ជាតិ
ថៃតាមចាប់យុវជនខ្មែរដល់ផ្ទះ ដោយសារប្រឌិត Fake News ពីលោក ប្រាយុទ្ធ?
× ភ្នំពេញ៖ យុវជនកម្ពុជាម្នាក់ ត្រូវបានសមត្ថកិច្ចចាប់ខ្លួន ដោយសារប្រឌិតព័ត៌មានមិនពិត ពីសម្ដីរបស់នាយករដ្ឋមន្ត្រីថៃ។ នេះបើតាមការចុះផ្សាយរបស់សារព័ត៌មាន Bangkok Post។
ប៉ូលិសថៃ បានមកចាប់យុវជនកម្ពុជាម្នាក់ នៅភ្នំពេញ ទាក់ទងនឹងការផ្សព្វផ្សាយព័ត៌មានមិនពិត ពីនាយករដ្ឋមន្ត្រីថៃលោក ប្រាយុទ្ធ ចន្ទអូចា។ មន្ត្រីប៉ូលិសជាន់ខ្ពស់ថៃ លោក Surachate Hakparn បាននិយាយថា ប៉ូលិសជំនាញបទឧក្រិដ្ឋបច្ចេកវិទ្យាថៃ បានមកចាប់ខ្លួនយុវជនកម្ពុជា ជំនាញផ្នែក IT (Information Technology ) កាលពីថ្ងៃ៣០ ឧសភា ក្រោយពីរកឃើញថា យុវជនរូបនេះ បានសរសេរអក្សរជាភាសាថៃ នៅលើវេបសាយមួយ (ratstas.com ) ដែលស្រង់សម្ដីមិនពិតពីនាយករដ្ឋមន្ត្រីថៃ មកចុះផ្សាយ។
សំណេរយុវជនខាងលើ ដែលខាងប៉ូលិសថៃ ចាត់ទុកជាកំហុសឆ្គង ហើយបានសារព័ត៌មានBangkok Post ចុះផ្សាយនោះ បានសរសេរដូច្នេះថា៖«នាយករដ្ឋមន្ត្រីថៃ បានប្រាប់ឲ្យប្រជាជនថៃ ចាក់ទឹកជំនួសសាំងវិញ នៅពេលដែលមានការចោទសួរពីរឿងសាំងឡើងថ្លៃ»។ ប៉ុន្តែពាក្យសម្ដីនេះ ត្រូវបានមន្ត្រីប៉ូលិសជាន់ខ្ពស់ថៃ លោក Surachate Hakparn បដិសេធថា នាយករដ្ឋមន្ត្រីថៃ មិនបាននិយាយដូចការសរសេរយុវជនកម្ពុជានេះឡើយ។
សារព័ត៌មាន Bangkok Post បានចុះផ្សាយទៀតថា មន្ត្រីជាន់ខ្ពស់ថៃ និងមកជួបជាមួយមន្ត្រីជាន់ខ្ពស់កម្ពុជា នៅថ្ងៃសុក្រនេះ ដើម្បីពិនិត្យមើលលើករណីយុវជនខាងលើ។ ហើយបើរកឃើញអត្តសញ្ញាណពិត ថាយុវជនខាងលើ ពិតជាបានប្រព្រឹត្តមែននោះ ភាគីថៃ នឹងបន្តនីតិវិធី ធ្វើបត្យាប័នលើយុវជនកម្ពុជា។
ក្នុងករណីនេះ យុវជនកម្ពុជា អាចប្រឈមមុខកាត់ទោសជាប់ពន្ធនាគារ៥ឆ្នាំ និងពិន័យជាប្រាក់១សែនបាត (ជាង៣ពាន់ដុល្លារ) តាមច្បាប់របស់ប្រទេសថៃ។ នេះបើតាម Bangkok Post។
តែយ៉ាងណាព័ត៌មាននេះ ត្រូវបានមន្ត្រីជាន់ខ្ពស់កម្ពុជា អះអាងថា មិនទាន់រកឃើញមានករណីចាប់ជនជាតិកម្ពុជា ដូចការចុះផ្សាយរបស់សារព័ត៌មានថៃឡើយ។ ទាំងលោក គៀត ច័ន្ធថារិទ្ធ អ្នកនាំពាក្យអគ្គស្នងការនគរបាលជាតិ និងលោក ខៀវ សុភ័គ អ្នកនាំពាក្យក្រសួងមហាផ្ទៃ សុទ្ធតែអះអាងប្រាប់សារព័ត៌មានថ្មីៗដូចគ្នាថា រូបលោក បានឆែករបាយការណ៍ និងព័ត៌មានពីគ្រប់មន្ត្រីជំនាញគ្រប់ជាន់ថ្នាក់ រួមទាំងស្នងការរាជធានី-ខេត្ត ដែរ ប៉ុន្តែមិនទទួលបានព័ត៌មាននេះទេ។
បន្ថែមពីនេះអ្នកនាំពាក្យក្រសួងមហាផ្ទៃ លោក ខៀវ សុភ័គ ដែលឮពីការចុះផ្សាយព័ត៌មានខាងលើដែរនោះ បានបកស្រាយថា ព័ត៌មានចាប់ខ្លួនជនជាតិខ្មែរនេះ អាចជាព័ត៌មានមិនពិត(Fake News) ។ ប៉ុន្តែលោកថា ក្រសួងមហាផ្ទៃ នឹងបន្តតាមដានព័ត៌មានខាងលើនេះ។ «យើងគ្រាន់តែឭ និងឃើញការចុះផ្សាយព័ត៌មាននេះ ប៉ុន្តែយើងបានទាក់ទងទៅមន្ត្រីជំនាញ និងសមត្ថកិច្ចគ្រប់លំដាប់ថ្នាក់ដែរ តែពួកគេថា គ្មានករណីប៉ូលិសថៃចាប់ខ្លួន ជនជាតិខ្មែរឡើយ»។
នៅពេលសួរថា តើកម្ពុជា និងថៃ មានកិច្ចព្រមព្រៀងស្តីពីការចាប់ខ្លួន អ្នកដែលសរសេរព័ត៌មានប៉ះពាល់នាយករដ្ឋមន្ត្រីថៃដែរទេ? លោក ខៀវ សុភ័គ អះអាងថា កម្ពុជាគ្មានកិច្ចព្រមព្រៀងអ្វីជាមួយថៃឡើយ។ ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងមហាផ្ទៃរូបនេះ បានបញ្ជាក់ដូច្នេះថា៖«យើងគ្មាន«ខ» សន្យា ឬកិច្ចព្រមព្រៀងអ្វីជាមួយថៃទេ ហើយយើងជាខ្មែរ យើងមានឈាមខ្មែរដូចគ្នា ដូច្នេះយើងគ្មានអ្វីត្រូវចាប់ខ្លួនខ្មែរ ឬធ្វើបត្យាប័នបញ្ជូនទៅថៃ ដើម្បីទទួលទោសនោះទេ»។
តាមរយៈការចុះផ្សាយរបស់សារព័ត៌មាន Bangkok Post អមជាមួយរូបភាពមួយសន្លឹក បានបង្ហាញថា សមត្ថកិច្ច ដែលបានមកចាប់យុវជនកម្ពុជា នៅទីក្រុងភ្នំពេញ គឺសុទ្ធតែជាប៉ូលិសថៃ។ ចំណែកនៅប្រទេសថៃ មានមនុស្សចំនួន៦នាក់ហើយ ដែលត្រូវបានសមត្ថកិច្ចចាប់ខ្លួន ពីបទចែករំលែកព័ត៌មាន ដែលវាយប្រហារលើប្រមុខរដ្ឋាភិបាលថៃដែរ៕
Tag:
ប្រាយុទ្ធ ចន្ទអូចា
Fake News
© រក្សាសិទ្ធិដោយ thmeythmey.com