អន្តរជាតិ
នយោបាយអន្តរជាតិ
របបសឹកថៃ បន្តរកវិធីចាត់ការអតីតមេដឹកនាំត្រកូលស៊ីណាវ៉ាត់ ទោះបីជួបផលលំបាកច្រើនក៏ដោយ
× រដ្ឋាភិបាលរបបសឹកថៃបានទទួលស្គាល់ពីភាពលំបាកក្នុងការតាមកំណត់មុខសញ្ញា និងសកម្មភាពរបស់អតីតនាយករដ្ឋមន្ត្រីថៃត្រកូលស៊ីណាវ៉ាត់ទាំងពីររូប គឺលោកថាក់ស៊ីន ស៊ីណាវ៉ាត់ និងលោកស្រី យីងឡាក់ ស៊ីណាវ៉ាត់ ខណៈមានការចុះផ្សាយជាបន្តបន្ទាប់ពីសកម្មភាពរបស់ទាំងពីរនៅបរទេស។
អគ្គស្នងការរងនគរបាលជាតិថៃ លោកឧត្តមសេនីយ៍ Srivara Ransibrahmanakul ដើមសប្តាហ៍កន្លងទៅបានថ្លែងថា វាជារឿងលំបាកក្នុងការតាមកំណត់សកម្មភាពរបស់អតីតនាយករដ្ឋមន្ត្រីថៃ លោកស្រី យីងឡាក់ ជាពិសេសលើករណីដែលសារព័ត៌មានបានចុះផ្សាយថា លោកស្រីទទួលបានទិដ្ឋាការស្នាក់នៅចក្រភពអង់គ្លេស។ នេះបើយោងតាមការចុះផ្សាយរបស់ Bangkok Post។
លោកឧត្តមសេនីយ៍ខាងលើបានអះអាងថា ភាគីរដ្ឋាភិបាលថៃបានផ្ញើលិខិតផ្លូវការទៅកាន់ភាគីអង់គ្លេសរួចហើយដើម្បីបំភ្លឺ ថាតើព័ត៌មានដែលចុះផ្សាយដោយសារព័ត៌មាន BBC នាពេលថ្មីៗនេះ ថា លោកស្រី យីងឡាក់ ទទួលបានទិដ្ឋាការស្នាក់នៅពីអង់គ្លេសសុពលភាព១០ឆ្នាំ ជារឿងពិត ឬយ៉ាងណា។
នាឱកាសដដែលនោះ លោកឧត្តមសេនីយ៍ ក៏បានបញ្ជាក់ផងដែរថា ប៉ូលិសថៃកំពុងតែធ្វើកិច្ចសហប្រតិបត្តិការជាមួយនឹងប៉ូលិសអន្តរជាតិដើម្បីកំណត់មុខសញ្ញាថ្មីមួយទៀតតាមរយៈរូបភាពក្នុងបណ្តាញសង្គមរបស់អតីតមេដឹកនាំថៃលោក ថាក់ស៊ីន និងលោកស្រី យីងឡាក់ នៅទឹកដីសហរដ្ឋអាមេរិកថា តើវាជារូបភាពចាស់ឬក៏ថ្មី។ បើនេះជារូបថ្មី នោះប៉ូលិសនឹងតាមដានថា តើមេដឹកនាំទាំងពីរប្រើប្រាស់លិខិតឆ្លងដែនណាមួយសម្រាប់ធ្វើដំណើរឆ្លងប្រទេសនោះ។
លោកឧត្តមសេនីយ៍ បានសង្កត់ធ្ងន់ថា គិតចាប់តាំងពីលោកស្រី យីងឡាក់ ភៀសខ្លួនចេញពីប្រទេស ស្របពេលដែលតុលាការថៃចេញសាលក្រមកំបាំងមុខ លោកស្រី យីងឡាក់ ពិតជាបានប្រព្រឹត្តបទល្មើសដោយមានទាំងទោសព្រហ្មទណ្ឌ និងសំណងរដ្ឋប្បវេណីនោះ។ ប៉ូលិសថៃ មិនដែលទុកសំណុំរឿងនេះចោលឡើយ ដោយពួកគេតែងតែធ្វើកិច្ចសហការជាមួយនឹងប៉ូលិសអន្តរជាតិដើម្បីតាមកំណត់សកម្មភាពលោកស្រីយីងឡាក់ជានិច្ច។
គួរជម្រាបផងថា អតីតមេដឹកនាំកំពូលថៃត្រកូលស៊ីណាវ៉ាត់ទាំងពីរដែលត្រូវបានទម្លាក់ចេញពីតំណែងដោយសារតែរដ្ឋប្រហារយោធាដូចគ្នានេះ ត្រូវបានតុលាការថៃកាត់ទោសដាច់ដោយឡែកពីគ្នាឲ្យជាប់ពន្ធនាគារលើបទពុករលួយ និងធ្វេសប្រហែសក្នុងការដឹកនាំប្រទេស។ អ្នកទាំងពីរសុទ្ធសឹងតែត្រូវបានរបបសឹកថៃ ដកហូតសិទ្ធិកាន់កាប់លិខិតឆ្លងដែនសញ្ជាតិថៃ ក៏ប៉ុន្តែអ្នកទាំងពីរ បានបង្ហាញវត្តមានជាបន្តបន្ទាប់នៅក្នុងប្រទេសក្នុងតំបន់ដូចជា ចិន ជប៉ុន និងសិង្ហបុរីជាដើម៕
Tag:
ថៃ
ស៊ីណាវ៉ាត់
អាស៊ាន
© រក្សាសិទ្ធិដោយ thmeythmey.com