កម្ពុជា-ថៃ បន្តផ្ដល់ភាពស្របច្បាប់ដល់ពលករខ្មែរដែលសល់១០ម៉ឺននាក់ទៀត នៅត្រឹមបំណាច់ខែមិថុនា

ជាតិ

កម្ពុជា-ថៃ បន្តផ្ដល់ភាពស្របច្បាប់ដល់ពលករខ្មែរដែលសល់១០ម៉ឺននាក់ទៀត នៅត្រឹមបំណាច់ខែមិថុនា

27, May 2018 , 3:59 pm

រូបភាព

រូបភាពគេហទំព័រក្រសួងការងារ

ដោយ:

ភ្នំពេញ៖ កិច្ចសហប្រតិបត្តិការ កម្ពុជា-ថៃក្នុងការផ្ដល់ភាពស្របច្បាប់ ដល់ពលករខ្មែរដែលទៅធ្វើការនៅថៃ ខុសច្បាប់នៅសល់ជាង ១០ម៉ឺននាក់ទៀតប៉ុណ្ណោះ នឹងត្រូវបញ្ចប់មុនដំណាច់ ខែមិថុនា ឆ្នាំ២០១៨។ ពលករខ្មែរជាង ៣០ម៉ឺននាក់ ភាគីទាំងពីរ បានផ្ដល់ភាពស្របច្បាប់រួចរាល់ហើយ ក្នុងចំណោមពលករខុសច្បាប់ ៤០ម៉ឺននាក់។ នេះបើតាមគេហទំព័រក្រសួងការងារ។

លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា កម្ពុជា-ថៃ បានបង្កើតកិច្ចសហប្រតិបត្តិការួមគ្នា លើវិស័យការងារ និងអប់រំបណ្ដុះបណ្ដាលបច្ចេកទេស និងវិជ្ជាជីវៈ។ លោក បន្តថា កិច្ចសហប្រតិបត្តិការនេះ ភាគីទាំងពីរបានរួមគ្នាផ្តល់ភាពស្របច្បាប់ ដល់ពលករខ្មែរដែលទៅធ្វើការនៅថៃ គ្មានឯកសារស្របច្បាប់ ជាង ៣០ម៉ឺននាក់ ក្នុងចំណោម ៤០ម៉ឺននាក់ ហើយនៅសល់តែ ១០ម៉ឺននាក់ប៉ុណ្ណោះ។

ជំនួបពិភាក្សាការងារជាមួយ លោក Panyarak Poolthup ឯកអគ្គរាជទូតថៃ ប្រចាំកម្ពុជា នាព្រឹកថ្ងៃទី២២ ខែឧសភា នេះ នៅទីស្តីការក្រសួង រដ្ឋមន្ត្រីក្រសួងការងារលើកឡើងថា កម្ពុជាបានបញ្ជូនក្រុមការងារអន្តរក្រសួងជាង ៣រយនាក់ ទៅកាន់មជ្ឈមណ្ឌលចំនួន ៣ ទៅទីក្រុងបាងកក ខេត្តបុទុមឋានី និងខេត្តរ៉ាក់យ៉ង ក្នុងកិច្ចសហប្រតិបត្តិការជាមួយភាគីថៃ ផ្តល់ភាពស្របច្បាប់ ដល់ពលករកម្ពុជា។

លោក អ៊ិត សំហេង បន្ថែមថា នៅពាក់កណ្តាលខែមិថុនា ឆ្នាំ២០១៨ នឹងដឹកនាំគណៈប្រតិភូក្រសួងការងារ ទៅបំពេញទស្សនកិច្ចផ្លូវការនៅប្រទេសថៃ ដើម្បីពិនិត្យចុងក្រោយ និងដោះស្រាយបញ្ហាដែលនៅសេសសល់៕