អន្តរជាតិ
រដ្ឋាភិបាលមហាធៀ ធានាសេរីភាពព័ត៌មានសម្រាប់ប្រព័ន្ធផ្សព្វផ្សាយ ជាពិសេសអាចរិះគន់រដ្ឋាភិបាលបានស្រួល រូបភាព Malay Mail
× រដ្ឋមន្ត្រីទំនាក់ទំនង និងប្រព័ន្ធផ្សព្វផ្សាយម៉ាឡេស៊ីបានបញ្ជាក់ជាថ្មីពីការគាំទ្រ និងធានាសេរីភាពសារព័ត៌មានរបស់រដ្ឋាភិបាលលោក មហាធៀ មហាម៉ាត់។ លោកបានបញ្ជាក់ថា ប្រព័ន្ធផ្សព្វផ្សាយមានសេរីភាពច្រើនជាងមុនក្នុងពេលបំពេញការងាររបស់ខ្លួន រួមទាំងមានសេរីភាពរិះគន់រដ្ឋាភិបាលបានដែរ។
ការផ្តល់សេរីភាពសារព័ត៌មានទូលំទូលាយជាផ្នែកមួយនៃការកែទម្រង់ស្ថាប័នរបស់រដ្ឋាភិបាលថ្មីដឹកនាំដោយសម្ព័ន្ធគណបក្ស Pakatan Harapan និងមានលោក មហាធៀ មហាម៉ាត់ជាប្រមុខ។ នេះជាការលើកឡើងរបស់រដ្ឋមន្ត្រីទទួលបន្ទុកព័ត៌មានថ្មីរបស់ម៉ាឡេស៊ីលោក Gobind Singh Deo ។
ក្នុងបទសម្ភាសន៍មួយផ្តាច់មុខជាមួយទីភ្នាក់ងារព័ត៌មានម៉ាឡេស៊ី Bernama លោករដ្ឋមន្ត្រីថ្មីនេះបាននិយាយថា រាល់ប្រព័ន្ធផ្សព្វផ្សាយក្នុងប្រទេសគួរតែទទួលបានសេរីភាពច្រើនជាងនេះក្នុងការបំពេញការងារខ្លួន ក៏ដូចជាក្នុងការរិះគន់រដ្ឋាភិបាលដើម្បីធានាការអភិវឌ្ឍដែរ។
«ប្រព័ន្ធផ្សព្វផ្សាយជាសំឡេងរបស់ប្រជាជន ហើយរដ្ឋាភិបាលក៏គួរតែត្រៀមខ្លួនទទួលយកការរិះគន់ដែរដើម្បីឲ្យយើងអាចធានាការកែទម្រង់បានជោគជ័យ។ ការយកចិត្តទុករបស់យើងគឺលើប្រជាជនដែលអាចទទួលបានសិទ្ធិក្នុងការបញ្ចេញយោបល់ និងការយល់ឃើញរបស់ខ្លួនរួមជាអ្នកដែលប្រឆាំងផង។ ដូច្នេះហើយគេអាចវាយតម្លៃតាមការយល់ឃើញរបស់ខ្លួនដូចគ្នា»។ នេះជាការបញ្ជាក់របស់រដ្ឋមន្ត្រី Gobind Sign ពេលលោកទៅទស្សនកិច្ចទីភ្នាក់ងារព័ត៌មានរដ្ឋខាងលើនេះ។
ក្រៅពីធានាផ្តល់សេរីភាពបន្ថែមដល់ប្រព័ន្ធផ្សព្វផ្សាយ លោក Sign បាននិយាយផងដែរថា រដ្ឋាភិបាលក៏នឹងបន្តយកចិត្តទុកដាក់លើការលើកកម្ពស់ការងាររបស់ប្រព័ន្ធផ្សព្វផ្សាយម៉ាឡេស៊ីជាពិសេសទីភ្នាក់ងារព័ត៌មានរដ្ឋ និងត្រៀមស្តាប់មតិយោបល់ ក៏ដូចជាការត្អូញត្អែរ ឬបញ្ហាប្រឈមរបស់អ្នកសារព័ត៌មានផងដែរ។
នេះជាគោលនយោបាយរបស់រដ្ឋាភិបាលក្នុងការកែទម្រង់ ឬអភិវឌ្ឍប្រព័ន្ធផ្សព្វផ្សាយក្នុងស្រុក ហើយវាក៏ជួយឲ្យប្រព័ន្ធផ្សព្វផ្សាយក្នុងស្រុកមានលទ្ធភាពទាញអ្នកទស្សនាបានច្រើនដែលអាចប្រជែងជាមួយសារព័ត៌មានបរទេសដែរ។
យ៉ាងណាក៍ដោយ រដ្ឋមន្ត្រីព័ត៌មានរូបនេះក៏ដាស់តឿនឲ្យបណ្តាប្រព័ន្ធផ្សព្វផ្សាយ និងអ្នកសារព័ត៌មានបន្តអនុវត្តវិជ្ជាជីវៈខ្លួនឲ្យបានខ្ជាប់ខ្ជួន និងអនុវត្តការងារតាមច្បាប់ និងលិខិតបទដ្ឋានដែលមានកំណត់ផងដែរ។
តាមពិតទៅ ក្រោយពេលស្បថចូលកាន់តំណែង លោករដ្ឋមន្ត្រី Sign បានប្រកាសថា ក្រសួងលោកបានស្នើទៅរដ្ឋាភិបាលដើម្បីនិរាករណ៍ច្បាប់ដ៏ចម្រូងចម្រាសប្រឆាំងព័ត៌មានក្លែងក្លាយ ដែលដាក់អនុវត្តដោយរដ្ឋាភិបាលលោក ណាជីប រ៉ាហ្សាក់ផង។ អ្នកសារព័ត៌មានម៉ាឡេស៊ីសាទរចំណាត់របស់រដ្ឋាភិបាលលោក មហាធៀ ព្រោះរដ្ឋាភិបាលនេះមានគោលដៅការពារសេរីភាពសារព័ត៌មាន និងសេរីភាពបញ្ចេញមតិផងដែរ៕
Tag:
មហាធៀ មហាម៉ាត់
Gobind Singh Deo
សេរីភាពសារព័ត៌មាន
© រក្សាសិទ្ធិដោយ thmeythmey.com