ជាតិ
សេដ្ឋកិច្ច
CSX ដាក់ឲ្យដំណើរការប្រព័ន្ធជួញដូរចល័ត នៅចុងខែមិថុនានេះ រូបភាព៖ CSX
× ភ្នំពេញ៖ ក្រុមហ៊ុនផ្សារមូលបត្រកម្ពុជា (CSX) នឹងដាក់ឲ្យដំណើរការបឋមនូវប្រព័ន្ធជួញដូរចល័ត (Mobile Trading System) សម្រាប់ការជួញដូរមូលបត្រកម្មសិទ្ធិ ចាប់ពីថ្ងៃទី២៥ខែមិថុនាឆ្នាំនេះតទៅ។ នេះបើតាមសេចក្ដីជូនដំណឹងរបស់ CSX ។
ប្រព័ន្ធជួញដូរចល័ត គឺជាប្រព័ន្ធជួញដូរតាមអ៊ីនធឺណេត ដែលត្រូវបានអភិវឌ្ឍឡើងក្រោមការជួយគាំទ្រពីភ្នាក់ងារសហប្រតិបត្តិការអន្តរជាតិកូរ៉េ (កយកា) ដើម្បីជួយសម្រួល និងជំរុញការជួញដូរមូលបត្រកម្មសិទ្ធិដែលចុះបញ្ជីនៅ CSX ។
ដំណើរការនៅលើ web browser ដែលមានស្រាប់នៅលើស្មាតហ្វូន និងថេបប្លេត ប្រព័ន្ធនេះនឹងអនុញ្ញាតឲ្យវិនិយោគិនដាក់បញ្ជាជួញដូរ កែប្រែ និងលុបចោលបញ្ជារបស់ខ្លួនបានដោយខ្លួនឯង ក៏ដូចជាពិនិត្យមើលបញ្ជា និងទិន្នន័យជួញដូរកន្លងមកផងដែរ។
វិនិយោគិនអាចតាមដានមើលទិន្នន័យទីផ្សារ សេចក្ដីជូនដំណឹងទាំងរបស់ក្រុមហ៊ុនចុះបញ្ជីលក់មូលបត្រ និង CSX ព្រមទាំងព័ត៌មានផ្សេងទៀតដែលផ្ដល់ដោយសមាជិករបស់ CSX ដែលមានសារៈសំខាន់សម្រាប់ការសម្រេចចិត្តវិនិយោគ។
ដើម្បីប្រើប្រាស់ប្រព័ន្ធនេះ វិនិយោគិនត្រូវមានគណនីជួញដូរនៅក្រុមហ៊ុនមូលបត្រណាមួយ ដែលជាសមាជិក CSX និងចុះឈ្មោះជាមួយ CSX ដើម្បីផ្ដល់សេវាប្រព័ន្ធជួញដូរចល័តនេះ។
ការចុះឈ្មោះប្រើប្រាស់ប្រព័ន្ធជួញដូរចល័តនេះ វិនិយោគិនអាចស្នើសុំដំណើរការគណនីនៃប្រព័ន្ធនេះ តាមរយៈការចូលទៅកាន់ https://mts.csx.com.kh ឬទាក់ទងដោយផ្ទាល់ទៅក្រុមហ៊ុនមូលបត្ររបស់ខ្លួនដើម្បីស្វែងរកជំនួយ៕
© រក្សាសិទ្ធិដោយ thmeythmey.com