មេដឹកនាំគុយបាថ្មី កែរដ្ឋធម្មនុញ្ញដើម្បីជំរុញការកែទម្រង់សេដ្ឋកិច្ចបន្ថែម តែមិនចាកឆ្ងាយពីស្មារតីសង្គមនិយម

អន្តរជាតិ

មេដឹកនាំគុយបាថ្មី កែរដ្ឋធម្មនុញ្ញដើម្បីជំរុញការកែទម្រង់សេដ្ឋកិច្ចបន្ថែម តែមិនចាកឆ្ងាយពីស្មារតីសង្គមនិយម

29, May 2018 , 11:30 am

រូបភាព

ដោយ: ថ្មីៗ

រដ្ឋាភិបាលគុយបាថ្មីក្រោយរជ្ជកាលនយោបាយកាស្ត្រូ នឹងចាប់ផ្តើមនីតិវិធីស្នើសុំវិសោធនកម្មរដ្ឋធម្មនុញ្ញាដើម្បីធ្វើយ៉ាងណាបើកចំហរសេដ្ឋកិច្ចបន្ថែមទៀត។ ប៉ុន្តែរដ្ឋាភិបាលនេះបញ្ជាក់ថា ខ្លួនមិនកែប្រែ ឬផ្លាស់ប្តូរចំណុចដែលមានចែងពីទម្រង់សេដ្ឋកិច្ចតាមបែបសង្គមនិយមឡើយ។

ថ្ងៃចន្ទដើមសប្តាហ៍កន្លងទៅ រដ្ឋាភិបាលលោក Miguel Diaz-Canel បានបង្ហើបពីគោលដៅធ្វើវិសោធនកម្មរដ្ឋធម្មនុញ្ញដើម្បីឈានបើកចំហរសេដ្ឋកិច្ចប្រទេសជាតិបន្ថែមទៀត។ ចាប់ពីត្រូវបានប្រកាសឲ្យប្រើប្រាស់ឆ្នាំ ១៩៧៦ មក រដ្ឋធម្មនុញ្ញគុយត្រូវគេកែទម្រង់បួនដង បើរាប់ទាំងលើកនេះផង។

បើតាមការចុះផ្សាយរបស់ទីភ្នាក់ងារព័ត៌មាន AFP គណៈកម្មការពិសេសមួយនឹងត្រូវបង្កើតឡើងក្នុងអង្គប្រជុំវិសមញ្ញរបស់សភាគុយបានៅថ្ងៃទី ២ ខែឧសភាខាងមុខនេះដើម្បីបង្ហាញពីសំណើរវិសោធនកម្មរដ្ឋធម្មនុញ្ញនេះ។ វានឹងមានការពិភាក្សាគ្នាច្រើនដែរក្នុងចំណោមសមាជិកសភាមុននឹងដាក់ចូលបោះឆ្នោតប្រជាមតិមួយ។

អាជ្ញាធរគុយបាមិនទាន់បង្ហាញឲ្យបានជាក់លាក់នៅឡើយទេពីសំណើរវិសោធនកម្មរដ្ឋធម្មនុញ្ញ ប៉ុន្តែគេដឹងថា វាមានកំណត់ពីការបន្តអនុវត្តគោលនយោបាយកែទម្រង់សេដ្ឋកិច្ចដែលបង្កើតឡើងដោយលោក រ៉ាអ៊ូល កាស្ត្រូ ចាប់ពីពេលលោកជំនួសតំណែងបងប្រុសលោកនៅឆ្នាំ ២០០៦។

លោក រ៉ាអ៊ូល ដែលទើបចុះចេញពីតំណែងកាលពីខែមុន តែបន្តធ្វើជាអគ្គលេខាបក្សកុម្មុយនីស្តនោះ បានដាក់ចេញផែនការកែទម្រង់សេដ្ឋកិច្ច ឆ្នាំ ២០១១ ដោយលោកប្តូរសេដ្ឋកិច្ចដែលក្តោបក្តាប់ទាំងស្រុងដោយរដ្ឋឲ្យមានជំនួញឯកជនទ្រង់ទ្រាយតូចៗ និងមានការវិនិយោគបរទេសផងដែរ។ គោលនយោបាយនេះមានផ្លែផ្កាច្រើនដែរ ប៉ុន្តែវាមិនធំល្មមអាចឲ្យសេដ្ឋកិច្ចគុយបារីកចម្រើករហ័សឡើយ។

ដូច្នេះហើយ គេរំពឹងថា ការធ្វើវិសោធនកម្មរដ្ឋធម្មនុញ្ញជាថ្មីនេះអាចនឹងជួយធានាការកែទម្រង់សេដ្ឋកិច្ចឲ្យបានទូលំទូលាយជាងមុន និងអាចធ្វើឲ្យសេដ្ឋកិច្ចគុយបាកាន់តែរីកចម្រើនរហ័សជាងមុនផងដែរ៕