ជាតិ
ក្រសួងព័ត៌មាន៖ ប្រព័ន្ធផ្សព្វផ្សាយ ត្រូវចៀសវាងការរំលេច«ខ្លឹមសារដើមទាំងស្រុងណាដែលប៉ះពាល់អង្គព្រះមហាក្សត្រ»
× ភ្នំពេញ៖ ក្រសួងព័ត៌មាន បានណែនាំដល់បណ្ដាប្រព័ន្ធផ្សព្វផ្សាយទាំងអស់ ត្រូវចៀសវាងការដកស្រង់ខ្លឹមសារ សារជាអក្សរ សំឡេង រូបភាព វីដេអូ ពីប្រភពនានាមកផ្សព្វផ្សាយ ឬផ្សាយបន្ត ដែលធ្វើឲ្យប៉ះពាល់ដល់ព្រះរាជកិត្តិយសរបស់អង្គព្រះមហាក្សត្រ និងសន្តិសុខជាតិ។
លិខិតរបស់ក្រសួងព័ត៌មាន ចុះនៅថ្ងៃទី២៥ខែឧសភា បានសរសេរដូច្នេះថា៖«ក្រសួងបានសង្កេតឃើញមានសារព័ត៌មានមួយចំនួនបានដកស្រង់ខ្លឹមសារ សារជាអង្សរ សំឡេង រូបភាព វីដេអូ តាមបណ្ដាញទំនាក់ទំនងសង្គម និងពីប្រភពនានា មកផ្សព្វផ្សាយ ឬផ្សាយបន្ត ដោយរំលេចខ្លឹមសារដើមទាំងស្រុង ដែលសកម្មភាពនេះដូចជាកំពុងជួយផ្សព្វផ្សាយនូវសារអវិជ្ជមានទាំងនោះដោយមិនដឹងខ្លួន ហើយខ្លឹមសារអត្ថបទ រូបភាព និងវីដេអូមួយចំនួនបានធ្វើឲ្យប៉ះពាល់យ៉ាងធ្ងន់ធ្ងរដល់ ព្រះរាជកិត្តិយសព្រះមហាក្សត្រ»។
ក្រសួងបានក្រើនរំលឹកដល់បណ្ដាប្រព័ន្ធផ្សព្វផ្សាយទាំងអស់ ត្រូវថ្លឹងថ្លែងគ្រប់ទិដ្ឋភាពមុននឹងចេញផ្សាយព័ត៌មាន មិនថាផ្នែកច្បាប់ ក្រមសីលធម៌ ឬវិជ្ជាជីវៈរបស់ខ្លួននោះទេ គឺធ្វើយ៉ាងណាត្រូវគោរពកិត្តិយស វិជ្ជាជីវៈ និងសេចក្ដីថ្លៃថ្នូររបស់បុគ្គល ជាពិសេសអង្គព្រះមហាក្សត្រ ដែលត្រូវបានការពារដោយរដ្ឋធម្មនុញ្ញ ក៏ដូចជាចូលរួមថែរក្សាសុខសន្តិសុខសង្គម៕
Tag:
ព្រះមហាក្សត្រ
ប្រព័ន្ធផ្សព្វផ្សាយ
© រក្សាសិទ្ធិដោយ thmeythmey.com