ជាតិ
សង្គមជាតិ
កម្ពុជាកាន់ព្រះពុទ្ធសាសនាតែមានបំណងចង់ក្លាយជាសមាជិកអង្គការឥស្លាមអន្ដរជាតិOIC
រូបភាពពីហ្វេសប៊ុកផេកសម្តេច ហ៊ុន សែន
×![]()
ប្រមុខរាជរដ្ឋាភិបាលកម្ពុជា សម្ដេច ហ៊ុន សែន បានបង្ហាញពីបំណងចង់ក្លាយជាសមាជិកនៃអង្គការសហប្រតិបត្តិការឥស្លាម ហៅកាត់ថា OIC។ ទោះជាកម្ពុជាកាន់ព្រះពុទ្ធសាសនា និងមានប្រជាជនឥស្លាមតិចក៏ដោយ ប៉ុន្តែរដ្ឋាភិបាលនៃប្រទេសនេះ ចង់ក្លាយជាអ្នកសង្កេតការណ៍ក្នុងស្ថាប័នអន្ដរជាតិមួយនេះនាពេលខាងមុខ ដើម្បីជាប្រយោជន៍សម្រាប់សុខុដុមនីយកម្មសាសនា។
ថ្លែងក្នុងពិធីពិសារអាហារស្រាយបួសខែរ៉ម៉ាឌន នាថ្ងៃទី២៩ ឧសភា នៅសាលសន្និសីទ និងពិព័រណ៌កោះពេជ្រ ប្រមុខរាជរដ្ឋាភិបាលសម្តេច ហ៊ុន សែន ថ្លែងអរគុណដល់សាសនិកឥស្លាមទាំងជាតិ និងអន្ដរជាតិ ដែលបានមកចូលរួមក្នុងពិធី តបតាមការអញ្ជើញរបស់សម្តេច។ ក្នុងនោះដែរ សម្តេចបានបង្ហាញពីវត្តមានចូលពីតំណាងអគ្គលេខាធិការអង្គការ OIC និងអរគុណចំពោះវត្តមានចូលរួមរបស់លោកស្រី។
ក្នុងសន្ទរកថាមុនចាប់ផ្តើមពិធីពិសារអាហារស្រាយបួសជាមួយសាសនិកឥស្លាមប្រមាណ ៥០០០នាក់ សម្តេច ហ៊ុន សែនមានប្រសាសន៍ថា កម្ពុជាពិតជាមានបំណងចង់ក្លាយជាសមាជិកភាពនៃអង្គការឥស្លាម OIC ពិតប្រាកដមែន ទោះបីកម្ពុជាមានអ្នកកាន់សាសនាឥស្លាមតិចក៏ដោយ តែកម្ពុជាមានសហគមន៍ដ៏ធំទូលាយ ហើយដែលមានទំនាក់ទំនងជាមួយប្រទេសដ៏ទៃទៀតជាច្រើនផងដែរ។
សូមស្ដាប់ប្រសាសន៍របស់សម្ដេច ហ៊ុន សែន ដូចតទៅ
គួរបញ្ជាក់ថា អង្គការសហប្រតិបត្តិការឥស្លាម ជាអង្គការអន្តររដ្ឋាភិបាលមួយដែលត្រូវបានបង្កើតឡើងនៅក្នុងឆ្នាំ ១៩៦៩។ មកដល់ពេលបច្ចុប្បន្ន អង្គការអន្តរជាតិមួយនេះមានសមាជិកសរុបទាំងអស់ ៥៧ប្រទេស មកពីទ្វីបចំនួនបួនលើពិភពលោក។ ជាតំណាងឲ្យសំឡេងរួមរបស់ប្រជាជនឥស្លាមនៅទូទាំងពិភពលោក ស្ថាប័នអន្តរជាតិមួយនេះមានគោលដៅសំខាន់ការពារ និងថែរក្សាប្រយោជន៍ប្រជាជនឥស្លាមក៏ដូចជា លើកស្ទួយសន្តិភាព និងវិបុលភាពពិភពលោកទាំងមូលផង៕
Tag:
ហ៊ុន សែន
OIC
© រក្សាសិទ្ធិដោយ thmeythmey.com
