អន្តរជាតិ
មីយ៉ាន់ម៉ា ព្រមព្រៀងជាមួយភ្នាក់ងារ UN ជួយជំរុញការបញ្ជូនជនភៀសខ្លួនរ៉ូហ៊ីងយ៉ាមកស្រុកកំណើតវិញ
× រដ្ឋាភិបាលក្រុងណៃពិដោរ និងទីភ្នាក់ងារជំនាញរបស់អង្គការសហប្រជាជាតិ បានព្រមព្រៀងគ្នាជាលើកដំបូងលើក្របខណ្ឌថ្មីពាក់ព័ន្ធនឹងដំណោះស្រាយក្នុងការបញ្ជូនជនភៀសខ្លួនជនជាតិភាគតិចរ៉ូហ៊ីងយ៉ាទៅកាន់ទីកំណើតរបស់ពួកគេវិញ។ តែកិច្ចព្រមព្រៀងនេះតម្រូវឲ្យមីយ៉ាន់ម៉ា ធ្វើសម្បទានច្រើន ដ្បិតភ្នាក់ងារជំនាញអង្គការសហប្រជាជាតិ មានលក្ខខណ្ឌ ។
បើមិនមានការប្រែប្រួលនោះទេ ក្នុងអំឡុងពេលសប្តាហ៍នេះ ភ្នាក់ងារជំនាញទទួលបន្ទុកជនភៀសខ្លួនអង្គការសហប្រជាជាតិ នឹងចុះហត្ថលេខាជាផ្លូវការជាមួយនឹងរដ្ឋាភិបាលមីយ៉ាន់ម៉ាលើ ដំណោះស្រាយជួយជនភៀសខ្លួនរ៉ូហ៊ីងយ៉ាដែលកំពុងតែរស់នៅក្នុងជំរំនៅប្រទេសបង់ក្លាដែស។ នេះបើយោងតាមការចុះផ្សាយមជ្ឈមណ្ឌលព័ត៌មានអង្គការសហប្រជាជាតិ នៅថ្ងៃ០១ មិថុនា។
បើកិច្ចព្រមព្រៀង ពិតត្រូវបានចុះហត្ថលេខាដោយភាគីទាំងពីរមែននោះ វានឹងផ្តល់លទ្ធភាពសម្រាប់ក្រុមភ្នាក់ងារជំនាញក្នុងការបំពេញបេសសកម្មការងារទៅកាន់រដ្ឋ Rakhine។ វារាប់បញ្ចូលទាំងទីកន្លែងរបស់ជនភៀសខ្លួនរងផលប៉ះពាល់ ដែលពីមុនមកភ្នាក់ងារជំនាញ មិនអាចចូលទៅដល់បានឡើយ ដ្បិតមានការហាមឃាត់។
អ្វីដែលគួរកត់សម្គាល់ កិច្ចព្រមព្រៀងដែលគ្រោងនឹងចុះរួមគ្នាដោយភាគីទាំងពីរដដែលនោះ ក៏ផ្តល់សិទ្ធិឲ្យភ្នាក់ងារជំនាញអង្គការសហប្រជាជាតិជួយសម្របសម្រួល និងណែនាំដល់ជនភៀសខ្លួន ដើម្បីធានាឲ្យបានថា ការធ្វើមាតុភូមិនិវត្តន៍របស់ពួកគេជាការស្មគ្រ័ចិត្ត និងសុវត្ថិភាព។ ចំណុចនេះហើយ ដែលតម្រូវឲ្យមីយ៉ាន់ម៉ាធ្វើសម្បទានច្រើន ព្រោះគិតចាប់តាំងពីបញ្ហាជនភៀសខ្លួនផ្ទុះឡើងពីខែសីហាឆ្នាំ ២០១៧ មក អាជ្ញាធរមីយ៉ាន់ម៉ាមិនដែលអនុញ្ញាតឲ្យមានការចូលទៅកាន់តំបន់នោះឡើយ។
តាមពិតទៅ ក្រោយពីមានសម្ពាធខ្លាំងពីសហគមន៍អន្តរជាតិ មីយ៉ាន់ម៉ាក៏បានព្រមព្រៀងគ្នាជាមួយបង់ក្លាដែសក្នុងការរៀបចំបញ្ជូនជនភៀសខ្លួនមកកាន់ស្រុកកំណើតវិញ។ តែកិច្ចព្រមព្រៀងនេះ ហាក់នៅទ្រឹងនៅឡើយនោះទេ ព្រោះថា ភាគទាំងពីរមិនទាន់អាចធានាបានពីសុវត្ថិភាព និងការស្មគ្រ័ចិត្តក្នុងដំណើរការបញ្ជូនជនភៀសខ្លួនមកមីយ៉ាន់ម៉ាវិញបានឡើយ។
គួរជម្រាបផងដែរថា តាមរបាយការណ៍របស់អង្គការសហប្រជាជាតិ មានជនភៀសខ្លួនជនជាតិភាគតិចរ៉ូហ៊ីងយ៉ាលើសពី ៥០ម៉ឺននាក់ បានភៀសខ្លួនមកកាន់បង់ក្លាដែស ក្រោយពីមានការបាញ់ប្រហារគ្នានៅរដ្ឋ Rakhine នោះនៅខែសីហាឆ្នាំមុន។ កន្លងមក រដ្ឋាភិបាលមីយ៉ាន់ម៉ាបានប្រកាសមិនទទួលស្គាល់របាយការណ៍នានាដែលចោទថា ខ្លួនបានបំពានសិទ្ធិមនុស្សធ្ងន់ធ្ងរទៅលើជនជាតិភាគតិចទាំងនេះ។ មីយ៉ាន់ម៉ាថែមទាំងហាមអ្នកជំនាញសិទ្ធិមនុស្សអង្គការសហប្រជាជាតិចូលទៅកាន់តំបន់រងគ្រោះថែមទៀតផង៕
Tag:
មីយ៉ាន់ម៉ា
រ៉ូហ៊ីងយ៉ា
UN
© រក្សាសិទ្ធិដោយ thmeythmey.com