បទ ពាក្យ៦
-ដល់ពេលរវល់ទៀតហើយ អូនអើយត្រូវយល់ពីប្តី
ចុះខេត្តមិនមែនលេងអី
មេប្តីឲ្យចុះពង្រឹង។
-ជិតដល់រដូវឃោសនា មេថាប្រឹងពេញទំហឹង
បាត់ប្តីឯងកុំទន្ទឹង ដេកហ្នឹងមូលដ្ឋានទេណា។
-បានដៃលោកប្តីឆីក្រៅ Call ហៅនាងក្មេងសង្សា
លួចបង្កាត់ភ្លើងស្នេហា អាងថាប្រពន្ធមិនដឹង។
-មូលដ្ឋានមិនសូវទៅដល់ មិនខ្វល់គិតតែស្រវឹង
កៀកកិតជិតនាងច្រឡឹង រួចប្រឹងរាយការណ៍កុហក។
-ថាខ្លួនប្រឹងប្រែងខ្លាំងណាស់ ឃើញច្បាស់មុខឡើងស្លេកស្លក់
ត្រូវក្តៅហេវហត់ដង្ហក់ ឡើងស្លក់ម៉ាក់វាឃើញច្បាស់។
-ចន្ទនេះមេចាត់ចុះឃុំ មេធំឲ្យជួបចាស់ៗ
ដល់សុក្រមេឲ្យមើលស្រះ សៅរ៍ឆ្លាស់ឆ្លៀតជួបមន្ត្រី។
-អាទិត្យគិតថារួចម្តង មេបងមិនដឹងជាស្អី
ឲ្យជួបតំណាងក្រុមស្ត្រី កូនខ្ចីនៅមូលដ្ឋានទៀត។
-ការងារគ្មានសៅរ៍អាទិត្យ ការពិតលោកប្រុសប្រើស្នៀត
ថាចុះជួយបក្សជួយជាតិ បែរឆ្លៀតលួចឆីក្រៅសោះ?