ជាតិ
សេដ្ឋកិច្ច
ក្រសួងពាណិជ្ជកម្ម អាចនឹងរកចំណាត់ការការទូត លើករណីបន្លំអង្ករខ្មែរនៅទីផ្សារប្រទេសកាណាដា
× ភ្នំពេញ៖ ក្រសួងពាណិជ្ជកម្ម នឹងស្វែងរកប្រភពបទល្មើសដែលបានក្លែងបន្លំអង្ករខ្មែរនៅទីផ្សារប្រទេសកាណាដា ដើម្បីចាត់វិធានការតាមមធ្យោបាយការទូត និងផ្លូវច្បាប់ចំពោះករណីនេះ។ នេះបើតាមសេចក្ដីប្រកាសព័ត៌មានរបស់ក្រសួង នៅថ្ងៃទី៣១ខែឧសភា។
ក្រសួងពាណិជ្ជកម្ម ទទួលបានព័ត៌មានពីការបន្លំអត្តសញ្ញាណរបស់ទំនិញអង្ករបរទេស (ថៃឡង់ដ៏) ដែលមានដាក់រូបប្រាសាទអង្គរវត្ត និងឈ្មោះជាខេមរៈភាសាថា អង្ករក្រអូបពិសេស ដើម្បីបំភ័ន្តអ្នកប្រើប្រាស់ពីប្រភពដើមទំនិញ។
ចំពោះទំនិញអង្ករដែលមានការបន្លំដូចខាងលើនេះ មានដាក់លក់នៅក្នុងទីក្រុងម៉ុងរ៉េអាល់ ប្រទេសកាណាដាតែប៉ុណ្ណោះ គឺពុំមានដាក់លក់នៅទីផ្សារប្រទេសផ្សេងៗទៀតឡើយ។ នេះជាការស្រាវជ្រាវបឋមរបស់ក្រសួងពាណិជ្ជកម្ម ដែលមិនទាន់អាចអះអាងថា អង្ករបន្លំអត្តសញ្ញាណនេះ ត្រូវបាននាំចេញពីប្រទេសថៃ ឬពីកម្ពុជា នៅឡើយ។
ក្រសួងពាណិជ្ជកម្ម បានសង្កត់ធ្ងន់ថា ស្ថាប័នខ្លួននឹងសិក្សាស្រាវជ្រាវបន្ថែមទៀត ដើម្បីចាត់វិធានការតាមមធ្យោបាយការទូត និងផ្លូវច្បាប់នានា ដើម្បីស្វែងរកប្រភព និងបុគ្គលល្មើស សំដៅបញ្ឈប់ការចរាចរទំនិញក្លែងបន្លំអត្តសញ្ញាណនេះ។
បើតាមក្រសួងពាណិជ្ជកម្ម ការនាំចេញអង្ករពីកម្ពុជាទៅកាន់ទីផ្សារអន្តរជាតិ ជាពិសេសទីផ្សារសហគមន៍អឺរ៉ុប សហរដ្ឋអាមេរិក និងកាណាដា គឺត្រូវបានឆ្លងកាត់ការត្រួតពិនិត្យ និងផ្ទៀងផ្ទាត់យ៉ាងហ្មត់ចត់ ពីស្ថាប័នមានសមត្ថកិច្ចរបស់រដ្ឋាភិបាល ចាប់តាំងពីដំណាក់កាលផលិត រហូតដល់មាត់ច្រកនាំចេញ ដោយមានការចូលរួមសហការពីវិស័យឯកជន និងក្រុមហ៊ុននាំចេញ។
ទោះយ៉ាងណាអ្នកក្នុងវិស័យនេះ បានលើកឡើងថា នេះមិនមែនជាករណីថ្មីនោះទេ ដោយការក្លែងបន្លំអង្ករខ្មែរ នៅលើទីផ្សារអន្តរជាតិ មានជាច្រើនឆ្នាំមកហើយ ដែលករណីទាំងនេះនឹងធ្វើឲ្យបាត់ទំនុកចិត្តលើអង្ករខ្មែរពីអ្នកប្រើប្រាស់ បើសិនណារដ្ឋាភិបាលមិនចាត់វិធានការឲ្យបានទាន់ពេលនោះទេ៕
© រក្សាសិទ្ធិដោយ thmeythmey.com