ចុងភៅកម្ពុជា៣រូបទទួលបានមេដាយប្រាក់ពីការប្រកួតធ្វើម្ហូបក្នុងកម្មវិធីនៅប្រទេសថៃ

ជាតិ

សង្គមជាតិ

ចុងភៅកម្ពុជា៣រូបទទួលបានមេដាយប្រាក់ពីការប្រកួតធ្វើម្ហូបក្នុងកម្មវិធីនៅប្រទេសថៃ

03, Jun 2018 , 9:19 pm

រូបភាព

ដោយ: ថ្មីៗ

សៀមរាប៖ ចុងភៅចំនួន៣រូប ក្នុងសមាគមចុងភៅកម្ពុជា បានទៅចូលរួមប្រកួតធ្វើម្ហូបក្នុងកម្មវិធីមួយនៅប្រទេសថៃ ដោយទទួលបានលទ្ធផលមេដាយប្រាក់។ ប្រធានបទសម្រាប់កម្មវិធីធ្វើម្ហូបនៅឆ្នាំនេះ គឺទន្លេមេគង្គ ដោយមានអ្នកចូលរួមជាងមួយពាន់នាក់។

កម្មវិធីខាងលើត្រូវបានធ្វើឡើងនៅថ្ងៃទី២ មិថុនានៅប្រទេសថៃ ដោយមានប្រទេសចំនួន១១ចូលរួម និងអ្នកចូលរួមសរុបចំនួន ១៣១៨នាក់។ លោក ឡុង បូរ៉ា ប្រធានសមាគមចុងភៅកម្ពុជាបានប្រាប់សារព័ត៌មានថ្មីៗតាមសារអេឡិចត្រូនិកថា នេះជាឆ្នាំទី៦ហើយដែលសមាគមរបស់លោកបានបញ្ជូនចុងភៅទៅចូលរួមកម្មវិធីខាងលើ។ លោកបន្ថែមថា ទោះលទ្ធផលមិនសូវល្អប្រសើរក៏ពិតមែន តែខាងសមាគមរបស់លោក ចង់ឱ្យចុងភៅថ្មីៗមានបទពិសោធន៍ក្នុងការចូលរួមប្រកួតប្រជែងធ្វើម្ហូបបែបនេះ។

តាមការលើកឡើងរបស់លោក ឡុង បូរ៉ា ចុងភៅកម្ពុជាដែលបានចូលរួមក្នុងកម្មវិធីធ្វើម្ហូបនៅប្រទេសថៃឆ្នាំនេះមានចំនួន៣រូប ទៅលើវិញ្ញាសារចំនួន៣ រួមមាន វិញ្ញាសារសាច់មាន់ និងសាច់ជ្រូក ទទួលបានមេដាយប្រាក់ វិញ្ញាសារ សាច់ចៀម បានមេដាយប្រាក់ និងវិញ្ញាសារ គ្រឿងសមុទ្រ បានមេដាយសំរិទ្ធ។ លោកបញ្ជាក់ថា ប្រទេសដែលនាំមុខដណ្ដើមបានមេដាយមាស និងលើកពាននោះ គឺប្រទេសថៃ និងម៉ាឡេស៉ី និងប្រទេសមួយចំនួនទៀត។

ប្រធានដឹកនាំចុងភៅកម្ពុជាទៅប្រកួតនៅឆ្នាំនេះ រួមមានលោក ទូច វុទ្ធី ពីសណ្ឋាគារ អង្គរស៉ីនជូរី លោក ហ៉ីង ហេន ពីសណ្ឋាគារ អង្គរអេរ៉ា លោក អ៉ឹង សុភ័ក្ដ្រ ពីភោជនីយដ្ឋាន ខូលិចសិន និងលោក ឡេង វាសនា ពីភោជនីយដ្ឋាន ម្ហូប។

គួរបញ្ជាក់ថា នេះជាឆ្នាំទី៦ហើយ ដែលសមាគមចុងភៅកម្ពុជាបានចូលរួមកម្មវិធីប្រកួតធ្វើម្ហូបនៅប្រទេស ដោយឆ្នាំទី១ ដណ្ដើមបានមេដាយមាស ឆ្នាំទី២ បានមេដាយមាស និងបានលើកពានផងដែរ ឆ្នាំទី៣ មេដាយប្រាក់ ឆ្នាំទី៤ មេដាយមាស និងឆ្នាំទី៥បានមេដាយប្រាក់៕