ខ្មែរក្រហម
ជាតិ
សង្គមជាតិ
CCHR បារម្ភពីផលប៉ះពាល់ទាក់ទងច្បាប់ប្រឆាំងអ្នកមិនទទួលស្គាល់របបខ្មែរក្រហម
× មជ្ឈមណ្ឌលសិទ្ធិមនុស្សកម្ពុជា (CCHR) នៅថ្ងៃទី៦ ខែមិថុនា ម្សិលមិញនេះបានសម្ដែងការព្រួយបារម្ភយ៉ាងខ្លាំងអំពីប៉ះពាល់មួយចំនួនលើសេរីភាពបញ្ចេញមតិនៅកម្ពុជា បន្ទាប់ពីច្បាប់ស្ដីពី «ការប្រឆាំងការមិនទទួលស្គាល់ឧក្រិដ្ឋដែលបានប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ»ត្រូវបានសភាអនុម័ត និងប្រកាសឲ្យប្រើជាផ្លូវការ។ បើតាម CCHR ច្បាប់ខាងលើនេះមិនមានភាពចាំបាច់នោះទេសម្រាប់កម្ពុជា ហើយថា វានឹងអាចផ្ទុយទៅនឹងបទបញ្ញត្តិដែលការពារសិទ្ធិសេរីភាពបញ្ចេញមតិ ដោយរដ្ឋធម្មនុញ្ញរបស់កម្ពុជា និងសន្ធិសញ្ញាអន្តរជាតិស្ដីពីសិទ្ធិមនុស្សដែលកម្ពុជាចុះហត្ថលេខាទទួលយកមកអនុវត្តនោះ។
យោងតាមសេចក្ដីប្រកាសព័ត៌មានកម្រាស់ពីរទំព័ររបស់ខ្លួននោះ CCHR បញ្ជាក់ថា ប្រសិនបើច្បាប់ខាងលើនេះពិតជាត្រូវបានសភាអនុម័តមែននោះ ច្បាប់នេះវានឹងអាចក្លាយជាឧប្បករណ៍រឹតបន្តឹងមកលើសេរីភាពបញ្ចេញមតិ តាមរយៈការដាក់កំហិតមិនត្រឹមត្រូវមកលើការពិភាក្សាជាសាធារណៈ ការសិក្សាស្រាវជ្រាវ និងការអប់រំអំពីសម័យខ្មែរក្រហម ក៏ដូចជាការប៉ុនប៉ងធ្វើឲ្យការបង្ក្រាបមតិរបស់អ្នកប្រឆាំងត្រូវបានធ្វើឡើងដោយស្របច្បាប់។
បើតាមការយល់ឃើញរបស់ CCHR នោះ ការអប់រំ ការជជែកវែកញែកពិភាក្សា និងការសិក្សាស្រាវជ្រាវជុំវិញតថភាពនៃរបបខ្មែរក្រហម មានភាពចាំបាច់ណាស់សម្រាប់កម្ពុជាក្នុងការបន្តឈានឆ្ពោះទៅមុខទៀត ដើម្បីបង្ការមិនឲ្យដានប្រវត្តសាស្ត្រនៃរបបខ្មែរក្រហមនេះកើតឡើងជាថ្មីម្ដងនៅក្នុងសង្គមកម្ពុជា ហើ់យថា វានឹងអាចផ្ទុយពីនេះប្រសិនបើច្បាប់ខាងលើត្រូវបានគេយកទៅធ្វើជាឧប្បករណ៍នយោបាយ ដើម្បីបង្ក្រាបទៅលើសំឡេងប្រឆាំង និងគ្រប់គ្រងលើកិច្ចពិភាក្សាផ្សេងៗជុំវិញរបបកម្ពុជាប្រជាធិបតេយ្យខ្មែរក្រហមនោះ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជានិយាយឲ្យដឹងផងដែរថា CCHR មិនមានចេទនាណាមួយបដិសេធចំពោះឧក្រិដ្ឋកម្មទាំងឡាយដែលបានកើតមានឡើងនៅកម្ពុជាក្នុងសម័យខ្មែរក្រហមនោះឡើយ ប៉ុន្តែ CCHR មើលមិនឃើញពីភាពចាំបាច់ដើម្បីបង្កើតឲ្យមានច្បាប់មួយនេះឡើងនោះទេ ហើយថា តាមរយៈច្បាប់នេះវានឹងអាចធ្វើឲ្យមានផលប៉ះពាល់យ៉ាងខ្លាំងដល់ប្រជាជនដែលរងគ្រោះដោយសាររបបខ្មែរក្រហមទៅវិញទេ។
លោក អ៊ូ វីរៈ បានចាត់ទុកច្បាប់នេះថាជាការទាញយកផលប្រយោជន៍ផ្នែកនយោបាយ ចេញពីប្រវត្តសាស្ត្ររបស់ប្រទេសកម្ពុជាមុនការបោះឆ្នោតជ្រើសតាំងតំណាងរាស្ត្រឈានចូលមកដល់ ហើយថា វាជាការដែលមិនអាចទទួលយកលបានផងដែរ ក្នុងករណីដែលច្បាប់រឹត្បិតសេរីភាពបញ្ចេញមតិត្រូវបានរដ្ឋាភិបាល និងសភា អនុម័តជាការប្រញាប់ ខណៈដែលច្បាប់មួយចំនួនដែលធ្វើឲ្យស្ថាបភាពបញ្ចេញបញ្ចេញមតិប្រសើឡើង ដូចជាច្បាប់ទទួលបានព័ត៌មានជាដើមនោះ ត្រូវបានពន្យាពេលយ៉ាងយូរាប់ឆ្នាំទៅវិញ។
គួរបញ្ជាក់ថា នៅព្រឹកថ្ងៃទី៧ ខែមិថុនានេះ រដ្ឋសភា ដោយមានសេចក្ដីស្នើពីរាជរដ្ឋាភិបាលនោះ កំពុងជជែកពិភាក្សាគ្នាដើម្បីឈានដល់ការអនុម័តជាផ្លូវការនូវច្បាប់ស្ដីពី«ការប្រឆាំងការមិនទទួលស្គាល់ឧក្រិដ្ឋកម្មដែលបានប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ»។
ច្បាប់នេះត្រូវបានចែកចេកចេញជា៥មាត្រា ហើយដែលខ្លឹមសាររបស់់វា គឺដាក់ទោសលើជនទាំងឡាយណាដែលមិនទទួលស្គាល់ឧក្រិដ្ឋកម្មដែលបានកើមានឡើងក្នុងអំឡុងពេលនៃការដឹកនាំរបស់ពួកខ្មែរក្រហម ដោយត្រូវផ្ដន្ទាទោសដាក់ពន្ធនាគារពី ៦ខែ ដល់ ២ឆ្នាំ និងពិន័យជាប្រាក់ចាប់ពី១លានរៀល ដល់ ៤លានរៀលផងដែរ៕
© រក្សាសិទ្ធិដោយ thmeythmey.com