អតីតមេចារកម្មកូរ៉េខាងជើងធ្វើដំណើរទៅអាមេរិកដើម្បីរៀបចំជំនួបត្រាំ-គីម

អន្តរជាតិ

អតីតមេចារកម្មកូរ៉េខាងជើងធ្វើដំណើរទៅអាមេរិកដើម្បីរៀបចំជំនួបត្រាំ-គីម

29, May 2018 , 9:39 pm

រូបភាព

លោក គីម យ៉ុងឈុល (កណ្ដាល) អនុប្រធានគណៈកម្មាធិការមជ្ឈិមបក្សពលករកូរ៉េ នាដំណើរទស្សនកិច្ចនៅកូរ៉េខាងត្បូងកន្លងមក

ដោយ: តន ចាន់រិទ្ធារ៉ា

មន្ត្រីជាន់ខ្ពស់កូរ៉េខាងជើង គីម យ៉ុងឈុល (Kim Yong-chol) នឹងហោះទៅអាមេរិកដើម្បីចូលរួមកិច្ចប្រជុំថ្នាក់មន្ត្រីការងារជាមួយមន្ត្រីអាមេរិក។ នេះជារឿងកម្រមួយដែលមន្ត្រីថ្នាក់ខ្ពស់របស់កូរ៉េខាងជើងធ្វើដំណើរទៅកាន់ទឹកដីអាមេរិកក្នុងរយៈពេលជិត២០ឆ្នាំមកនេះ។ វត្តមានរបស់លោក គីម នៅអាមេរិក នឹងផ្ដោតសំខាន់លើគម្រោងជួបគ្នារវាងមេដឹកនាំប្រទេសទាំងពីរនៅខែក្រោយ។

លោក គីម យ៉ុងឈុល ដែលជាអតីតប្រធានចារកម្មរបស់កូរ៉េខាងជើង បានឈប់សម្រាកនៅទីក្រុងប៉េកាំងដើម្បីរង់ចាំជើងយន្តហោះ មុនបន្តដំណើរទៅកាន់ទឹកដីអាមេរិកដើម្បីជួបជាមួយមន្ត្រីរដ្ឋបាលប្រធានាធិបតី ដូណាល់ ត្រាំ ។ នេះបើតាមការផ្សាយរបស់ទីភ្នាក់ងារព័ត៌មាន Yonhap នៅថ្ងៃទី២៩ ខែឧសភា។

ដំណើរទៅកាន់អាមេរិករបស់លោក គីម ធ្វើឡើងស្របពេលដែលអាមេរិក និងកូរ៉េខាងជើងកំពុងខ្វែងដៃខ្វែងជើងក្នុងការរៀបចំជំនួបប្រវត្តិសាស្ត្ររវាងលោក ត្រាំ និងមេដឹកនាំកូរ៉េខាងជើង គីម ជុងអ៊ុន ។

លោក គីម យ៉ុងឈុល ដែលជាអនុប្រធានគណៈកម្មាធិការមជ្ឈិមបក្សពលករកូរ៉េ បានដើរតួយ៉ាងសំខាន់ក្នុងនយោបាយការបរទេសរបស់កូរ៉េខាងជើងនារយៈពេលចុងក្រោយនេះ។ លោកទទួលបន្ទុកការចរចាជាមួយកូរ៉េខាងត្បូងនាពេលកន្លងមក ក៏ដូចជាកិច្ចការជាមួយអាមេរិកផង។ គេជឿថា លោកបានជួបជាមួយរដ្ឋមន្ត្រីការបរទេសអាមេរិក Mike Pompeo ក្នុងទស្សនកិច្ចសម្ងាត់ពីរដងនៅរដ្ឋធានីព្យុងយ៉ាង។

សម្រាប់ដំណើរទស្សនកិច្ចដ៏កម្រនេះ មន្ត្រីកូរ៉េខាងជើងរូបនេះនឹងត្រូវជួបចរចាជាមួយលោក Mike ក្នុងកិច្ចប្រជុំថ្នាក់មន្ត្រីការងារ។ ប្រធានបទសំខាន់នៃកិច្ចប្រជុំអាចគ្មានអ្វីក្រៅពីការជជែកលើលទ្ធភាពជំនួបលោក ត្រាំ និងលោក គីម ដែលគ្រោងធ្វើនៅសិង្ហបុរីឡើយ ហើយគេក៏ជឿថា ជាជំនួបថ្នាក់ក្រុមការងារនេះមានគោលដៅជជែកជាចុងក្រោយលើការរៀបចំសម្រាប់ការចរចាជាប្រវត្តិសាស្ត្រនៅខែក្រោយឲ្យបានស្រេចបាច់។

ស្របគ្នានេះដែរ មន្ត្រីអាមេរិក និងកូរ៉េខាងជើងក៏បានជួបគ្នាក្នុងជំនួបពីរដាច់ដោយឡែកទៀតលើការរៀបចំជំនួបនេះដែរ។ នៅតំបន់គ្មានយោធានៃឧបទ្វីបកូរ៉េ មន្ត្រីក្រុងវ៉ាស៊ីនតោន និងក្រុងព្យុងយ៉ាងបានជួបគ្នាដើម្បីជជែកពីរបៀបវារៈនៃជំនួបកំពូល ក៏ដូចជាមធ្យោបាយរំសាយនុយក្លេអ៊ែរដែរ។ ចំណែកនៅសិង្ហបុរិវិញ មន្ត្រីសេតវិមានក៏ជួបជាមួយមន្ត្រីជំនិតរបស់ប្រមុខដឹកនាំកូរ៉េខាងជើងដើម្បីពិភាក្សាពីពិធីការ ការធ្វើដំណើរ និងសន្តិសុខជាដើម។

ជុំវិញជំនួបដែលស្លាប់ហើយ តែស្រាប់មានដង្ហើមឡើងវិញនេះ ការខ្វែងគំនិតរវាងអាមេរិក និងកូរ៉េខាងជើងអាចកើតមានលើរបៀបរំសាយនុយក្លេអ៊ែររបស់កូរ៉េខាងជើងតែម្ដង។ អាមេរិកចង់បានការលុបបំបាត់នុយក្លេអ៊ែរដែលធ្វើឡើងម្ដងចប់សព្វគ្រប់ មានការត្រួតពិនិត្យ និងមិនអាចវិលត្រឡប់ទៅក្រោយឡើយ មុននឹងអាមេរិកលើកលែងទណ្ឌកមម។ ប៉ុន្តែកូរ៉េខាងជើងចង់ឲ្យមានការរំសាយនុយក្លេអ៊ែរនេះជាដំណាក់កាល និងធ្វើឡើងព្រមគ្នាជាមួយនឹងការព្យួរទណ្ឌកម្ម៕