ជាតិ
មហាផ្ទៃ រំឭក NGO កុំឲ្យធ្វើសកម្មភាពអ្វីដែលល្មើសច្បាប់ ក្នុងអំឡុងពេលបោះឆ្នោត រូបពីហ្វេសប៊ុកលោក ខៀវ សុភ័គ
× ភ្នំពេញ៖ ក្រសួងមហាផ្ទៃ រំឮកដល់អង្គការសង្គមស៊ីវិល ដោយហាមធ្វើសកម្មភាពអ្វីមួយ ដែលល្មើសច្បាប់ នៅក្នុងអំឡុងពេលបោះឆ្នោត។ អង្គការសង្គមស៊ីវិល យល់ថា ការរំឭករបស់ក្រសួងនេះ គឺជារឿងល្អសម្រាប់អង្គការសង្គមស៊ីវិល ដែលធ្វើការងារពាក់ព័ន្ធនឹងការបោះឆ្នោត។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានរំឭកថា អង្គការសង្គមស៊ីវិល មិនត្រូវមានសកម្មភាពណាមួយ ពាក់ព័ន្ធនឹងការបោះឆ្នោតឡើយ។ ជាពិសេសការរៀបចំឲ្យមានបន្ទប់ស្ថានការណ៍ វាយតម្លៃការបោះឆ្នោត គឺមិនត្រូវរៀបចំឡើងជាដាចខាត។
ថ្លែងប្រាប់សារព័ត៌មានថ្មីៗ លោក ខៀវ សុភ័គ បានបញ្ជាក់ដូច្នេះថា៖«សង្គមស៊ីវិលត្រូវធ្វើអ្វី ដែលវាប្រព្រឹត្តទៅតាមច្បាប់ ដែលបានអនុញ្ញាតកុំធ្វើលើសហ្នឹង។ ហើយបន្ទប់ស្ថានការណ៍យើងបិទមិនឲ្យមានតែម្ដង»។
បន្ថែមពីនេះក្រសួងមហាផ្ទៃ នឹងតាមដានមើលសកម្មភាពរបស់អង្គការស៊ីវិលផងដែរ អំឡុងពេលនៃការបោះឆ្នោតនេះ។ នេះបើតាមលោក ខៀវ សុភ័គ។
ទាក់ទងបញ្ហានេះគណៈកម្មាធិការជាតិរៀបចំការបោះឆ្នោត (គ.ជ.ប) ព្រមានចាត់វិធានការលើគណបក្សនយោបាយ និងអង្គការសង្គមស៊ីវិលណា ដែល គ.ជ.ប មើលឃើញថា ជាសកម្មភាពល្មើសច្បាប់ ដែលនាំឲ្យប៉ះពាល់ដល់ដំណើរការបោះឆ្នោត។ ប្រធាន គ.ជ.ប លោក ស៊ិក ប៊ុនហុក បាននិយាយថា គ.ជ.ប បានដាក់សំណើទៅគណៈបញ្ជាការសន្តិសុខអចិន្ត្រៃយ៍ នៃក្រសួងមហាផ្ទៃរួចហើយ ក្នុងការអនុវត្តច្បាប់ទៅអង្គការសង្គមស៊ីវិល និងគណបក្សនយោបាយ ដែលប្រព្រឹត្តខុស។
ថ្លែងក្នុងពិធីបិទវគ្គបណ្ដុះបណ្ដាលស្តីពីការជ្រើសរើសតំណាងរាស្ត្រ នីតិកាលទី៦ ប្រធានគ.ជ.បរូបនេះ បានបញ្ជាក់ដូច្នេះថា៖«ខ្ញុំអំពាវនាវដល់គណបក្សនយោបាយ និងអង្គការមិនមែនរដ្ឋាភិបាល ក្នុងពេលបោះឆ្នោតខាងមុខនេះ សូមមេត្តាគោរពឲ្យបានតាមច្បាប់ បទបញ្ជារ នីតិវិធី សម្រាប់ការឃោសនាបោះឆ្នោត ។ ហើយកុំធ្វើសកម្មភាពអ្វីល្មើសនឹងច្បាប់ ល្មើសនឹងបទបញ្ជារ នីតិវិធី និងល្មើសក្រមសីលធម៌ ទាំងគណបក្សនយោបាយ ទាំងអង្គការមិនមែនរដ្ឋាភិបាល ហើយឲ្យតែល្មើសគឺ គ.ជ.ប អនុវត្តតាមច្បាប់ហើយ»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិក បាននិយាយថា ការរំឭករបស់ស្ថាប័នមានសមត្ថកិច្ចខាងលើនេះ គឺជារឿងល្អសម្រាប់អង្គការសង្គមស៊ីវិល ដែលធ្វើការងារពាក់ព័ន្ធនឹងការបោះឆ្នោត ។ សម្រាប់លោក មិនមានការព្រួយបារម្ភពីបញ្ហាអនុវត្តច្បាប់ឡើយ ព្រោះតែលោក ជឿជាក់ថា ស្ថាប័នខ្លួន នឹងអនុវត្តត្រឹមត្រូវតាមនីតិវិធីច្បាប់។
«តាំងពីក្រសួងមហាផ្ទៃហាមមិនឲ្យសង្គមស៊ីវិល រៀបចំបន្ទប់ស្ថានការណ៍ ក្នុងឆ្នាំ២០១៧មក យើងក៏បានប្រកាសអនុវត្តតាមការណែនាំរបស់ក្រសួងមហាផ្ទៃ។ ហើយក្នុងនាមយើងជាសង្គមស៊ីវិល យើងមិនដែលធ្វើអ្វីដែលខុសពីច្បាប់អង្គការ និងច្បាប់ដែលក្រសួងកំណត់ទេ។ ដូច្នេះយើងមិនព្រួយបារម្ភឡើយ»។ នេះបើតាមលោក សំ គន្ធាមី ។
បើតាម គ.ជ.ប គណបក្សនយោបាយទាំង២០ អាចចាប់ផ្ដើមយុទ្ធនាការឃោសនាបោះឆ្នោត ចាប់ពីថ្ងៃទី២០ ដល់២៧ ខែកក្កដា ។ ការបោះឆ្នោតជ្រើសរើសតំណាងរាស្ត្រ នីតិកាលទី៦ នឹងប្រព្រឹត្តទៅនៅថ្ងៃទី២៩ កក្កដា៕
Tag:
ស៊ិក ប៊ុនហុក
គ.ជ.ប
NGO
© រក្សាសិទ្ធិដោយ thmeythmey.com