ប្រមុខការទូតរុស្ស៊ីស្នើឲ្យសហគមន៍អន្តរជាតិដកទណ្ឌកម្មប្រឆាំងកូរ៉េខាងជើង មុនជំនួបត្រាំ-គីម

អន្តរជាតិ

ប្រមុខការទូតរុស្ស៊ីស្នើឲ្យសហគមន៍អន្តរជាតិដកទណ្ឌកម្មប្រឆាំងកូរ៉េខាងជើង មុនជំនួបត្រាំ-គីម

31, May 2018 , 3:45 pm

រូបភាព

ដោយ: ថ្មីៗ

ប្រមុខការទូតរុស្ស៊ីសឺហ្គេ ឡាវរ៉ូវ (Sergei Lavrov) អញ្ជើញទៅដល់ក្រុងព្យុងយ៉ាងនៅថ្ងៃព្រហស្បតិ៍ទី ៣១ ខែឧសភានេះ ដោយលោកបានអំពាវនាវឲ្យមានការដកទណ្ឌកម្មប្រឆាំងកូរ៉េខាងជើង។ លោកនឹងជជែកពីស្ថានភាពឧបទ្វីបកូរ៉េ និងទំនាក់ទំនងទ្វេភាគី ស្របពេលដែលជំនួបរវាងលោក គីម និងប្រធានាធិបតីអាមេរិក អាចនឹងកើតឡើងឆាប់ៗ។

គ្មានការប្រកាសជាមុនឡើយពីសំណាក់ក្រុងព្យុងយ៉ាងដំណើរទស្សនកិច្ចរបស់រដ្ឋមន្ត្រីការបរទេសរុស្ស៊ីលោក ឡាវរ៉ូវនេះ។ ប៉ុន្តែទីភ្នាក់ងារព័ត៌មានចិន Xinhua បានបញ្ជាក់ថា ដំណើរទស្សនកិច្ចនេះធ្វើឡើងតបតាមការអញ្ជើញរបស់សមភាគីកូរ៉េខាងជើង Ri Yong Ho តាំងពីខែមេសាពេលលោកទៅទស្សនកិច្ចនៅក្រុងម៉ូស្គូ។

បើតាមការបញ្ជាក់របស់ក្រសួងការបរទេសរុស្ស៊ី ទស្សនកិច្ចរបស់លោក ឡាវរ៉ូវ មានរយៈពេលត្រឹមតែមួយថ្ងៃប៉ុណ្ណោះ។ ពេលស្ថិតក្នុងក្រុងព្យុងយ៉ាងនេះ ប្រមុខការទូតរុស្ស៊ីរូបនេះត្រូវជួបពិភាក្សាជាមួយប្រមុខការទូតកូរ៉េខាងជើងលោក Ri ហើយអ្នកទាំងពីរត្រូវជជែកលើបញ្ហាសំខាន់ជាពិសេសស្ថានភាពជារួមនៅឧបទ្វីបកូរ៉េ បញ្ហាប្រឈមអន្តរជាតិ រួមជាមួយទំនាក់ទំនងទ្វេភាគីផង។

ពេលអញ្ជើញដល់ព្យុងយ៉ាងភ្លាម ប្រមុខការទូតរុស្ស៊ីរូបនេះបានស្នើឲ្យមានការដកទណ្ឌកម្មប្រឆាំងកូរ៉េខាងជើងចេញដែរ ដោយលោកលើកហេតុផលថា កូរ៉េខាងជើងប្រហែលជាមិនបោះបង់អាវុធឡើយ ដរាបណាទណ្ឌកម្មមិនត្រូវគេបន្ធូរបន្ថយនោះ។

ក្រៅពីជួបជាមួយរដ្ឋមន្ត្រីការបរទេសកូរ៉េខាងជើង គេរំពឹងថា លោក ឡាវរ៉ូវ ក៏អាចនឹងជួបសម្តែងការគួរសមជាមួយមេដឹកនាំកំពូលកូរ៉េខាងជើងលោក គីម ជុងអ៊ុន ផងដែរ ដោយអ្នកទាំងពីរក៏ប្រហែលជានឹងពិភាក្សាពីបញ្ហាធំៗមួយចំនួនដែរ។

លោក ឡាវរ៉ូវ ធ្លាប់ធ្វើដំណើរទៅកាន់កូរ៉េខាងជើងម្តងដែរនៅក្នុងឆ្នាំ ២០០៩ ពេលដែលលោកបានចូលរួមក្នុងកិច្ចចរចាអន្តរជាតិដើម្បីជំរុញការរំសាយអាវុធនុយក្លេអ៊ែរកូរ៉េខាងជើង។

តាមពិតទៅដំណើរទស្សនកិច្ចនេះកើតឡើងនៅពេលដែលប្រទេសទាំងពីររៀបចំខួបលើកទី ៧០ នៃការបង្កើតចំណងការទូតរួមគ្នានៅឆ្នាំនេះដែរ។ ថ្វីបើមានទំនាក់ទំនងការទូតយូរអង្វែងក៏ដោយ ឥទ្ធិពលរុស្ស៊ីលើរបបដឹកនាំកូរ៉េខាងជើងហាក់ថមថយជាបន្តបន្ទាប់ ប៉ុន្តែចិននៅរក្សាឥទ្ធិពលខ្លួនបានខ្លាំងដដែរ។ ដូចឃើញស្រាប់លោក គីម ជុងអ៊ុន ជួបជាមួយប្រមុខរដ្ឋចិនលោក ស៊ី ជិនភីង ពីរដងរួចទៅហើយក្នុងរយៈពេលប៉ុន្មានខែចុងក្រោយនេះ ដោយលោក គីម ហាក់ដូចជាព្យាយាមសុំយោបល់មហាយក្សចិនដែរមុនពេលចរចាជាមួយអាមេរិកនោះ។

វាមិនមែនជារឿងចម្លែកទេ ឥទ្ធិពលរុស្ស៊ីមិនមែនធ្លាក់ចុះតែនៅក្នុងបញ្ហាកូរ៉េឡើយ តែធ្លាក់ចុះនៅលើឆាកអន្តរជាតិដែរ។ ថមថយឥទ្ធិពល ដោយសារខ្លាឃ្មុំទឹកកករុស្ស៊ីនេះបន្តរងទណ្ឌកម្មសហគមន៍អន្តរជាតិរហូតមកដល់បច្ចុប្បន្នដោយសារការក្រសោបយកទឹកដីគ្រីមៀ ពីអ៊ុយក្រែននៅក្នុងឆ្នាំ ២០១៤។

ដោយឡែក វត្តមានរបស់ប្រមុខការទូតរុស្ស៊ីនៅព្យុងយ៉ាងក៏គាប់ជួបពេលដែលមន្ត្រីអាមេរិក និងកូរ៉េខាងជើងបន្តការងារសស្រាក់សស្រាំដើម្បីរៀបចំជំនួបកំពូលរវាងលោក គីម ជុងអ៊ុន ជាមួយលោក ដូណាល់ ត្រាំ នៅសិង្ហបុរីដែរ។ គេរំពឹងថា ជំនួបដែលស្លាប់ហើយ រស់ឡើងវិញនេះនឹងត្រូវរៀបចំឡើងនៅថ្ងៃ ១២ ខែមិថុនាខាងមុខ ហើយការរំសាយអាវុធនុយក្លេអ៊ែរជាចំណុចស្នូលនៃកិច្ចប្រជុំប្រវត្តិសាស្ត្រនេះ៕