ជាតិ
សុខភាព
រដ្ឋាភិបាលសន្យាផ្ដល់ថវិកាជិត៨០ម៉ឺនរៀល ដល់ស្ត្រីក្រីក្រមានផ្ទៃពោះទូទាំងប្រទេស នៅឆ្នាំ២០១៩
× ភ្នំពេញ៖ ស្ត្រីមានផ្ទៃពោះ ក្នុងគ្រួសារក្រីក្រទូទាំងប្រទេស នឹងទទួលបានថវិកាជិត៨០ម៉ឺនរៀល ពីរដ្ឋាភិបាល។ គោលនយោបាយសម្រាប់គាំពារស្ត្រីមានផ្ទៃពោះនេះ នឹងត្រូវចាប់ផ្ដើមអនុវត្តនៅពាក់កណ្ដាល ឆ្នាំ២០១៩ខាងមុខ។
ក្រោយចូលអាណត្តិថ្មី រដ្ឋាភិបាល នឹងផ្ដល់ថវិកា៧៦ម៉ឺនរៀល សម្រាប់ជួយដល់ស្ត្រីក្រីក្រ ដែលត្រូវសម្រាលកូន។ ស្ត្រីក្រីក្រទាំងនោះ នឹងអាចថវិកាចាប់តាំងពីពួកគេមានផ្ទៃពោះ រហូតដល់ក្រោយសម្រាលកូន។ នេះបើតាមគោលនយោបាយរបស់គណបក្សប្រជាជនកម្ពុជា។
សម្ដេចនាយករដ្ឋមន្ត្រី ហ៊ុន សែន បាននិយាយថា រដ្ឋាភិបាល នឹងរៀបចំទឹកប្រាក់ឧបត្ថម្ភជាដំណាក់ដល់ស្ត្រីមានផ្ទៃពោះ ដោយពួកគេនឹងទទួលបានថវិកា៤ដង ដោយក្នុង១ដងទទួលបាន៤ម៉ឺនរៀល ហើយនៅពេលសម្រាលកូន គឺទទួលបានសាច់ប្រាក់ ២០ម៉ឺនរៀលបន្ថែមទៀត។ បើតាមសម្ដេច ហ៊ុន សែន ក្រោយពេលសម្រាលកូនរួច ស្ត្រីក្រីក្រទាំងនោះ ក៏នឹងទទួលបានថវិកា១០ដងទៀត ដែលមានទឹកប្រាក់សរុប៤០ម៉ឺនរៀល (ក្នុង១ដងទទួលបានសាច់ប្រាក់៤ម៉ឺនរៀល)។
សម្រាប់ការចំណាយថវិកាឧបត្ថម្ភនេះ រដ្ឋាភិបាលត្រូវការចំណាយថវិកាជាតិសរុបជាង៤លានដុល្លារសម្រាប់ការអនុវត្តនៅឆ្នាំទី១ (២០១៩) ។ នេះជាការបញ្ជាក់របស់សម្ដេច ហ៊ុន សែន ដែលបានបន្ថែមថា ទឹកប្រាក់ចំណាយនេះ នឹងកើនឡើង៧,៧លានដុល្លារ នៅក្នុងឆ្នាំទី (២០២០) ហើយបន្តកើនរហូតជាង១០លានដុល្លារនៅក្នុងឆ្នាំទី៣ (២០២១) សម្រាប់ជួយទ្រទ្រង់ផ្នែកសុខភាពរបស់ស្ត្រីមានផ្ទៃពោះនេះ។
ការចំណាយថវិកាទាំងនេះ គ្មានអ្វីប៉ះពាល់ដល់ចរន្តថវិកាជាតិឡើយ។ ហើយការចំណាយនឹងធ្លាក់ចុះមកកម្រិតទាបវិញ នៅពេលដែលប្រជាពលរដ្ឋ មានកម្រិតជីវភាពកាន់តែល្អប្រសើរ។ នេះបើតាមសម្ដេច ហ៊ុន សែន ដែលថ្លែងនៅក្នុងការប្រារព្ធពិធីអបអរសាទរខួបលើកទី១១ ទិវាអតីតយុទ្ធជនកម្ពុជា នៅព្រឹកថ្ងៃទី៤ មិថុនា។
គួរបញ្ជាក់ថា រដ្ឋាភិបាល ក៏បានដាក់ចេញគោលនយោបាយផ្ដល់ថវិកា ជួយដល់កម្មកររោងចក្រ និងមន្ត្រីរាជការជាស្ត្រី ដែលមានផ្ទៃពោះផងដែរ។ សម្រាប់ស្ត្រីបម្រើការងារក្នុងក្របខណ្ឌកងកម្លាំងប្រដាប់អាវុធ និងមន្ត្រីរាជការស៊ីវិល ទទួលបានថវិកា៨០ម៉ឺនរៀល នៅពេលសម្រាលកូន។ ចំណែកកម្មការិនីរោងចក្រ ដែលសម្រាលកូន១នាក់ ទទួលបានថវិកា៤០ម៉ឺនរៀល ,កូនភ្លោះទទួលបានថវិកា៨០ម៉ឺនរៀល និងកូនភ្លោះបី ទទួលបាន១លាន ២សែនរៀល។ បើតាមសម្ដេច ហ៊ុន សែន ថវិកាសម្រាប់ទ្រទ្រង់កម្មការិនីមានផ្ទៃពោះនេះ នឹងចំណាយ១០លានដុល្លារក្នុងមួយឆ្នាំ៕
Tag:
ហ៊ុន សែន
ស្ត្រីមានគត៌
សុខភាព
© រក្សាសិទ្ធិដោយ thmeythmey.com