត្តិបេសកកម្ម។
ចំណែកលោក ណុំ ពិសិដ្ឋ បច្ចុប្បន្នជាអគ្គនាយក នៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈឹមបូព៌ា ទទួលតំណែងជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសប៊ែលហ្ស៊ិក និងជាឯកអគ្គរាជទូតតែងតាំងប្រចាំប្រទេសអូទ្រីស ហូឡង់ លុចហ្សំបួរ និងអមសហភាពអឺរ៉ុប។ រីឯលោក ជា ធីរៈ ឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសប៊ែលហ្ស៊ិក និងជាឯកអគ្គរាជទូតតែងតាំងប្រចាំប្រទេសអូទ្រីស ហូឡង់ លុចហ្សំបួរ និងអមសហភាពអឺរ៉ុប ដែលត្រូវចប់អាណត្តិបេសកកម្មនោះ ចូលកាន់តួនាទីអនុប្រធានវិទ្យាស្ថានជាតិការទូត និងទំនាក់ទំនងអន្តរជាតិ។
លោក អាន សុខខឿន បច្ចុប្បន្ន ជាអគ្គនាយករងជាអគ្គនាយក នៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា ក្រសួងការបរទេស និងសហប្រតិបត្តិការអន្តរជាតិ ត្រូវចូលកាន់តំណែងជំនួសលោក ណុំ ពិសិដ្ឋ។
លិខិតដដែល ក៏បានតែងតាំងលោក អ៊ុង ស៊ាង បច្ចុប្បន្នជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាឯកអគ្គរាជទូតវិសាមញ្ញនិងពេញសមត្ថភាពនៃព្រះរាជាណាចក្រកម្ពុជាប្រចាំប្រទេសឥណ្ឌា និងជាឯកអគ្គរាជទូតតែងតាំងប្រចាំប្រទេសបង់ក្លាដេស ស្រីលង្ការ ប៉ាគីស្ថាន និងសាធារណរដ្ឋអ៊ីស្លាមអ៊ីរ៉ង់ជំនួសលោក ពេជ្រឃុន បញ្ញា ដែលត្រូវបញ្ចប់អាណត្តិបេសកកម្ម។
ចំណែកលោក ពេជ្រឃុន បញ្ញា ត្រូវចូលកាន់តំណែងជាអគ្គនាយករង នៃអគ្គនាយកដ្ឋានសហប្រតិបត្តិការអន្តរជាតិ ក្រសួងការបរទេស និងសហប្រតិបត្តិការអន្តរជាតិជំនួសលោក ស៊ុន ដារិន ដែលត្រូវបានតែងតាំងជាអគ្គទីប្រឹក្សានៃស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិ និងប្រទេសកាណាដា។
សម្រាប់លោក ឈូក ប៊ុណ្ណា បច្ចុប្បន្នជាប្រធាននាយកដ្ឋានទំនាក់ទំនងដៃគូសន្ទនាអាស៊ាន ត្រូវបានក្រសួងការបរទេសស្នើតែងតាំងជាអគ្គនាយករង នៃអគ្គនាយកដ្ឋានអាស៊ាន ក្រសួងការបរទេស និងសហប្រតិបត្តិការអន្តរជាតិ ។ ចំណែកលោក កេត សោផាន់ ឯកអគ្គរាជទូតប្រតិភូអចិន្ត្រៃយ៍ប្រចាំអង្គការយូណេស្កូ និងជានាយកផ្ទះខ្មែរ នៅមជ្ឈមណ្ឌលសាកលវិទ្យាល័យនៅទីក្រុងប៉ារីស ចូលប្រទេសដោយត្រូវចប់អាណត្តិបេសកកម្ម ត្រូវផ្លាស់មកជាអនុរដ្ឋលេខាធិការ និងជាអ្នកនាំពាក្យក្រសួងការបរទេស និងសហប្រតិបត្តិការជំនួសលោក ជុំ សុន្ទរី។
ប៉ុន្តែតួនាទីរបស់លោក កេត សោផាន់ ដែលជាឯកអគ្គរាជទូតប្រតិភូអចិន្ត្រៃយ៍ប្រចាំអង្គការយូណេស្កូ និងជានាយកផ្ទះខ្មែរ នៅមជ្ឈមណ្ឌលសាកលវិទ្យាល័យនៅទីក្រុងប៉ារីសនោះ មិនទាន់មានអ្នកជំនួសឡើយ។ នេះបើតាមលិខិតរបស់រដ្ឋមន្ត្រីក្រសួងការបរទេស លោក ប្រាក់ សុខុន ដែលស្នើទៅកាន់សម្ដេចនាយករដ្ឋមន្ត្រី ហ៊ុន សែន សម្រេចដាក់អ្នកជំនួស៕
Tag:
ហ៊ុន សែន
ប្រាក់ សុខុន
អគ្គរាជទូត
© រក្សាសិទ្ធិដោយ thmeythmey.com